باسقوسۋدى اشقان فاكۋلتەت دەكانى, فيلولوگيا عىلىمدارىنىڭ كانديداتى, پروفەسسور قايرات ساق مەرەيگەردىڭ عالىم, ۇستاز رەتىندەگى قىزمەتىنە قىسقاشا شولۋ جاساپ ءوتتى. «ايتمۇحامەت ورازباي ۇلى – استانا قالاسىندا جۋرناليستيكا مەكتەبىنىڭ قالىپتاسىپ, دامۋىنا ايرىقشا ۇلەس قوسقان ساناۋلى ساڭلاقتارىمىزدىڭ ءبىرى. بەدەلدى ءبىلىم ورداسى ەۋرازيا ۇلتتىق ۋنيۆەرسيتەتىندە «جۋرناليستيكا» كافەدراسىنىڭ وركەن جايىپ, قانات قاعۋىنا ەرەن ەڭبەك سىڭىرگەن مارقاسقا. رەسەيدى ايتپاعاندا, امەريكا قۇرلىعىنا ءبىر ەمەس, بىرنەشە رەت بارىپ, الپاۋىت ەلدىڭ جۋرناليستيكاسىن زەرتتەپ قانا قويماي, ءوز بىلگەنىن شاكىرتتەر قۇلاعىنا قۇيىپ, باسەكەگە قابىلەتتى مامان دايىنداۋعا ەرەكشە ۇمتىلىس تانىتىپ كەلەدى. Thomson Reuters تىزىمىنە ەنگەن عىلىمي الەۋەتى جوعارى جۋرنالدا ماقالا جاريالاپ, مونوگرافياسىن اعىلشىن تىلىندە امەريكادا باسىپ شىعارعان فاكۋلتەتىمىزدىڭ ماڭدايالدى عالىمى», دەدى.
ۋنيۆەرسيتەت رەكتورى ەرلان سادىقوۆتىڭ قۇتتىقتاۋ حاتىن وقۋ ورنىنىڭ پرورەكتورى بەلگىلى عالىم, پروفەسسور ديحان قامزابەك ۇلى وقىدى. سونىمەن قاتار, ۋنيۆەرسيتەتتىڭ عىلىمي كەڭەسىنىڭ شەشىمىمەن ا.ەسداۋلەتوۆكە وقۋ ورنىنىڭ ەڭ جوعارعى ماراپاتى – كۇلتەگىن مەدالىنىڭ بەرىلگەندىگىن ايتىپ, وسى ماراپاتتى كەۋدەسىنە قادادى.
مۇنان كەيىن مەرەيگەر تۋرالى تۇسىرىلگەن شاعىن دەرەكتى فيلم كورسەتىلدى.
ءسوز كەزەگىن الدىمەن العان پارلامەنت ءماجىلىسىنىڭ دەپۋتاتى, قازاق كوسەمسوزىندە سونى سوقپاق سالعان ەلىمىزگە تانىمال جۋرناليست, پۋبليتسيست, عالىم ساۋىتبەك ابدراحمانوۆ ا.ەسداۋلەتوۆتىڭ جۋرناليستيكا سالاسىنداعى وقىتۋشىلىق, ۇستازدىق قىزمەتىنە توقتالا كەلە, ونىڭ قوعامدىق ورتادا قالىپتاسقان تۇلعاسى تۋرالى ءوز ويلارىن ءوربىتتى. «قازاققا ەسداۋلەتوۆ دەگەن فاميليانى العاش تانىتقان ايتمۇحامەتتىڭ اعاسى ۇلىقبەك ەسداۋلەتوۆ ەكەنى بەلگىلى. الايدا ايتمۇحامەت ۇلىقبەكتىڭ كولەڭكەسىندە قالماي, ءوزىن جاڭا قىردان تانىتا ءبىلدى. ونىڭ ۇزاق جىلعى عىلىمي جانە ۇستازدىق قىزمەتى مەن وسى سالادا جەتكەن جەتىستىكتەرى سونىڭ دالەلى», دەدى.
