جەتىسۋ وڭىرىندە تاۋەلسىزدىك مەرەكەسىنە ارنالعان فورۋم ءوتتى

تالدىقورعاندا ەل تاۋەلسىزدىگىنىڭ 25 جىلدىعىنا ارنالعان سالتاناتتى فورۋم ءوتتى, دەپ حابارلايدى قازاقپارات. مەرەكەلىك شارادا مەملەكەتتىك ناگرادالار تاپسىرىلدى. قازاق ەلىنىڭ دامۋىنا, ءوڭىردىڭ وركەندەۋىنە ەڭبەگىمەن ۇلەس قوسقان ازاماتتارعا «پاراسات», «قۇرمەت» وردەندەرى, «ەرەن ەڭبەگى ءۇشىن», «شاپاعات» مەدالدارى بەرىلدى. سونداي-اق, «قازاقستان رەسپۋبليكاسىنىڭ تاۋەلسىزدىگىنە 25 جىل» مەرەكەلىك مەدالى مەن قۇرمەت گراموتالارى تاپسىرىلدى. ماراپاتتاردى وبلىس اكىمى اماندىق باتالوۆ تاپسىرسا, ءبىلىم جانە عىلىم ءمينيسترى ەرلان ساعاديەۆ ەلباسى اتىنان ءوڭىر باسشىسىنىڭ كەۋدەسىنە مەرەكەلىك مەدال تاقتى. ماراپاتتالعاندار قاتارىندا مەملەكەتتىك قىزمەتشىلەر, اۋىل شارۋاشىلىعى ەڭبەككەرلەرى, كاسىپكەرلەر, ۇستازدار مەن دارىگەرلەر بارلىعى 130-عا جۋىق ادام بار. جەكە توقتالار بولساق, «پاراسات» وردەنى قاراساي اۋدانىنىڭ اكىمى ماحاببات بيگەلديەۆ پەن «بن-ينۆەست» كومپانياسىنىڭ پرەزيدەنتى بولات نازارباەۆقا تاپسىرىلدى. كوكسۋ قانت زاۋىتىنىڭ ديرەكتورى التىنبەك اباتوۆ «قۇرمەت» وردەنىنىڭ يەگەرى اتاندى. «سارىبۇلاق» كومپانياسىنىڭ باسشىسى جەڭىس سمايىلوۆ, «ولكە تىنىسى» جشس ديرەكتورى, قازاقستاننىڭ قۇرمەتتى ءجۋرناليسى مەيرام ءجانادىلوۆ پەن بەلگىلى جۋرناليست الماتى وبلىستىق «جەتىسۋ» تەلەارناسىنىڭ باس ديرەكتورى بەيسەن قۇرانبەك «ەرەن ەڭبەگى ءۇشىن» مەدالىن الدى. ال 600-دەن استام بالانى باۋىرىنا باسقان تۇياق ەسقوجيناعا «شاپاعات» مەدالى بەرىلدى. سالتاناتتى جيىندا تۇڭعىش رەت 3د فورماتتا گرافيكالىق شوۋ كورسەتىلدى. ارنايى قويىلىمدا كونە داۋىردەن بەرگى قازاق ەلىنىڭ دامۋى كورىنىس الدى. مەرەكەلىك شارا قازاق ەستراداسى جۇلدىزدارىنىڭ گالا-كونتسەرتىمەن اياقتالدى.