وسىنداي كۇردەلى ماسەلەلەرگە ارنالعان اۋقىمدى جيىن «مادەنيەتتەر توعىسى: قولدانبالى الەۋمەتتىك لينگۆيستيكا جانە شەت تىلدەرىن وقىتۋ ماسەلەلەرى» دەگەن تاقىرىپتا ەلورداداعى ن.ل.گۋميلەۆ اتىنداعى ەۋرازيا ۇلتتىق ۋنيۆەرسيتەتىندە وتكەن ەدى. وعان وسى ۋنيۆەرسيتەتتىڭ جالپى ءتىل ءبىلىمى جانە اۋدارما تەورياسى كافەدراسى, س.دەميرەل ۋنيۆەرسيتەتىنىڭ فيلولوگيا جانە پەداگوگيكا فاكۋلتەتى, قازاق گۋمانيتارلىق زاڭ ۋنيۆەرسيتەتى ۇيىتقى بولدى.
حالىقارالىق كونفەرەنتسيانىڭ نەگىزگى ماقساتى – ءتىلدى وقىتۋدا تەوريا مەن پراكتيكانى ۇشتاستىرا ءبىلۋ, زەرتتەۋ ناتيجەلەرىن قولدانىسقا ەنگىزۋدى جۇيەلى تۇردە ىسكە اسىرۋ بولىپ سانالادى. ءتىلدى وقىتۋ ادىستەمەسى, قازىرگى لينگۆيستيكا مەن ادەبيەتتانۋ, كوپ ءتىلدى ءبىلىم بەرۋ ءىسى, ءتىلدى وقىتۋداعى يننوۆاتسيالار مەن ارنايى ماقساتتارعا باعىتتالعان اعىلشىن ءتىلى, اۋدارما جۇمىسى جان-جاقتى ساراپقا سالىنعان وتىرىستا اقش-تىڭ اريزونا, ميچيگان ۋنيۆەرسيتەتىنىڭ پروفەسسورلارى پاۋل كەي ماتسۋدا, سۋزان كاسس, لوندون كورولدىك كوللەدجىنىڭ پروفەسسورى بەن رامپتون جانە وزگە دە شەتەلدىك عالىمدار بايانداما جاساپ, وتاندىق عالىمدارمەن تاجىريبە الماستى. اسىرەسە, كوپتىلدىلىكتى ساقتاي وتىرىپ, مەملەكەتتىك ءتىلدى جەتىك مەڭگەرۋ جانە بۇل جۇمىستى جاستار اراسىندا باياندى جۇرگىزۋ جايى جان-جاقتى قوزعالدى. جالپى سانى 250-گە جۋىق عىلىم سالاسىنىڭ وكىلدەرى قاتىسقان باسقوسۋدا قازاق ءتىلى مەن وزگە تىلدەردى ۇشتاستىرا وتىرىپ مەڭگەرۋ ادىستەمەسى سارالاندى.
سۇلەيمەن مامەت,
«ەگەمەن قازاقستان»
