13 جەلتوقسان كۇنى نارتاي بەكەجانوۆ اتىنداعى قازاق مۋزىكالىق دراما تەاترىندا قر تاۋەلسىزدىگىنىڭ 25 جىلدىعى قۇرمەتىنە ارنالعان سالتاناتتى جيىن ءوتتى. شاراعا وبلىس اكىمى قىرىمبەك كوشەرباەۆ جانە قر ۇلتتىق ەكونوميكا ۆيتسە-ءمينيسترى ايدار ءارىپحانوۆ قاتىستى. جيىندا ايماقتىڭ تاۋەلسىزدىك جىلدارىنداعى نەگىزگى الەۋمەتتىك-ەكونوميكالىق دامۋ دەڭگەيى سارالاندى. بۇدان بولەك, ءتۇرلى سالالاردا ەڭبەك ەتىپ جۇرگەن 79 ادام وردەن, مەدالدارمەن ماراپاتتالىپ, قازاقستان رەسپۋبليكاسىنىڭ قۇرمەت گراموتالارىنا جانە 4 ارداگەر «قىزىلوردا وبلىسىنىڭ قۇرمەتتى ازاماتى» اتاعىنا يە بولدى.
وبلىس اكىمى قىرىمبەك كوشەرباەۆ اتاپ وتكەندەي, قىزىلوردا وبلىسى شيرەك عاسىر ىشىندە ەكونوميكا مەن ونەركاسىپتىڭ بارلىق سالالارىندا تۇراقتى دامۋعا قول جەتكىزدى.
- 2017 جىلدان باستاپ وبلىستا قازاقستانداعى العاشقى شىنى زاۋىتى جۇمىسىن باستايدى. بولاشاقتا ايماقتىق ەكونوميكانىڭ تىرەگىنە اينالۋى ءتيىس تاۋ-كەن مەتاللۋرگيا ونەركاسىبى دامۋدا. بۇل جەتىستىكتەردىڭ بارلىعىنا ەلباسىنىڭ سارابدال ساياساتى مەن كۇش-جىگەرىنىڭ, حالقىمىزدىڭ بىرلىگى مەن ىنتىماعىنىڭ ارقاسىندا قول جەتكىزدىك,- دەپ اتاپ ءوتتى ق.كوشەرباەۆ.
جيىندا تۇڭعىش پرەزيدەنت نۇرسۇلتان ءابىش ۇلى نازارباەۆتىڭ ەرەن ەڭبەگى ەرەكشە اتاپ ءوتىلدى. سولتۇستىك ارال ارناسىنىڭ قايتا قالپىنا كەلۋى, «بايقوڭىر» عارىش ايلاعىنىڭ دامۋى, ايماقتاعى ۋران جانە مۇنايگاز ونەركاسىبىنىڭ قۇرىلۋى, كۇردەلى الەۋمەتتىك ماسەلەلەردىڭ شەشىلۋى, سىر ءوڭىرىنىڭ كولىك-لوگيستيكالىق الەۋەتىن قالىپتاستىرۋ, سونداي-اق قازاق حالقىنىڭ رۋحاني مۇرالارىنىڭ جاڭعىرۋى ەلباسىنىڭ ايرىقشا ەڭبەگى رەتىندە اتاپ ءوتىلدى.
سالتاناتتى شارانىڭ سوڭى بەلگىلى ورىنداۋشىلار مەن شىعارماشىلىق ۇجىمداردىڭ قاتىسۋىمەن وتكەن مەرەكەلىك كونتسەرتپەن قورىتىندىلاندى.
