تاۋەلسىزدىك جىلدارى ەلىمىزدە 13 تەننيس ورتالىعى اشىلدى

تاۋەلسىزدىك جىلدارى ەلىمىزدە 13 تەننيس ورتالىعى اشىلدى. بۇل تۋرالى تەننيستەن قازاقستان قۇراماسىنىڭ كاپيتانى دياس دوسقاراەۆ مالىمدەدى, دەپ حابارلادى baq.kz تiلشiسi. «ەلىمىز ساناۋلى كۇندەردەن كەيىن تاۋەلسىزدىكتىڭ 25 جىلدىعىن تويلاعالى وتىر. بۇل اتاۋلى مەرەكە. وسى 25 جىلدىڭ ىشىندە كوپتەگەن سپورت كەشەندەرى اشىلدى. مۇنىڭ ءبارى ەلباسىنىڭ سپورتقا دەگەن قامقورلىعىنىڭ ارقاسىندا جۇزەگە اسىپ جاتىر. مەن تەننيستىڭ ارقاسىندا الەمنىڭ بارلىق ەلىندە بولىپ شىقتىم. قازاقستاندا دا بۇل سپورتتىڭ دامۋىنا قولايلى مۇمكىندىكتەر بار. ۇلكەن تەننيسكە قىزىعاتىندار كوپ. 2012 جىلى العاش رەت قازاقستان تەننيسشىلەرى وليمپيادا ويىندارىنا قاتىسۋعا ليتسەنزيا جەڭىپ الدى. ءبىز ازىرگە جۇلدە الۋدى ارمانداي المايمىز. بىراق ءتورت جىلدىڭ باستى دوداسىنا قاتىسۋدىڭ ءوزى ۇلكەن جەتىستىك دەپ سانايمىن», – دەدى دياس دوسقاراەۆ. ونىڭ ايتۋىنشا, سوڭعى 10 جىلدىڭ ىشىندە 13 ايماقتا الەمدىك ستاندارتتارعا سايكەس تەننيس ورتالىعى اشىلدى. «تەك سولتۇستىك قازاقستان وبلىسىندا عانا اشىلعان جوق. كەلەسى جىلى قۇرىلىسى باستالادى. جاقىندا تاۋەلسىزدىكتىڭ 25 جىلدىعى قارساڭىندا اتىراۋدا جاڭا ورتالىق اشىلدى. ادامدار تەننيستى وسى ۋاقىتقا دەيىن بايلاردىڭ سپورتى دەپ ويلاپ كەلگەن ەدى. ەلىمىزدەگى ەڭ قىمبات قالا استانانىڭ وزىندە ءبىر ايداعى سەكتسيانىڭ قۇنى 15 مىڭنان اسپايدى. ونىڭ قاسىندا جەڭىل اتلەتيكا, ءجۇزۋ, گيمناستيكانىڭ باعالارى قىمبات. ال شىمكەنتتە 6 مىڭ تەڭگەدەن باستالادى», – دەدى قازاقستان قۇراماسىنىڭ كاپيتانى. دياس دوسقاراەۆ شەتەلدىكتەر مۇنداي باعانى ەستىگەندە تاڭعالاتىنىن ايتتى. وزگە ەلدەن كەلگەن تەننيسشىلەر, باپكەرلەر بىزدەگى باعانى دوللارمەن ەسەپتەپ كورىپ, ارزان دەپ جاتاتىن كورىنەدى. سەبەبى الەمنىڭ بىردە-ءبىر ەلىندە 30 دوللارعا تەننيس ويناۋ مۇمكىن ەمەس.