ەليزابەت تۇرسىنباەۆا ەل چەمپيونى اتاندى

وڭتۇستىك استانانىڭ «الماتى ارەنا» مۇز سارايىندا مانەرلەپ سىرعاناۋدان  قازاقستاننىڭ اشىق چەمپيوناتى ءوز مارەسىنە جەتتى. ول  2017 جىلى مەگاپوليستە وتەتىن قىسقى ۋنيۆەرسيادا قارساڭىندا ۇيىمداستىرىلعان تەستىلىك جارىس بولىپ ەسەپتەلدى. سەبەبى,  مانەرلەپ سىرعاناۋ ستۋدەنتتەر باسەكەسى باعدارلاماسىنا كىرەتىن سپورت ءتۇرى بولىپ تابىلادى. جارىسقا قازاقستان, وزبەكستان مەن قىرعىزستان ەلدەرىنىڭ 80-گە جۋىق سپورتشىسى قاتىستى. مۇز ايدىنىنا العاشقى بولىپ سپورت شەبەرلىگى­نە ۇمىتكەر قىزدار شىقتى. ولاردىڭ اراسىندا الماتىلىق الانا توقتاروۆا 135,21 ۇپايمەن ءبىرىنشى ورىندى جەڭىپ الدى. ەكىنشى ورىن 97,10 ۇپاي جيناعان كەلەسى الماتىلىق گۇلجان جۇمادىلوۆاعا بۇيىردى. ءۇشىنشى ورىنعا  96,97 ۇپاي جي­ناعان وڭتۇستىك قازاقستان وبلىسىنىڭ سپورتشىسى داريا سيروتيناعا تيەسىلى بولدى. ال ۇلدار اراسىندا 124,59 ۇپايلى استانالىق راحات ءبىرالين ءبىرىنشى ورىنعا كوتەرىلدى. بۇدان كەيىنگى ورىندارعا الما­تى­لىق­تار ۆسەۆولود فيل (103,12) مەن يليۋسي ۆولكوۆ (94,85) ورنالاستى. بۇدان كەيىن جانكۇيەرلەر سپورت شەبەر­لەرىنىڭ ەركىن باعدارلاما بويىنشا سايىس­تارىن تاماشالادى. ولاردىڭ توبىندا قىزىلوردالىق ەليزابەت تۇرسىنباەۆاعا تەڭ كەلەر ەشكىم بولمادى. ول  216,46 ۇپاي الىپ, رەكوردتىق كورسەتكىشكە جەتتى. كەلەسى ەكى جۇلدەلى ورىندارعا قىسقى ۋنيۆەرسياداعا قاتىسۋشىلار ساپىنداعى الماتىلىقتار ايزا يمانبەك پەن  الەكساندرا سايۋتينا جايعاستى. ولار تيىسىنشە 135,11 جانە 123,41 ۇپاي جيناپ, چەمپيوننان كوپ قالىپ قويدى. – بۇگىنگى ناتيجەمە وتە ريزامىن. سەبەبى, ۇپايىم قورىن جاڭارتىپ, وسى جىلعى ەڭ جوعارى بالل جينادىم. ۋنيۆەرسيادادا وسى ەكى باعدارلامامەن ونەر كورسەتسەم دەگەن ويدامىن. بىراق قوسىمشا وزگەرىستەر بولۋى دا مۇمكىن. سونىڭ بارىنە تياناق­تى دايىندىق جاساپ ءجۇرمىن. ءبارى ءساتتى وتە­تىن شىعار دەگەن ۇمىتتەمىن, – دەدى ايزا يمانبەك جارىس سوڭىندا. ۇلدار اراسىندا بەس سپورت شەبەرى ءوزارا كۇش سىناسىپ, ناتيجەسىندە التىن مەدالدى 150,48 ۇپاي جيناعان  الماتىلىق ارتۋر پانيحين جەڭىپ الدى. قاراعاندىلىق مەليس حاكيموۆ (132,13) پەن استانالىق نيكيتا مانكو (129,92) بۇدان كەيىنگى ەكى جۇلدەلى ورىندى ەنشىلەدى. تالعات ءسۇيىنباي, «ەگەمەن قازاقستان» الماتى