ەلەۋسىنوۆ پەن دىچكو اقپان ايىندا MJA Entertainment كومپانياسىمەن كەلىسىمشارتقا قول قويعان. ول كەزدە اۆستراليالىق پروموۋتەر مايك التامۋرا قازاقستاندىق بوكسشىلاردىڭ كاسىپقوي بوكستاعى دەبيۋتى مامىر ايىندا قىتايدا وتەتىنىن حابارلاعان.
بىراق 19 مامىردا ەلەۋسىنوۆ پەن دىچكو MJA Entertainment كومپانياسىمەن اراداعى كەلىسىمشارتتى بۇزدى. ريو وليمپياداسىنىڭ چەمپيونى دانيار اۋەسقوي بوكسقا قايتىپ ورالۋعا مۇمكىندىگىن دە ايتىپ قالدى. ءوز كەزەگىندە ەكى رەت وليمپيادا ويىندارىنىڭ قولا جۇلدەگەرى اتانعان يۆان دىچكونىڭ اۋەسقوي بوكسقا ورالار ويى جوق.
سانتوس-روسساريونىڭ سوزىنە سەنسەك, ەلەۋسىنوۆ پەن دىچكونىڭ اقش پروموۋتەرلەرىمەن جۇمىس ىستەۋى مۇمكىن. بۇعان دەيىن اۆستراليالىق مەنەدجەرلەر قازاقستاندىق بوكسشىلاردى اتاقتى رەسەيلىك سەرگەي كوۆالەۆتىڭ باپكەرى سانتوس-روسساريو جاتتىقتىرادى دەپ جوسپارلاعان.
"العاشقى پروموۋتەرلىك كومپانيامەن كەلىسىمنىڭ ىسكە اسپاي قالعانى راس. دەگەنمەن, جاقىندا ءبىر بوكسشىنى فلوريداداعى ۇجىممەن كەزدەسۋگە اپارعان ەدىم. ول جەردە ءبىزدىڭ وليمپيادا جۇلدەگەرلەرىمىزدىڭ جاعدايىن سۇرادى. مەن بولعان جاعدايدى مەنەدجەر ەلۆيسۋ كرەسپوعا ءتۇسىندىردىم. ەندى كەزدەسۋگە كەلىسىپ وتىرمىز.
شىنىندا اتالمىش كومپانيا ءبىزدىڭ بىردەن ولارعا كەلمەگەنىمىزگە رەنىشتەرىن ءبىلدىردى. بۇگىن تۇستە (امەريكا ۋاقىتىمەن) يۆان مەن دانياردىڭ جاعدايىن تالقىلايتىن جينالىس وتەدى", دەيدى سانتوس-روسساريو.
ول سونداي-اق, كەلىسسوزدەر ءساتتى اياقتالعان جاعدايدا بوكسشىلار بىردەن جاتتىعۋعا كىرىسىپ كەتەتىنىن مالىمدەدى.
"ولاردىڭ ايتۋىنشا, جاتتىعۋعا بىردەن كىرىسىپ كەتەدى. ەگەر ءبارى ءساتتى وتسە, جىگىتتەر جوسپار بويىنشا شىلدە ايىندا كاسىپقوي بوكستاعى دەبيۋتىن وتكىزەدى. ارينە, بۇل جەردەگى مەنىڭ ۇلەسىم بوكسشىلاردىڭ جەكپە-جەككە دايىن ەكەنىن حابارلاپ, قارسىلاسىنا رۇقسات بەرۋ", - دەيدى سانتوس-روسساريو vesti.kz باسىلىمىنا بەرگەن سۇxباتىندا.
ايتا كەتەيىك, ەلەۋسىنوۆكە ەكى مارتە Top Rank بوب ارۋم پروموۋتەرلىك كومپانياسى كەلىسىمشارت ۇسىنعان بولاتىن. بۇل كومپانيانىڭ كليەنتتەرىنىڭ قاتارىندا فيليپپيندىك مەنني پاكياو, ۋكراينالىق ۆاسيلي لوماچەنكو جانە امەريكالىق تەرەنس كروۋفورد بار.
ايساۋلە سەزبەك
