انتولوگيا ماقساتى – تاتۋلىققا سەپتەسۋ

تاۋەلسىزدىك تويىنىڭ قارساڭىندا رۋحاني الەمىمىز تاعى ءبىر ادەمى دۇنيەمەن تولىقتى. الماتىداعى «ان ارىس» ­باسپاسىنان «ماڭگىلىك ەلىم مەنىڭ» اتتى پوەزيا ­انتولوگياسى جارىق كورىپ, وقىرماندارعا جول تارتتى. كىتاپتىڭ تۇساۋكەسەر ءراسىمى ەلورداداعى ۇلتتىق اكادەميالىق كىتاپحانادا ۇيىمداستىرىلىپ, وعان پارلامەنت ءماجىلىسىنىڭ دەپۋتاتتارى, كىتاپتى شىعارۋعا ات­سالىسقان تۇلعالار, زيالى قاۋىم وكىلدەرى قاتىستى. «ماڭگىلىك ەلىم مەنىڭ» انتولو­گياسىنىڭ ەرەكشەلىگى رەتىندە قازاق, ورىس تىلدەرىندە جىر جازاتىن وتاندىق اقىن­داردىڭ شىعارمالارىمەن قاتار, ەلىمىز­دەگى ءتۇرلى وزگە ەتنوس وكىلدەرىنىڭ ءتول تىلىندە جاز­عان شىعارمالارى جيناقتاپ بەرىل­گەنىن ايتۋعا بولادى. قازاق تىلىندە جانە باسقا تىلدەردە جازىل­عان ولەڭدەر دە تۇپنۇسقامەن بىرگە ورىس تىلىنە اۋدارىلىپ, جاريا­لانعان. ءبى­رىنشى بولىمدە تانىمال قا­زاق اقىندارىنىڭ ولەڭدەرى توپ­تاستىرىلعان. بۇل اقىنداردىڭ ۇزىن سانى – 14. ەكىنشى ءبولىم نەمىس, كورەي, كۇرد, ۇيعىر, بەلورۋس, وزبەك, تۇرىك, تاتار, دۇڭگەن, چەشەن ادەبيەتى وكىلدەرىنىڭ شىعار­مالارىنان تۇرسا, ءۇشىنشى بولىمدە ەلىمىزدەگى ءورىستىلدى اقىنداردىڭ جىرلارىنا ورىن بەرىلگەن. تۇساۋكەسەر ءراسىمىن قازاقستان جازۋشىلار وداعىنىڭ باسقارما توراعاسى, اقىن نۇرلان ورازالين جۇرگىزىپ وتىردى. انتولوگيانىڭ جارىققا شىعۋىنا قازاقستان جازۋشىلار وداعى, قازاقستان حالقى اسسامبلەياسى تىكەلەي قولداۋ كورسەتىپ, يدەيا تاستاعان بولسا, قارجىلاي جاعىنان دەمەۋشىلىك جاساعان «التىن قىران» حالىق­ارالىق قايىرىمدىلىق قورى. بۇل ورايدا اسسامبلەيا اتىنان ءسوز العان ءماجىلىس دەپۋتاتى ساۋىتبەك ابدراحمانوۆ اسسامبلەيانىڭ يگىلىكتى يدەياسىن جارقىراتىپ جۇزەگە اسىرعان اتاقتى مەتسەنات, قور باسشىسى يسلامبەك سالجانوۆقا العىس ايتا كەلىپ, ادامداردىڭ جاقىنداسۋىنا, حالىقتاردىڭ تۇسىنىسۋىندە ادەبيەت پەن ونەردىڭ ورنى ەرەكشە ەكەندىگىنە ايشىقتى مىسالدى العا تارتتى. «ماڭگىلىك ەلىم مەنىڭ» انتولوگياسى ارقىلى قازاقستاندىقتاردىڭ ءبىر-ءبىرىن بۇرىنعىدان دا جاقىن تارتا تۇسۋىنە جاعداي جاسالادى. ويتكەنى, جۇرەكتەرگە ەڭ جاقىن جول سول جىرلار ارقىلى سالىنادى». ءوز كەزەگىندە مەتسەنات, «التىن قىراننىڭ» باسشىسى يسلامبەك سالجانوۆ ادەبيەتكە قانداي قام­قورلىق جاساسا دا جاراساتىنىنا توقتالا كەلە, مۇنايدى ەكسپورتقا شىعارىپ جۇرگەنىمىزدەي, ەندىگى جەردە رۋحانياتىمىزدى دا ەكس­پورتقا شىعاراتىن ۋاقىتتىڭ كەل­گەنىن مازمۇندايتىن ويلارىمەن ءبولىستى. كەش بارىسىندا انتولو­گيانىڭ بىرنەشە اۆتورى تاراپىنان دا كوپتەگەن العىس ايتىلدى. ايگۇل سەيىلوۆا, «ەگەمەن قازاقستان»