الماتى وبلىستىق تجد ءباسپاسوز حاتشىسى ازامات جۇرتباەۆتىڭ ايتۋىنشا, تۇنگى 1 ساعات شاماسىندا تالعار وزەنى باسسەينىندە لاي كوشكەن.
«قازىر ساز-بالشىق كولەمى انىقتالىپ جاتىر. وقيعا بولعان جەردەن 12 ادام قاۋىپسىز جەرگە كوشىرىلدى. توتەنشە جاعداي سالدارىنان يرريگاتسيالىق كانالدىڭ اۋزى بىتەلىپ, ساياباق تۇرعىندارىنىڭ ۇيلەرىن سۋ الدى», دەدى ا.جۇرتباەۆ.
«قازسەلدەنقورعاۋ» مم حابارلاۋىنشا, «بەساعاش-بەسقاينار» اۆتوجولىنىڭ 5-6 شاقىرىمىندا سەل ءجۇرىپ, ساز-بالشىق ماسساسى جولدى جارتىلاي جاۋىپ قالعان. جاپا شەككەندەر جوق. وقيعا ورنىندا ماماندار جۇمىس ىستەپ جاتىر.
ال 04:20 شاماسىندا قوتىربۇلاق وزەنى باسسەينىندە 18 جەردە لاي كوشىپ, جولدى جاۋىپ قالدى. اتالعان اۋماقتا 45 مم شاماسىندا جاۋىن جاۋعان. قازىر اۋدان بيلىگى اتالعان اۋماقتا كولىكتەردىڭ جۇرۋىنە تىيىم سالدى.
وبلىستىق تجد ماماندارى تاراپىنان كوميسسيا قۇرىلىپ, توتەنشە جاعداي بولعان جەردە جۇمىس ىستەپ جاتىر.
