ءبىر كۇندە ءۇش الەۋمەتتىك نىسان اشىلدى

ەل تاۋەلسىزدىگىنىڭ 25 جىلدىعى قارساڭىندا شىعىسقازاقستاندىقتاردىڭ يگىلىگىنە كوپتەگەن الەۋمەتتىك نىساندار پايدالانۋعا بەرىلۋدە. ارينە, باسىم بولىگى – مەكتەپتەر مەن بالاباقشالار جانە ەمدەۋ مەكەمەلەرى سىندى الەۋمەتتىك نىساندار. سونىڭ ىشىندە سەمەي قالاسىنداعى نازارباەۆ زياتكەرلىك مەكتەبىنىڭ جاڭا عيماراتى مەن سپورت اكادەمياسىنىڭ اشىلۋىن, سونداي-اق وسكەمەن قالاسىنداعى مۇمكىندىگى شەكتەۋلى بالالارعا ارنالعان "اقنيەت" مەكتەپ-ينتەرناتىنىڭ پايدالانۋعا بەرىلۋىن ايرىقشا اتاپ وتۋگە بولادى.

نازارباەۆ زياتكەرلىك مەكتەبى

سەمەيدە فيزيكا-ماتەماتيكا باعىتىنداعى نازارباەۆ زياتكەرلىك مەكتەبىنىڭ جاڭا عيماراتى پايدالانۋعا بەرىلدى. بارلىعى 720 وقۋشىعا ەسەپتەلگەن ءبىلىم ورداسىندا بالالاردىڭ شىعارماشىلىق جانە زەرتتەۋشىلىك مۇمكىندىكتەرىن دامىتۋعا, ءۇشتىلدى ورتا قالىپتاستىرۋعا, سىني جانە زاماناۋي ويلاۋعا ماشىقتاندىراتىن جاعدايدىڭ بارلىعى جاسالىپ وتىر. مەملەكەت باسشىسىنىڭ باستاماسىمەن دۇنيەگە كەلگەن بىرەگەي ءبىلىم بەرۋ جوباسىنا تيەسىلى جاڭا نىساننىڭ تاۋەلسىزدىك مەرەكەسى قارساڭىندا سالتاناتتى تۇردە اشىلۋى سەمەيلىكتەردىڭ قۋانىشىن ەسەلەي ءتۇستى. "قاراعايلى" ىقشاماۋدانىندا ورنالاسقان مەكتەپتىڭ قۇرىلىسى 2 جارىم جىل بويى جۇرگىزىلدى. جالپى اۋدانى 23 مىڭ شارشى مەتردەن اساتىن ءۇش قاباتتى عيماراتتىڭ ساۋلەتى كوز تارتارلىقتاي كورىكتى. بۇل جوبانىڭ ەرەكشەلىگى – اۋىلدىق وكرۋگتەردەن كەلگەن تالانتتى بالالارعا ارنالعان جاتىن ورىن وقۋ كورپۋسىمەن قوسىلعان. بۇگىندە مەكتەپتە وبلىستىڭ تۇكپىر-تۇكپىرىنەن كەلگەن 645 بالا ءبىلىم الادى. وقۋشىلاردىڭ مۇمكىندىگىن دامىتۋ ماقساتىندا حيميا جانە فيزيكا پاندەرىنىڭ زەرتحانالارى, نانوتەحنولوگيا, بيوتەحنولوگيا, روبوت تەحنيكاسى جانە ونەر كابينەتتەرى, كىتاپحانا, ءماجىلىس زالى, دەنەشىنىقتىرۋ-سپورت بەلدەۋى سىندى سوڭعى ۇلگىدەگى زاماناۋي تەحنيكالارمەن جاراقتاندىرىلعان اۋديتوريالار بار. مەكتەپ ديرەكتورى باعدان قايىرجانوۆتىڭ ايتۋىنشا, وقۋ ۇدەرىسى كەمبريدج حالىقارالىق ەمتيحاندىق كەڭەسىمەن بىرگە جاسالعان ءبىلىم بەرۋ باعدارلاماسى بويىنشا جۇرگىزىلەدى. وقىتۋشىلار قۇرامى "بولاشاق" باعدارلاماسى بويىنشا تاجىريبەدەن وتكەن 122 پەداگوگتان تۇرادى. سىني تۇرعىدان جانە جاڭاشا ويلاۋدى دامىتۋ ءۇشىن وقۋشىلار يننوۆاتسيالىق كۋرستارعا قاتىسادى. وقۋشىلاردى حالىقارالىق ەمتيحاندار تاپسىرۋعا دايىنداۋدى كوزدەيتىندىكتەن باسىنان باستاپ «IELTS», «SET» ەلەكتيۆتى كۋرستارىن وقىتادى.

