ەنەرگەتيكالىق قاۋىپسىزدىكتى قامتاماسىز ەتۋ ماڭىزدى

«نۇرلى جول» مەملەكەتتىك باعدارلاماسى اياسىندا «KEGOC» اكتسيونەرلىك قوعامى سولتۇستىك-شىعىس-وڭتۇستىك باعىتىندا ۇلتتىق ەلەكتر جەلىسىنىڭ ترانزيتتىك الەۋەتىن ارتتىرۋعا, شىعىس قازاقستان مەن وڭتۇستىك وڭىرلەردە ەلەكترمەن جابدىقتاۋدىڭ سەنىمدىلىگى مەن تۇراقتىلىعىن قامتاماسىز ەتۋگە جانە اتالعان ايماقتاردا ەلەكتر قۋاتى جەتىسپەۋشىلىگىنىڭ ورنىن تولتىرۋعا مۇمكىندىك بەرەتىن كەڭ اۋقىمدى ينۆەستيتسيالىق جوبانى جۇزەگە اسىرۋدا. بۇرناعى كۇنى وتكەن رەسپۋبليكالىق تەلەكوپىر اياسىندا مەملەكەت باسشىسى «KEGOC» اق-تىڭ باسقارما توراعاسى باقىتجان قاجيەۆكە وسى اۋقىمدى جوبا شەڭبەرىندە «ەكىباستۇز – ءشۇلبى گەس (سەمەي) – وسكەمەن» باعىتىمەن وتكىزىلگەن جاڭا جوعارى ۆولتتى جەلىلەردى ىسكە قوسۋعا پارمەن بەرگەن بولاتىن. ورتالىق كوممۋنيكاتسيالار قىزمەتىندە وتكەن ءباسپاسوز كونفەرەنتسياسىندا ەنەرگەتيكا مينيسترلىگى ەلەكتر ەنەرگەتيكاسى دەپارتامەنتىنىڭ ديرەكتورى باۋىرجان سارسەنوۆ جاڭا ەلەكتر جەلىلەرىنىڭ قۇرىلىس جۇمىستارى, قىزمەتى مەن ماڭىزى جونىندە اڭگىمەلەپ بەرى. دەپارتامەنت ديرەكتورى «سولتۇستىك-شىعىس-وڭتۇستىك 500 كۆ ەج سالۋ» كەڭ اۋقىمدى ينۆەستيتسيالىق جوباسى ەكى كەزەڭگە ءبولىنىپ جۇزەگە اسىرىلىپ جاتقانىن اتاپ ءوتتى. «500 كۆ جانە 220 كۆ ەلەكتر جەتكىزەتىن 700 شاقىرىم جەلىلەر, سونداي-اق, 500 كۆ «سەمەي», 500 كۆ «وسكەمەن» جانە 1150 كۆ «ەكىباستۇز» قوسالقى ستانسالارى سولتۇستىكتە وندىرىلەتىن ەلەكتر ەنەرگيا­سىن قازاقستاننىڭ شىعىس وڭىرلەرىنە جەتكىزەتىن بولادى», – دەدى ب.سارسەنوۆ. ول سونداي-اق, جوبانىڭ ەل ەكونوميكاسىن دامىتۋ ءۇشىن اسا ماڭىزدى ەكەنىنە توقتالدى. «شىعىس قازاقستان وبلىسىنىڭ تۇتىنۋشىلارى وسى ۋاقىتقا دەيىن رەسەي بەج جەلىلەرى ارقىلى وتەتىن جانە ءوڭىردى ەنەرگيا جۇيەسىمەن جالعايتىن جەلىلەردى قولدانىپ كەلسە, ەندى جاڭا جەلىلەر ارقىلى ەلەكتر ەنەرگياسىمەن قامتاماسىز ەتىلەتىن بولادى. بۇل ەلىمىزدىڭ ەنەرگەتيكالىق قاۋىپسىزدىگىن قامتاماسىز ەتۋ جاعىنان كەلگەندە اسا ماڭىزدى», – دەدى دەپارتامەنت ديرەكتورى. ول قۇرىلىستىڭ ەكىنشى كەزەڭى – «500 كۆ ءشۇلبى گەس (سەمەي) – اقتوعاي – تالدىقورعان – الما سالۋ» جوباسى كەستەگە سايكەس جۇرگىزىلىپ جاتقانىن جەتكىزدى. «بۇل جوبانى اياقتاۋ بىرقاتار ماسەلەلەردى شەشۋگە مۇمكىندىك بەرەدى. ناقتى ايتقاندا, شىعىس ءوڭىرىنىڭ قازاقستاننىڭ ءبىرتۇتاس ەلەكتر ەنەرگەتيكالىق جۇيەسىمەن بايلانىسىن كۇشەيتەدى, سولتۇستىك-وڭتۇستىك باعىتىنداعى ترانزيتتىك الەۋەتتى ارتتىرادى, شىعىستاعى وزەندەردىڭ الەۋەتىن يگەرۋگە جول اشادى. بۇل ءوز كەزەگىندە, جاڭارتىلاتىن ەنەرگيا كوزدەرىن دامىتۋ ساياساتى اياسىندا ماڭىزدى رولگە يە, – دەپ اتاپ ءوتتى ب.سارسەنوۆ. – بۇدان بولەك, جوبانى جۇزەگە اسىرۋ بارىسىندا تاۋ-كەن ونەركاسىبىنىڭ ەلەكتر ەنەرگياسىنا دەگەن سۇرانىستى قامتاماسىز ەتۋگە مۇمكىندىك بەرەتىن اقتوعاي ەنەرگيا تورابىندا 500 كۆ «اقتوعاي» قوسالقى ستانساسى سالىنادى. سونداي-اق, «اقتوعاي – الماتى», «اقتوعاي – دوستىق», «اقتوعاي – مويىنتى» باعىتتارى بويىنشا تەمىر جول ۋچاسكەلەرىن ەلەكترلەندىرۋگە مۇمكىندىك تۋادى». ايدار ورىسباەۆ, «ەگەمەن قازاقستان»