ابەل سانچەس: گولوۆكين سالماعىن كوتەرۋى مۇمكىن

گەننادي گولوۆكيننىڭ جاتتىقتىرۋشىسى ابەل سانچەس «ر-سپورت» سايتىنا بەرگەن سۇحباتىندا قازاقستاندىق بوكسشىنىڭ العا قويعان جوسپارى, ونىڭ جوعارى سالماق دارەجەسىنە كوتەرىلۋى, سونداي-اق مۇمكىن بولار قارسىلاستارى جونىندە اڭگىمەلەدى, دەپ حابارلادى vesti.kz. «گولوۆكيننىڭ 18 ناۋرىزدا وتەر جەكپە-جەگىن HBO تەلەارناسى تىكەلەي ەفيردەن كورسەتەدى. بىراق قارسىلاسى ءالى ناقتى جاۋابىن بەرمەدى. دەني دجەيكوبسپەن كەلىسسوزدەر ازىرگە ويداعىداي جۇزەگە اسىپ جاتىر. ول ورتا سالماقتاعى الەمنىڭ ەكىنشى ۇزدىك بوكسشىسى بولعاندىقتان بۇل كەزدەسۋ وتەدى دەگەن ۇمىتتەمىز. جەكپە-جەك بالكىم نيۋ-يوركتە ءوتىپ قالار. بۇل تيتۋلداردى قورعاۋ جەكپە-جەگى. سوندىقتان دا دجەيكوبس قالاماعاننىڭ وزىندە كەزدەسۋ ءوتۋى ءتيىس",- دەدى ول. گولوۆكيننىڭ ناقتى قارسىلاستارى بار ما دەگەن سۇراققا: «مەنىڭشە, ءدال وسى دجەيكوبس لايىقتى وپپونەنتتەردىڭ ءبىرى. سونداي-اق, بريتانيالىق بيللي دجو سوندەرس تە تاماشا بوكسشىلاردىڭ ءبىرى. GGG بارلىق تيتۋلدارىنىڭ باسىن بىرىكتىرگەننەن كەيىن ەكىنشى ورتا سالماققا كوشۋگە مۇمكىندىك الادى. ول جاقتا گولوۆكينمەن كەزدەسكىسى كەلەتىن چەمپيون بار. سالماعىن اۋىستىرعاننان كەيىن ءوزىنىڭ شاما-شارقىن انىقتايدى. ەگەر ۇناپ جاتسا, جارتىلاي اۋىر سالماققا دا اۋىسۋى مۇمكىن. ال ارى قاراي اندرەي ۋورد, سەرگەي كوۆالەۆ سىندى بىرقاتار سپورتشىلارمەن كۇش سىناسا الادى», – دەدى ول. سونىمەن قاتار, ساۋل الۆارەسپەن كەزدەسۋ ۇيىمداستىرۋ جايلى دا مالىمدەدى: «شىنىمدى ايتسام, بۇل تارتىستى ءوزىم دە اسىعا كۇتىپ ءجۇرمىن. وكىنىشكە وراي, بۇل ءبىزدىڭ كەلەسى جەكپە-جەگىمىز ەمەس. ەگەر دە بۇل جۇزەگە اسىپ جاتسا, بوكس تاريحىنداعى ۇزدىك باسەكە بولارى ءسوزسىز. الەم مۇنداي ايقاستى بۇرىن-سوڭدى كورمەگەن بولار ەدى», – دەدى سانچەس.