سپورت اكادەمياسى

2015 جىلدىڭ كۇزىندە سەمەيدە 200 ورىندىق سپورت ينتەرناتى مەن اسحانا جانە كۇرەس زالى عيماراتىنىڭ قۇرىلىسى باستالعان بولاتىن. بۇل نىسان شاھارداعى №1 بالالار مەن جاسوسپىرىمدەر سپورت مەكتەبىنىڭ قاسىنان بوي كوتەردى. قۇرىلىستى اياقتار كەزدە بارلىق ءۇش نىساندى قوسىپ, سپورت اكادەمياسىن قۇرۋ تۋرالى شەشىم قابىلداندى. مىنە, وسى جاڭا نىساننىڭ اشىلۋىنا ءوڭىر باسشىسى دانيال احمەتوۆ, وليمپيادا چەمپيونى و.رىپاكوۆا جانە سپورتتى قولداۋعا ءازىر قالا تۇرعىندارى قاتىستى. اكادەميانىڭ نەگىزگى قىزمەتى ءوڭىردىڭ بارلىق اۋداندارى مەن قالالارىنان دارىندى سپورتشىلاردى ىرىكتەپ, ولاردى دزيۋدو, سامبو, گرەك-ريم جانە ەركىن كۇرەس بويىنشا دايارلاۋ. سونداي-اق بۇعان دەيىن بولعان 11 سەكتسيا دا ءوز جۇمىسىن جالعاستىرادى. ىرىكتەۋدەن وتكەن بالالار بارلىق جاعداي جاسالعان ينتەرناتتا تەگىن تۇرادى. جاس سپورتشىلار قاجەتتى سپورتتىق جابدىقتارمەن, قۇرالدارمەن, وقۋلىقتارمەن, تەگىن تاماقپەن جانە ءىسساپار شىعىندارىمەن قامتاماسىز ەتىلگەن. قازىرگى كەزدە رەسپۋبليكالىق جانە وبلىستىق جارىستاردىڭ جەڭىمپازدارى مەن جۇلدەگەرلەرىنەن العاشقى شاكىرتتەر ىرىكتەلىپ الىندى. بالالارعا وقۋ-جاتتىعۋ جۇمىستارىن جۇرگىزۋگە حالىقارالىق دارەجەدەگى سپورتشىلاردى دايارلاعان رەسەي, موڭعوليا جانە ازەربايجان ەلدەرىنىڭ جوعارى ساناتتى ماماندارى شاقىرىلدى. اكادەميا جەتەكشىلەرىنىڭ ايتۋىنشا, ىرىكتەۋ كەزەڭى وبلىس اۋماعىنداعى 10-18 جاس ارالىعىنداعى وقۋشىلار اراسىندا جۇرگىزىلەدى. ءار وقۋشىنىڭ سپورتتىق جەتىستىگىنىڭ بولۋى قاتاڭ قاداعالانادى. ياعني, ۇمىتكەر رەسپۋبليكالىق جانە وبلىستىق جارىس جەڭىمپازى نەمەسە جۇلدەگەرى بولۋى ءتيىس. ينتەرناتتا وليميپيادالىق سپورت تۇرلەرىن دايارلاۋعا باسىمدىق بەرىلگەندىكتەن بۇل مىندەتتى. ايتا كەتۋ كەرەك, تاۋەلسىزدىك جىلدارىندا وڭىردە سپورتپەن جانە دەنە شىنىقتىرۋمەن جۇيەلى تۇردە شۇعىلدانۋشىلار سانى 30,3 پايىزعا دەيىن ارتىپ, 420 مىڭنان استام ادامدى قۇراپ وتىر. وبلىس اۋماعىندا 3149 سپورتتىق قۇرىلىم جۇمىس ىستەسە, ونىڭ ىشىندە 30 دەنە-شىنىقتىرۋ-ساۋىقتىرۋ كەشەنى بار.

