ەلباسى «قازاقستان رەسپۋبليكاسى تاۋەلسىزدىگىنىڭ جيىرما بەس جىلدىعىنا بايلانىستى راقىمشىلىق جاساۋ تۋرالى» زاڭعا جاريا تۇردە قول قويدى, دەپ حابارلادى akorda.lz.
نۇرسۇلتان نازارباەۆ راقىمشىلىق جاساۋ مەملەكەتتىڭ ىزگى نيەتىنىڭ كورىنىسى بولىپ سانالاتىنىن ايتتى.
"وتانداستارىمىزعا قاتىستى جاسالعان وسىناۋ كەشىرىم مەن مەيىرىم جانە ءۇمىت اكتىسى قوعامدى ساۋىقتىرۋعا مۇمكىندىك بەرەدى. راقىمشىلىق جاساۋ شاراسى الەۋمەتتىك تۇرعىدان وسال ادامداردى, اتاپ ايتقاندا, كامەلەتكە تولماعانداردى, جۇكتى جانە بالالارى بار ايەلدەردى, مۇگەدەكتەر مەن قارتتاردى قامتيدى", – دەدى قازاقستان پرەزيدەنتى.
مەملەكەت باسشىسى ەلىمىزدە تاۋەلسىزدىك جىلدارىندا 8 رەت راقىمشىلىق جاسالعانىن ايتتى.
"راقىمشىلىق 28 مىڭعا جۋىق ازاماتقا جاسالادى دەپ جوسپارلانىپ وتىر. بۇل – ەل تاۋەلسىزدىگىنىڭ مەرەيتويى قارساڭىنداعى ماڭىزدى ادامگەرشىلىك اكتسياسى", – دەدى ەلباسى.
نۇرسۇلتان نازارباەۆ تۇزەۋ مەكەمەلەرىنەن 1500 ادام بوساتىلىپ, سونىڭ 80%-ى پروباتسيا قىزمەتىنىڭ باقىلاۋىندا بولاتىنىن اتاپ ءوتتى.
"بۇلاردىڭ ءبارى – ءوز ازاماتتارىمىز. ولاردىڭ ءتۇزۋ جولعا ءتۇسىپ, قوعامنان ورنىن تابۋىنا مۇمكىندىك بەرۋ كەرەك. ءبارىمىز ولارعا كومەك كورسەتۋىمىز قاجەت. كەشىرىم جاسالعاندار ەندى زاڭسىزدىققا جول بەرمەيدى دەپ ۇمىتتەنەمىن", – دەدى قازاقستان پرەزيدەنتى.
سونداي-اق, مەملەكەت باسشىسى تاۋەلسىزدىك جىلدارىندا رەسپۋبليكامىزدا زاڭنامانى ىزگىلەندىرۋ جولىندا اۋقىمدى جۇمىس اتقارىلعانىن ايتتى.
