بۇگىنگى جارىسقا يزرايل, قىرعىزستان, رەسەي, بەلورۋسيا, وزبەكستان, جاپونيا, ۆەتنام جانە قازاقستان قۇراماسىنىڭ 100-گە جۋىق سپورتشىلارى ەكى جاس ەرەكشەلىك بويىنشا كوپسايىس تۇرىنەن سايىسقا تۇسەدى.
سپورتتىق شارانىڭ اشىلۋ سالتاناتىنا قاتىسقان وڭتۇستىك قازاقستان وبلىسىنىڭ اكىمى ج.تۇيمەباەۆ بارشا تۋرنيرگە قاتىسۋشى سپورتشىلارعا قوش كەلدىڭىزدەر دەي وتىرىپ, جاس سپورتشىلارعا ساتتىلىك تىلەدى.
«ەلىمىزدىڭ ماقتانىشى ءاليا يۋسۋپوۆا كوركەم گيمناستيكادان ازيا ويىندارىنىڭ ەكى دۇركىن ءابسوليۋتتى جەڭىمپازى. افينا جانە بەيجىڭ قالالارىندا وتكەن جازعى وليمپيادا ويىندارىندا ەل نامىسىن ابىرويمەن قورعاعان. بايراقتى باسەكەدە ەل نامىسىن ابىرويمەن قورعاپ, تۋىمىزدى كوككە كوتەردى. بۇگىندە كوركەم گيمناستيكادان قر باس جاتتىقتىرۋشىسى قىزمەتىن ابىرويمەن اتقارىپ كەلە جاتقان سپورت سالاسىنىڭ بىرەگەي بىلىكتى مامانى»,-دەدى اكىم.
ءاليا ماقسۇتقىزى باسقاراتىن كوركەم گيمناستيكا مەكتەبىنىڭ اشىلعانىنا نەبارى 7 جىل عانا بولعانىنا قاراماستان سپورتشىلارى بىرنەشە بيىكتىكتەردى باعىندىرىپ ۇلگەردى. بىلتىرعى جىلى برازيليادا وتكەن 31-ءشى جازعى وليمپيادا ويىندارىندا ءاليانىڭ ءتول شاكىرتى ءسابينا اشىرباەۆا نەبارى 16 جاسىندا ونەر كورسەتىپ, جوعارى كورسەتكىشتەرگە يە بولدى. قازىر وبلىستىق كوركەم گيمناستيكا سپورت مەكتەبىندە 39 جاتتىقتىرۋشى 289 بالاعا وقۋ-جاتتىعۋ جۇمىستارىن جۇرگىزۋدە.
وبلىستا وسى سپورت تۇرىنەن حالىقارالىق دارەجەدەگى سپورت شەبەرى, جازعى ازيا ويىندارى مەن ازيا چەمپيوناتىنىڭ قولا جۇلدەگەرى, 2016 جىلى ريو-دە-جانەيرو قالاسىندا وتكەن جازعى وليمپيادا ويىندارىنىڭ قاتىسۋشىسى, قازاقستان رەسپۋبليكاسىنىڭ بىرنەشە دۇركىن چەمپيونى سابينا اشيرباەۆا, حالىقارالىق دارەجەدەگى سپورت شەبەرى, جاسوسپىرىمدەر اراسىندا توپتىق جاتتىعۋدان ازيا چەمپيونى, قازاقستان رەسپۋبليكاسىنىڭ بىرنەشە دۇركىن چەمپيونى امينا رۋستەموۆا مەن حالىقارالىق دارەجەدەگى سپورت شەبەرى, جاسوسپىرىمدەر اراسىندا ءۇش دۇركىن ازيا چەمپيونى, قر بىرنەشە دۇركىن چەمپيونى الينا اديلحانوۆا جانە كوپتەگەن سپورت شەبەرلەرى, حالىقارالىق, رەسپۋبليكالىق جارىستاردىڭ جەڭىمپازدارى مەن جۇلدەگەرلەرى بار.
2011-2016 جىلدارى ارالىعىندا جاس ەرەكشىلىكتەرى بويىنشا مەكتەپ گيمناستشىلارى قازاقستان رەسپۋليكاسىنىڭ چەمپيوندارى, ازيا ويىندارى مەن ازيا چەمپيوناتتارىنىڭ جۇلدەگەرلەرى جانە يسپانيا, ەستونيا, رەسەي, وزبەكستان, قىرعىزستان, بەلورۋسيا, تۋركيا جانە قازاقستان ەلدەرىندە وتكەن بىرقاتار حالىقارالىق جارىستاردىڭ جەڭىمپازدارى مەن جۇلدەگەرلەرى اتاندى.
وسى جىلدار ارالىعىندا مەكتەپ گيمناستشىلارى ءتۇرلى دەڭگەيدەگى جارىستارعا قاتىسىپ, 123 - التىن, 130 - كۇمىس جانە 167 - قولا مەدالدارعا قول جەتكىزگەن.
