ەلباسى: مەملەكەتتىك سىيلىق جاڭا بەلەستەرگە رۋحتاندىرادى

بۇگىن اقوردادا تاۋەلسىزدىكتىڭ 25 جىلدىعى قارساڭىندا مەملەكەتتىك سىيلىقتاردى تابىس ەتۋ شاراسى بولىپ ءوتتى. قازاقستان پرەزيدەنتى ءاربىر ماراپاتتىڭ ادامدى جاڭا ىستەرگە شابىتتاندىراتىنىن ايتتى. "بارلىعىڭىزدى ناگرادالارىڭىزبەن قۇتتىقتايمىن, شىن جۇرەكتەن قۇتتىقتايمىن جانە ساتتىلىك تىلەيمىن. ەل ۇلەسىڭدى, دارىنىڭدى اتاپ ءوتىپ جاتسا, مەنىڭشە, بۇل ءار ادامعا قۋانىش سىيلايدى, ءبىز ادامبىز, بىزگە مۇنداي كەرەك. بۇل ءبىزدى جاڭا بەلەستەرگە رۋحتاندىرادى, جاڭا ىستەرگە, جاڭا شىعارماشىلىق شەشىمدەردە شابىت اشادى, ەڭبەكتە دە. بۇگىن مەن جۇمىسشىلاردى ماراپاتتادىم, بۇل دەگەنىڭىز ەلىمىزدىڭ بارلىق ازاماتى بۇگىن-ەرتەڭ وردەندەر مەن مەدالدارمەن ماراپاتتالدى دەگەن ءسوز. سونىمەن قاتار, تاۋەلسىزدىكتىڭ 25 جىلدىعى ارنايى مەدالىمەن ماراپاتتالعان بارلىق قازاقستاندىقتى قۇتتىقتايمىن جانە كەلە جاتقان جارقىن مەرەكە تاۋەلسىزدىك كۇنىمەن قۇتتىقتايمىن", - دەدى نازارباەۆ. اقوردادا مەملەكەت باسشىسى قر مادەنيەت جانە سپورت ءمينيسترى ارىستانبەك مۇحامەدي ۇلىنا, قر دەنساۋلىق ساقتاۋ جانە الەۋمەتتىك دامۋ ءمينيسترى تامارا دۇيسەنوۆاعا, استانا اكىمى اسەت يسەكەشەۆكە مەملەكەتتىك سىيلىق تابىستادى. ماراپاتتالعانداردىڭ ىشىندە مەملەكەت باسشىسى قاراعاندى وبلىسىنىڭ اكىمى نۇرمۇحامبەت ابدىبەكوۆتى, اتىراۋ وبلىسىنىڭ اكىمى نۇرلان نوعاەۆتى, بالەت ءارتىسى التىناي اسىلمۇراتوۆانى, سكريپكاشى گاۋھار مىرزابەكوۆانى اتاپ ءوتتى.