جامبىل وبلىسىندا « ۇلى دالا ورنەكتەرى» اتتى كورمە اشىلدى

تاراز مەملەكەتتىك پەداگوگيكالىق ينستيتۋتىندا « ۇلى دالا ورنەكتەرى» اتتى شىعارماشىلىق جۇمىستاردىڭ كورمەسى اشىلدى, دەپ حابارلايدى قازاقپارات. تاۋەلسىزدىكتىڭ 25 جىلدىعى مەن تاراز مەملەكەتتىك پەداگوگيكالىق ينستيتۋتىنىڭ 50 جىلدىعى قارساڭىندا ۇيىمداستىرىلىپ وتىرعان كورمەگە اتالعان وقۋ ورنىنىڭ پروفەسسور-وقىتۋشىلارى مەن ستۋدەنتتەرىنىڭ كارتينالارى مەن قولونەر بۇيىمدارى قويىلعان. كورمەنىڭ نەگىزگى ماقساتى – كوپشىلىكتىڭ بەينەلەۋ ونەرىنە كوركەم قۇندىلىق تۇرعىسىنداعى كوزقاراسىن قالىپتاستىرۋ جانە سۋرەتشىلەر اراسىندا تاجىريبە الماسۋ. سونىمەن قاتار, جەرگىلىكتى قىلقالام شەبەرلەرىن قولداۋ جانە كاسىبي بەينەلەۋ ونەرىن ناسيحاتتاۋ, تاۋەلسىز مەملەكەتىمىزدىڭ بولاشاق جاس ۇرپاقتارىن كوركەم ءبىلىم نەگىزدەرى مەن كاسىبي باعىتتاعى شىعارماشىلىق ونەر تۇرلەرىمەن تانىستىرا وتىرىپ, جاس تۇلعانىڭ بويىنا مادەني كوركەم قۇندىلىقتاردى ءسىڭىرۋ جانە كوركەم ەستەتيكالىق تاربيە بەرۋ بولىپ تابىلادى. «بيىلعى جىلى ەلىمىز تاۋەلسىزدىگىنىڭ 25 جىلدىعىن اتاپ وتۋدە. بۇل ايشىقتى كەزەڭ ءبىزدىڭ سارا جول تاڭداپ, بەرەكەنىڭ بەلەسىنە بەتتەگەنىمىزدى دالەلدەپ بەردى. ءاربىر ازاماتىن بالاسىنداي باۋىرىنا باسقان ىستىق وتانىمىزدىڭ گۇلدەنۋىنە جول اشتى. حالقىمىزدىڭ اتىن الەمگە ايگىلەپ, مارتەبەسىن ءوسىردى. حالقىمىزدا «وتكەنىن ۇمىتقان وشكەندىكتىڭ بەلگىسى, وتكەنىن ەسكە العان وسكەندىكتىڭ بەلگىسى» دەگەن قاناتتى ءسوز بار. مىنە, بۇل تۇرعىدا وسى تاقىلەتتەس شارالاردىڭ ماڭىزى زور ەكەندىگى بەسەنەدەن بەلگىلى», – دەيدى ءىس-شارانى ۇيىمداستىرۋشىلار. كورمەدە بەينەلەۋ ونەرىنىڭ ناتيۋرمورت, پەيزاج, پورترەت سىندى جانرلارىندا سالىنعان 50-دەن استام جۇمىس قويىلعان. ونەر تۋىندىلارىندا اۆتورلاردىڭ جۇرەك جىلۋى مەن ونەرگە دەگەن ماحابباتى, ەگەمەندىك جىلدارىنداعى قازاقستاننىڭ جەتكەن جەتىستىكتەرى كەڭىنەن ورىن العان. كورمەگە قويىلعان ونەر تۋىندىلارى ەكى اپتا بويى تاراز قالاسىنىڭ تۇرعىندارى مەن قوناقتارىنىڭ نازارىنا ۇسىنىلماق.