قازاقستاندا شەتەلدىك ينۆەستيتسيانىڭ رەكوردتىق كولەمى تىركەلدى

IV «Almaty Invest-2016» حالىقارالىق فورۋمىنا قاتىسۋ ءۇشىن, الماتىعا 63 مەملەكەتتەن بيزنەسمەندەر مەن ەكونوميكالىق ساراپشىلار جينالدى. بارلىعى 500-دەن اسا قاتىسۋشى كەلدى. ولاردىڭ اراسىندا بىلىكتى ساياساتكەرلەر, جەتىستىككە جەتكەن وتاندىق ءارى شەتەلدىك بيزنەسمەندەر, حالىقارالىق ۇيىمداردىڭ باسشىلارى بار, دەپ حابارلايدى palata.kz. بۇل فورۋم بيلىك, بيزنەس, قوعام اراسىندا پىكىر الماسۋعا مۇمكىندىك بەرەتىن اشىق الاڭ. ءبارى ءبىر اۋىزدان ەلدەگى تۇراقتىلىق پەن بيزنەسكە كورسەتىلىپ جاتقان بەلسەندى قولداۋلار قازاقستانعا الەمنىڭ ءار تاراپىنان ينۆەستيتسيا قۇيۋعا جول اشادى دەدى. قر ۇلتتىق بانك توراعاسى دانيار اقىشەۆتىڭ ايتۋىنشا, بيىل قازاقستانعا قۇيىلعان شەتەلدىك ينۆەستيتسيانىڭ كولەمى رەكوردتىق كورسەتكىشكە جەتكەن. «سوڭعى توعىز ايدىڭ ناتيجەسى بويىنشا شەتەلدىك كومپانيالار ءبىزدىڭ ەلدىڭ ەكونوميكاسىنا 12,1 ميلليارد دوللار قارجى قۇيدى. مۇنايدىڭ باعاسى تۇسكەنىمەن, ەلدە ءجىو كورسەتكىشى ءوسىپ كەلەدى, قازىرگى تاڭدا ول 0,4 پايىزعا تەڭ», – دەدى دانيار اقىشەۆ ءوزىنىڭ فورۋمدا سويلەگەن سوزىندە. الماتى قالاسىنىڭ اكىمى باۋىرجان بايبەك قالادا ينۆەستورلارعا قىزمەت كورسەتەتىن ورتالىق جۇمىس ىستەيتىنىن ايتىپ ءوتتى. ول قازىرگى كەزدە ينۆەستيتسيالىق ومبۋدسمەن لاۋازىمىن ەنگىزۋ قاراستىرىلىپ جاتقانىن حابارلادى. «الماتىدا 183 مىڭ شاعىن جانە ورتا كاسىپورىن بار. ولاردىڭ 14 مىڭى شەتەلدىك ينۆەستيتسيانىڭ قاتىسۋىمەن جۇمىس ىستەپ جاتىر. الماتى – جەكە بيزنەس پەن شيكىزاتتىق ەمەس ەكونوميكالىق كاپيتالدىڭ قالاسى, ول ەل ەكونوميكاسىنىڭ بەستەن ءبىر بولىگىن قۇرايدى», – دەپ اتاپ ءوتتى ءوز سوزىندە باۋىرجان بايبەك. ينۆەستيتسيا جانە دامۋ مينيسترلىگىنىڭ اقپاراتىن سەنسەك, كەن قازۋ سەكتورىنا قاتىسى جوق ينۆەستورلارعا 283 قىزمەت ءتۇرى بويىنشا, ەلگە اكەلەتىن قۇرال-جابدىقتارعا كەدەندىك الىم تولەۋدە بىرقاتار جەڭىلدىكتەر جاساۋ جانە جەردى جەڭىلدىكپەن بەرۋ قاراستىرىلعان. ونىڭ ۇستىنە ينۆەستورلار ۇجىمدىق تابىس سالىعىنان, مەنشىك پەن جەر سالىعىنان بوساتىلىپ, جاڭا ەكسپورتتىق تاۋارعا 30% وتەماقى الا الادى. IV «Almaty Invest-2016» حالىقارالىق فورۋمى اياسىندا سوماسى 300 ملرد تەڭگەنى قۇرايتىن 53 مەموراندۋمعا قول قويىلدى.