بىرىككەن اراب امىرلىكتەرىنىڭ Cىرتقى ىستەر جانە حالىقارالىق ىنتىماقتاستىق ءمينيسترى شەيح ابداللا بەن زايد ءال-ناحاياننىڭ ايتۋىنشا, جىل سايىن اراب ەلىنە قازاقستاننىڭ 100 مىڭعا جۋىق ازاماتى بارىپ قايتادى. ولار ۆيزالىق تالاپتار الىپ تاستالعاننان كەيىن بۇل كورسەتكىش ەكى ەسە كوبەيەدى دەگەن نيەتتە.
«قول قويىلعان قۇجاتتى ىسكە اسىرۋ بويىنشا مەملەكەتتىك ىشكى پروتسەدۋرالار ءبىر-ەكى ايدا اياقتالادى دەپ ۇمىتتەنەمىز. قۇجات كۇشىنە ەنگەن سوڭ, قازاقستاندىقتار ءباا-عا ساپارلارى بارىسىندا 10 ملن دوللارعا دەيىن ۇنەمدەيتىن بولادى», – دەپ جازدى ءانۋار جايناقوۆ.
ونىڭ ايتۋىنشا, بۇگىنگى تاڭدا وتانداستارىمىز ءباا-گە ۆيزا الۋ ءۇشىن شامامەن 100 دوللار جۇمسايدى.
سونداي-اق ءسىم ءباسپاسوز قىزمەتىنىڭ باسشىسى جاقىندا جاپونيا بيلىگىنىڭ قازاقستان ازاماتتارىنا ەلگە ۆيزا الۋ ءۇشىن تالاپتاردى جەڭىلدەتكەنىن اتاپ ءوتتى.
«قازاقستاندىق ديپلوماتتار تايلاندپەن, يزرايلمەن, قحر ارنايى اكىمشىلىك ايماعى ماكاومەن, سونىمەن قاتار دومينيكان رەسپۋبليكاسى, كوستا-ريكا جانە فيدجي سەكىلدى ەكزوتيكالىق مەملەكەتتەرمەن دە ۆيزا تالاپتارىن جەڭىلدەتۋ جونىندە كەلىسسوزدەر جۇرگىزىپ جاتىر», – دەپ مالىمدەدى ءا.جايناقوۆ.