"اقنيەت" مەكتەبى

ەندى ءوڭىردىڭ قالالارى مەن اۋداندارىنان كەلگەن مۇمكىندىگى شەكتەۋلى 100 بالا "اقنيەت" ينتەرناتىندا تۇرىپ, ەمدەلىپ, وقي الادى. ياعني, كورۋ, ەستۋ جانە تىرەك-قيمىل جۇيەسىندە كىناراتى بار بالالار وسكەمەن قالاسىنىڭ اتالعان مەكەمەگە جاقىن ورنالاسقان مەكتەپتەرى مەن كوللەدجدەرىندە ءبىلىم الماق. ولار وقۋدى بىتىرگەن ساتتە بەلگىلى ءبىر ماماندىققا يە بولادى. جاڭا نىساننىڭ ەلىمىزدە بالاماسى جوق. بىلتىر كۇزدە قۇرىلىسى باستالعان الەۋمەتتىك مەكەمەنىڭ اشىلۋىنا قاتىسقان ءوڭىر باسشىسى د.احمەتوۆ: – ءبىز مەكتەپ-ينتەرناتتى اشا وتىرىپ, مەملەكەت باسشىسىنىڭ بارلىق بالالاردىڭ مۇمكىندىگى تەڭ بولۋى ءتيىس دەگەن تاپسىرماسىن ورىنداپ وتىرمىز. بۇل نىساننىڭ ارقاسىندا ايرىقشا قاراۋدى قاجەت ەتەتىن بالالار ءوز قاتارلارىمەن بىرگە مەكتەپتەردە ءبىلىم الادى. ولاردى قاتار قۇربىلارى قولدايتىنىنا سەنەمىن. سونىمەن بىرگە ينتەرنات قابىرعاسىندا دەنساۋلىعىن تۇزەۋىنە مۇمكىندىك بار. ويتكەنى بۇل ساناتتاعى بالالارعا اتا-انالارىنىڭ شەكسىز مەيىرىمى مەن ماحابباتى بولعانىنا قاراماستان, ولار كاسىبي كومەك پەن مەديتسينالىق كۇتىمدى تولىعىمەن كورسەتە المايتىنى انىق. مەكتەپ-ينتەرناتتا 8 ماماندىق بويىنشا وقىتىلادى. بالالار قوعامنىڭ ورتاسىندا بولۋى كەرەك. ءبىز كەلەشەكتە ولاردىڭ جەتىستىكتەرىنە قۋاناتىن بولامىز, – دەدى. ەرەكشە بالالاردىڭ اتا-انالارى كوپتەن كۇتكەن ارماندارىنىڭ ورىندالعانىن ايتادى. سەبەبى, بۇعان دەيىن ۇيگە قامالىپ كەلگەن بالالار قوعاممەن قارىم-قاتىناس جاساۋعا مۇمكىندىك الىپ وتىر. – "اقنيەت" مەكتەپ-ينتەرناتىنىڭ اشىلعانىنا قۋانىشتىمىز. ويتكەنى, وسى ارادان اسا الىس ەمەس №15 مەكتەپكە بارا باستادىق. قىزىم ايرىقشا قۋانىپ ءجۇر. بىرتىندەپ ادامداردىڭ كوپ شوعىرىنا ۇيرەنە باستادى. بۇل – ەلباسىنىڭ قامقورلىعى دەپ بىلەمىز, – دەيدى اتا-انالاردىڭ ءبىرى اسەمگۇل كەمشىباەۆا. وقۋشىلار مەكتەپ-ينتەرناتتا لوگوپەد, تيفلو-سۋردوپەداگوگ, دەفەكتولوگ جانە باسقا دا ارنايى مامانداردان كەشەندى ەم الادى. بالالاردى ساتىمەن الەۋمەتتەندىرۋ ينتەرنات قابىرعاسىندا ەمەس, جاقىن جەردەگى مەكتەپتەردە جۇرگىزىلەدى. ءبىلىم وردالارىنىڭ ءبىرى تىرەك-قيمىل جۇيەسى بۇزىلۋىنان زارداپ شەگۋشى بالالاردى وقىتۋ ماقساتىندا ارنايى جابدىقتالدى. ال ماماندىقتى جوعارى سىنىپقا كەلگەن كەزدە ينتەرنات قاسىنداعى كوللەدجدەردەن الادى. كەلەشەكتە كومپيۋتەرلىك مودەلدەۋ وپەراتورى, باعدارلاماشى, اۋدارماشى, كىتاپحاناشى نەمەسە ەسەپشى بولۋى مۇمكىن. ينتەرناتتاعى 10-11 سىنىپ وقۋشىلارى ءۇشىن قىسقا مەرزىمدى كاسىپتىك كۋرستار ۇيىمداستىۋ جوسپارلانعان. ايتا كەتۋ كەرەك, ينتەرنات وقۋشىلارى مۇمكىندىگى شەكتەۋلى جاندارعا ارنالعان حالىقارالىق "ابيليمپيكس" قوزعالىسىنا قاتىسىپ, كاسىبي شەبەرلىك بايقاۋلارىندا باق سىنايتىن بولادى. دۋمان اناش, "ەگەمەن قازاقستان". شىعىس قازاقستان وبلىسى.