قازاق جۋرناليستەرىنىڭ بىرنەشە بۋىنىن تاربيەلەگەن بەلگىلى عالىم نامازالى وماشەۆ, ەسىمى ەلىمىزگە كەڭىنەن تانىمال عالىم, الاشتانۋشى تۇرسىن جۇرتباي, بەلگىلى ساياساتتانۋشى عالىم, پروفەسسور ءناۋبات قاليەۆ, تاريحشى عالىم, پروفەسسور قىرىقباي اللابەرگەن, فاكۋلتەتتىڭ تەلەراديو جانە قوعاممەن بايلانىس كافەدراسىنىڭ مەڭگەرۋشىسى, تەلەجۋرناليستەر ۇستازى ايازبي بەيسەنقۇلوۆ, فيلولوگيا فاكۋلتەتىنىڭ پروفەسسورى, فيلولوگيا عىلىمدارىنىڭ دوكتورى راحىمجان تۇرىسبەك, جازۋشى تۇرلىبەك مامەسەيىت جانە باسقالار ءسوز الىپ, ا.ەسداۋلەتوۆتىڭ عىلىمي شىعارماشىلىق, ۇستازدىق قىزمەتىنە, ادامگەرشىلىك, ازاماتتىق بەينەسىنە سان قىرىنان توقتالىپ ءوتتى.
الماتىداعى ءال-فارابي اتىنداعى قازاق مەملەكەتتىك ۋنيۆەرسيتەتىن بىتىرگەننەن كەيىن بىرقاتار جىلدار جۋرناليست رەتىندە جەمىستى قىزمەت اتقارعان ايتمۇحامەت ەسداۋلەتوۆتىڭ ءوزىنىڭ العاشقى ۇستازدىق قىزمەتىن اتالعان ۋنيۆەرسيتەتتىڭ قابىرعاسىندا باستاعاندىعى بەلگىلى. وسى ۋنيۆەرسيتەتكە سىڭىرگەن ەڭبەگىن ونداعى ارىپتەستەرى دە ۇمىتپاعان ەكەن, مىنا جاقتاعى جيىنعا ارنايى وكىلدەرىن جىبەرىپتى. وسى بويىنشا ءسوز العان قازمۋ-ءدىڭ جۋرناليستيكا فاكۋلتەتىنىڭ كافەدرا مەڭگەرۋشىسى جەتپىسباي بەكبولات ۇلى وسى وقۋ ورنىنىڭ عىلىمي كەڭەسىنىڭ شەشىمىمەن بەرىلگەن جوعارعى ماراپاتى – ءال-فارابي مەدالىن ا.ەسداۋلەتوۆتىڭ توسىنە قادادى.
مەرەيگەردى ە.ا.بوكەتوۆ اتىنداعى قاراعاندى مەملەكەتتىك ۋنيۆەرسيتەتىندەگى ۇستازدار قاۋىمى اتىنان وسىنداعى جۋرناليستيكا كافەدراسىنىڭ پروفەسسورى ۆەرا ابىشەۆا قۇتتىقتادى.
قۇتتىقتاۋ سالتاناتى بارىسىندا ەۇۋ جۋرناليستيكا جانە ساياساتتانۋ فاكۋلتەتى ءباسپاسوز جانە باسپا ءىسى كافەدراسىنىڭ كۇشىمەن دايىندالعان «جۋرناليست. رەداكتور. باسپاگەر» اتتى جاڭا باسىلىمنىڭ تۇساۋى كەسىلدى. بۇل باسىلىمنىڭ جەكە ءبىر تاراۋى ا.ەسداۋلەتوۆتىڭ عىلىمي-ۇستازدىق قىزمەتىنە ارنالعان.
سۇڭعات ءالىپباي,
«ەگەمەن قازاقستان»
