جەڭىستى كۇندەردى كۇتىپ ءجۇرمىز

ەلىمىزدىڭ سولتۇستىك ايماعىندا قىس ۇزاق, قار مول تۇسكەندىكتەن قىسقى سپورت تۇرلەرىن دامىتۋعا قولايلى. بالا كەزدەن شاڭعى, كونكي تەۋىپ وستىك. اتاقتى شاڭعىشى, جەرلەسىمىز يۆان گارانيندەي بولساق دەپ ارماندادىق. ا.بايتۇرسىنوۆ اتىنداعى قوستاناي مەملەكەتتىك ۋنيۆەرسيتەتىنە كەلگەن سوڭ دا مەن سپورتتى تاستاعانىم جوق, وقۋمەن بىرگە ونى جانىما سەرىك ەتتىم. 2014 جىلى قازاقستان وقۋ ورىندارى اراسىنداعى بەسىنشى ۋنيۆەرسيادا قوستاناي قالاسىندا وتكەن بولاتىن. ءبىزدىڭ ۋنيۆەرسيتەتتىڭ كومانداسى سوندا ءبىرىنشى ورىندى يەلەندى. ال بيىل اقپان ايىندا الماتىدا وتكەن ستۋدەنت جاستاردىڭ التىنشى ۋنيۆەرسياداسىنان دا ا. بايتۇرسىنوۆ اتىنداعى ۋنيۆەرسيتەت كومانداسى ءبىرىنشى جۇلدەمەن ورالعان بولاتىن. وعان ەلىمىزدىڭ بارلىق شالعايىنان 35 وقۋ ورنى قاتىسقان باسەكەلى جارىس بولدى. مۇنىڭ بارلىعىن ايتىپ وتىرعانىم, ءبىز قاتىسقان بايراقتى جارىستاردىڭ بارلىعى دا دۇنيەجۇزىلىك ۋنيۆەرسيادا الدىندا سپورتشىلاردى شيراتتى. قازىر الماتىدا وتەتىن ۋنيۆەرسياداعا قىزۋ دايىندىق ءجۇرىپ جاتىر. كۇن سايىن شاڭعىدان, بياتلوننان دايىندالامىز, ءتۇرلى نورمالاردى ورىندايمىز. ءبىزدىڭ ۋنيۆەرسيتەتتەن 6 سپورتشى قازاقستان قۇراما كومانداسىنىڭ قۇرامىندا شاڭعى مەن بياتلوننان باق سىنايتىن بولامىز. قاسىمدا ەۆگەني بوندارەنكو, يۆان ۆاسيلەۆسكي, ۆيتالي پۋحگالو سەكىلدى تالاي جارىستا جۇلدەنى قانجىعاعا بايلاعان, تارامىس شاڭعىشىلار بار. تالاي جارىستاعى تاجىريبە كورسەتىپ جۇرگەندەي, توگىلگەن ماڭداي تەر تەككە كەتپەۋگە ءتيىس. ءبىز دە جانكۇيەرلەرىمىزدى جەلپىنتىپ, كوك تۋىمىزدى جەلبىرەتەر جەڭىستى كۇندەردى كۇتىپ ءجۇرمىز. نيكيتا تكاچەنكو, ا.بايتۇرسىنوۆ اتىنداعى قوستاناي مەملەكەتتىك ۋنيۆەرسيتەتى زاڭ فاكۋلتەتىنىڭ ماگيسترانتى, سپورت شەبەرى