ولجاس الەمىنە ساپار

الماتىداعى دوستىق ءۇيىنىڭ ءدوڭ­گە­لەك زالىندا قازاقستان حالقى اسسام­ب­لەيا­سىنىڭ قامقورلىعىمەن « ۇلى دالا ەلى – تاۋەلسىزدىكتىڭ 25 تۇعىرى» اتتى تاۋەلسىزدىكتىڭ 25 جۇلدىزدى كۇنىنىڭ اياسىندا قازاقستاننىڭ حالىق جازۋشىسى, اقىن, عالىم, قوعام قايراتكەرى ولجاس ومار ۇلى سۇلەيمەنوۆ تۋرالى «ولجاس ي يا» كىتابىنىڭ تۇساۋكەسەر ءراسىمى ءوتتى. «ولجاس ي يا» كىتابىنىڭ اۆتورى, «مادە­نيەت» حالىقارالىق قورىنىڭ كەڭەسشىسى, ساياساتتانۋشى ەرمەك الدانوۆ كىتاپقا كورنەكتى اقىن تۋرالى قۇندى ەستەلىكتەر كىرگەنىن جەتكىزدى. ياعني, اتالمىش كىتاپقا ولجاس ومار ۇلىن بىلەتىن, وقىرمانداردى «ءوز ولجاسىمەن» تانىستىرۋدى نيەت ەتكەن بەلگىلى تۇلعالاردىڭ وچەركتەرى, ەسسەلەرى, اڭگىمەلەرى ەنگەن. جيىندا ءسوز العان اۆتور ەرمەك الدانوۆ: «ولجاس ومار ۇلىنىڭ شىعارماشىلىق الەمىمەن قوسا, قازاق ەلىنە سىڭىرگەن ەڭبەگىن, قايراتكەرلىگىن, ۇلى دالانىڭ ءور تۇلپارىنداي ەركىن مىنەزىن, تۇلعالىق, رۋحاني بولمىسىنىڭ ەرەكشەلىكتەرىن وسى كىتاپقا ەنگەن جۇزگە جۋىق ەستەلىك ارقىلى تەرەڭنەن تاني تۇسەسىز. «ولجاس ي يا» كىتابىنان «ولجاس ي يا» اتتى الەمگە ساپار شەگىپ قايتقانداي اسەر الاتىنىڭىزعا سەنىمدىمىن. كىتاپتا لەبىز بىلدىرگەن ولجەكەڭنىڭ ۇزەڭگىلەس دوستارىن, رۋحاني باۋىرلارىن الىس-جاقىن شەتەلدەردەن ىزدەپ تابۋ دا وڭايعا سوققان جوق. دەگەنمەن, تالماي ىزدەنىستىڭ ارقاسىندا تەك جاقسى ەستەلىكتەرگە عانا ەمەس, سونىمەن قاتار, كونستانتين سيمونوۆتاي ايگىلى اقىننىڭ ولجاس ومار ۇلىنىڭ «از ي يا» كىتابىنا ارناپ شىعارعان, بىراق جارىق كورمەگەن تاماشا ولەڭىنە دە قول جەتكىزە الدىق. ول ولەڭ دە وسى كىتاپقا ەنىپ وتىر», – دەپ كىتاپتىڭ ماڭىزدىلىعىنا توقتالىپ ءوتتى. «كىتاپتان ءوز ەستەلىكتەرىمەن بولىسكەن جاقىن دوستارىمنىڭ, ارىپتەستەرىمنىڭ اسقان شىنايىلىعىمەن قوسا, ەرمەك الدان ۇلىنىڭ قايتپاس قاجىرلىلىعىن دا سەزىنگەندەي بولدىم» دەپ, ءسوزىن ازىلمەن باستاعان ولجاس ومار ۇلى قازىرگى ۋاقىتتا عىلىمي ەڭبەك جازۋ ۇستىندە ەكەنىن, بۇل كىتاپتىڭ وزىنە ۇلكەن شابىت بەرىپ, كوڭىلىن سەرپىلتىپ تاستاعانىن, نيەتتەس دوس-جاراندارىنىڭ ەستەلىكتەرى ارقىلى ءبىر ساتكە قىزىعى مول جاستىق شاققا دەگەن ساعىنىش لەبىنىڭ لاپ بەرگەنىن ايتىپ, كوڭىل تولقىنىسىمەن ءبولىستى, جينالعان قاۋىمعا العىسىن ءبىلدىردى. ميرا بايبەك, «ەگەمەن قازاقستان» الماتى