بۇگىن ورالدا ەل تاۋەلسىزدىگىنىڭ 25 جىلدىعىنا وراي وقۋشىلار سارايى اشىلدى, دەپ حابارلايدى قازاقپارات.
ونىڭ اشىلۋ راسىمىنە وبلىس اكىمى التاي كولگىنوۆ, قر اقپارات جانە كوممۋنيكاتسيالار ءمينيسترى داۋرەن اباەۆ, بوكستان ريو وليمپياداسىنىڭ چەمپيونى دانيار مەن ونىڭ اكەسى ءارى باپكەرى مارات ەلەۋسىنوۆتەر قاتىستى.
«تاۋەلسىزدىگىمىزدىڭ تورقالى تويىنا وراي وبلىس ورتالىعىندا اسا ماڭىزدى الەۋمەتتىك جانە سپورتتىق نىسان – وقۋشىلار سارايى اشىلىپ وتىر. بۇل – ءوڭىر جاستارى مەن وقۋشىلارى ءۇشىن كوپتەن كۇتكەن ەرەكشە وقيعا. قازىرگى زامان تالاپتارىنا سايكەس سالىنعان ساۋلەتتى عيماراتتا جەتكىنشەك ۇرپاققا قوسىمشا ءبىلىم بەرۋ ءۇشىن بارلىق جاعداي جاسالعان. سونىمەن قاتار, باتىس قازاقستاننان تۇلەپ ۇشقان داڭقتى سپورتشىمىز دانيار ەلەۋسىنوۆ اتىنداعى بوكس ورتالىعىندا بالعىن جاستار جاتتىعىپ, ءوز شەبەرلىگىن شىڭدايتىن بولادى. ولاردىڭ اراسىنان دانيار سياقتى بولاشاقتا ەل نامىسىن قورعايتىن سپورتشىلار ءوسىپ شىعارىنا سەنىم مول», – دەدى التاي كولگىنوۆ.
وقۋشىلار سارايىندا كىتاپحانا, زەرتحانا, كورمە جانە كونتسەرت زالدارى, اسحانا, جەڭىل اتلەتيكا زالى, مۇز ايدىنى, پلانەتاري, وبسەرۆاتوريا, باسسەين جانە باسقا دا ورىندار بار. كەڭ زالدىڭ بىرىندە د.ەلەۋسىنوۆ اتىنداعى بوكس ورتالىعى ورنالاسقان. وسىندا وليمپيادا چەمپيونى ءوزىنىڭ العاشقى شەبەرلىك ساعاتىن وتكىزدى.
ونىڭ قۇرىلىسىنا 3 ميلليارد تەڭگە جۇمسالدى.
