قىزىلوردادا كوپىر پايدالانۋعا بەرىلدى

13 جەلتوقسان كۇنى قىزىلوردادا قالانىڭ سول جاق جاعالاۋىن يگەرۋ باعدارلاماسى اياسىندا سالىنىپ جاتقان ءۇش كوپىردىڭ العاشقىسى سالتاناتتى تۇردە پايدالانۋعا بەرىلدى. قىزىلوردا وبلىسىنىڭ اكىمى قىرىمبەك كوشەرباەۆ تۇرعىنداردى ەل تاۋەلسىزدىگىنىڭ 25 جىلدىعىمەن جانە سىرداريانىڭ سول  جاعالاۋىنداعى جاڭا قالا قۇرىلىسىنىڭ باستالۋىمەن قۇتتىقتادى. - الداعى جىلدان باستاپ, ءبىز قالانىڭ سول جاق جاعالاۋىن كەشەندى تۇردە دامىتۋدى, ءىرى قۇرىلىس  نىساندارىن سالۋدى باستايمىز. قۇرىلىس اۋماعى 1500 گەكتاردان استام جەردى قامتيدى. اۋقىمدى جوبانى جۇزەگە اسىرۋ ماقساتىندا وبلىستىق شتاب قۇرىلدى. جاڭا قالا ساۋلەتىندە شىعىستىق ۇلگىگە باسىمدىق بەرىلەتىن بولادى. 11 شاعىن اۋدان, يندۋستريالدى ايماق جانە 3 ساياباق, سونداي-اق, حالىقتىڭ ساپالى ءومىر سۇرۋىنە قاجەتتى الەۋمەتتىك نىساندار, بيزنەس ورتالىقتارى, ساۋدا ورىندارى بوي كوتەرەتىن بولادى. ولاردىڭ ىشىندە 46 بالاباقشا, 23 مەكتەپ, ستۋدەنتتەر قالاشىعى, 2 كوپسالالى اۋرۋحانا, قارتتارعا ارنالعان پانسيونات ت.ب سالىنادى. سونىمەن بىرگە ۇلكەن تەاتر ارەناسى, ەتنوگرافيالىق مۋزەي, قورقىت اتا ينتەراكتيۆتى مۋزەيى, بالالار شىعارماشىلىعى سارايى, ساز مەكتەبى, تسيرك, دراما تەاترى, ستاديون, «قۇستار الەمى» ورانجەرەياسى جانە مەديا ورتالىق پەن دەمالىس ورىندارى ورنالاسادى. سول جاعالاۋ اۋماعىندا بولاشاقتا ءجۇز مىڭعا جۋىق ادام تۇراتىن بولادى,– دەدى وبلىس اكىمى ق.كوشەرباەۆ. ايتا كەتەيىك, سىرداريا وزەنى ارقىلى وتەتىن كوپىر قۇرىلىسى 2014 جىلى باستالدى. تاپسىرىس بەرۋشى وبلىستىق جولاۋشىلار كولىگى جانە اۆتوموبيل جولدارى باسقارماسى. مەردىگەر مەكەمە - «№ 25 ا.ريازانوۆ اتىنداعى كوپىر قۇرىلىسى وتريادى» جشس. كوپىردىڭ ۇزىندىعى - 387 مەتر, 4 جولاقتان تۇرادى, ارقايسىسىنىڭ ەنى – 3,5 مەتر. جۇك كوتەرۋ مۇمكىندىگى – 180 توننا.