ەلورداداعى شارانىڭ اشىلۋ سالتاناتىندا ۇلتتىق مۋزەيدىڭ ديرەكتورى مىندەتىن اتقارۋشى اباي ساتىبالدين: «ۇلتتىق مۋزەيدە بيىل ءۇشىنشى مارتە «مۋزەيدەگى ءتۇن» اكتسياسى وتكىزىلدى. وعان كەلۋشىلەردىڭ قىزىعۋشىلىعى دا جىل ساناپ ارتىپ كەلەدى. «مۋزەيدەگى ءتۇن» اكتسياسىن ۇيىمداستىرۋ ارقىلى حالىقتىڭ ءتول مادەنيەتىمىزگە دەگەن سۇيىسپەنشىلىگىن ارتتىرىپ, ۇلتتىق قۇندىلىقتارىمىزعا دەگەن قۇرمەتىن مولايتا الامىز», دەدى.
شارا بارىسىندا تانىمدىق باعىتتاعى تاقىرىپتىق ەكسكۋرسيالار, «اسىق اتۋ», «ارقان تارتىس», «قول كۇرەس» سىندى سپورتتىق ويىندار ۇيىمداستىرىلىپ, بيە بايلاۋ ناۋقانى باستالاردا جاسالاتىن «قىمىزمۇرىندىق» راسىمىنەن كورىنىستەر كورسەتىلدى. مۋزەي اتريۋمىندا زەرگەرلىك بۇيىمدار مەن كادەسىيلار ساتىلىمعا قويىلعان جارمەڭكە ۇيىمداستىرىلدى.
تاعى ءبىر ايتا كەتەتىن جايت, اكتسيا اياسىندا اكادەميك تورەگەلدى شارمانوۆ باسقاراتىن قازاق تاعامتانۋ اكادەمياسىنىڭ ازىرلەۋىمەن بيە سۇتىنەن دايىندالعان شوكولادتىڭ تانىستىرىلىمى ءوتتى.
«مۋزەيدەگى تۇنگە» كەلۋشىلەردىڭ نازارىنا ونەر جۇلدىزدارى گۇلنۇر ورازىمبەتوۆا, مۇحامەتالي جۇگىنىسوۆ, رينات مالتساگوۆ, شاحاريزات سەيداحمەت قاتىسقان كونتسەرتتىك باعدارلاما ۇسىنىلدى.
كەلۋشىلەردىڭ بارلىعى دا تىڭ جوباعا وڭ باعاسىن بەردى. الەمدىك دەڭگەيدە اتالىپ وتەتىن بۇل اكتسيانىڭ ۇلتتىق مۋزەيدە دە ۇيىمداستىرىلۋى ءبىزدى ەرەكشە قۋانتتى دەيدى قوناقتار. تۇرعىنداردى, اسىرەسە, مۇنداعى التىن, زاماناۋي ونەر جانە استانا زالدارىنداعى قۇندىلىقتار باۋراپ الدى.
ۇلتتىق مۋزەي اشىلعالى بەرى «مۋزەيدەگى ءتۇن» اكتسياسى وسىمەن ءۇشىنشى مارتە وتكىزىلىپ وتىر. 2015 جىلعى العاشقى اكتسياعا 23 مىڭ ادام قاتىسسا, بىلتىر وعان كەلۋشىلەر سانى 30 مىڭنان اسقان. ناۋرىز مەرەكەسىنە وراي ۇيىمداستىرىلعان «ناۋرىز – جاڭعىرۋ نىشانى» جوباسىنا دا استانالىقتار مەن قوناقتار تاراپىنان وسىنداي بەلسەندىلىك بايقالعان ەدى. ەندى, مىنە, بيىل ولاردىڭ سانى ەداۋىر ارتىپ, «مۋزەيدەگى ءتۇن» شاراسىن 37 مىڭعا جۋىق ادام تاماشالاپتى. مۇنداي جەتىستىككە مۋزەي ۇلتتىق تىڭ جوبالارمەن تولىعۋى ناتيجەسىندە قول جەتكىزىپ وتىر.
قارشىعا كۇلەن
