«جاس وتان» جق توراعاسى اتاپ وتكەندەي, يننوۆاتسيا – ەكونوميكالىق جانە الەۋمەتتىك دامۋدىڭ نەگىزگى قوزعاۋشى كۇشى. وسى ورايدا جاستاردىڭ ءرولى ايرىقشا اتالىپ, عىلىمي-يننوۆاتسيالىق قىزمەتكە باۋلۋ ارقىلى ولاردىڭ شىعارماشىلىق قابىلەتىن ارتتىرۋ ماقساتىندا بايقاۋ وتكىزىلەدى.
بايقاۋ بەس اتالىم بويىنشا وتكىزىلەدى: الەۋمەتتىك ماڭىزدى يننوۆاتسيالار, تەحنوستارت, ۇزدىك جاس عالىم, جاستاردىڭ يننوۆاتسيالىق جوباسى, پەرسپەكتيۆا. سونىمەن قاتار, باعىتتاردىڭ كەڭ سپەكترى قامتىلادى: قازاق ءتىلىنىڭ لاتىن الىپبيىنە كوشۋى, جاسىل ەنەرگەتيكا (ەنەرگەتيكا جانە ەنەرگيانى ۇنەمدەۋ), حيميالىق تەحنولوگيا, نانوتەحنولوگيا جانە بيوتەحنولوگيا, ونەركاسىپتىك جانە قۇرىلىستىق تەحنولوگيا مەن ءوندىرىس, اگرويننوۆاتسيا (ونەركاسىپتىك تەحنولوگيا جانە ءوندىرىس), IT تەحنولوگيا مەن اۆياعارىش تەحنولوگياسى, مەديتسينا, مەديتسينالىق تەحنيكا جانە تەحنولوگيا, فارماتسيا, تابيعاتتى ءتيىمدى پايدالانۋ, رەسۋرستى ۇنەمدەۋ, روبوتتىتەحنيكا, جول قوزعالىسىنىڭ قاۋىپسىزدىگى, ۇزدىك لايفحاك, 3D باسپا جانە جاڭا ماتەريالدار, گادجەتتەرگە ارنالعان موبيلدىك قوسىمشالار, ەكولوگيالىق يننوۆاتسيا, نانويمپۋلس – نانوتەحنولوگياداعى يننوۆاتسيا, بىلىمدەگى يننوۆاتسيا.
كونكۋرستىق وتىنىمدەردى ءادىل باعالاۋ ماقساتىندا قازىلار القاسىنا عالىمدار, ۇلتتىق كومپانيالار, كونسترۋكتورلىق بيۋرولار, سونداي-اق, مينيسترلىكتەر وكىلدەرى قاتارىنان ساراپشىلار شاقىرىلاتىن بولادى.
بايقاۋعا قاتىسۋ وتىنىمدەرى 30 قىركۇيەككە دەيىن قابىلدانادى.
بايقاۋدىڭ جالپى جۇلدە قورى – 8 000 000 تەڭگە. بايقاۋعا قاتىسۋشىلار مەن جەڭىمپازدار جوبانى ينۆەستيتسيالاۋ مەن قارجىلاندىرۋ كوزدەرىن تابۋ مۇمكىندىگىنە يە بولاتىنىن اتاپ ءوتۋ كەرەك.
ءباسپاسوز ءماسليحاتى بارىسىندا «ۇزدىك جاس عالىم», «جاستاردىڭ يننوۆاتسيالىق جوباسى» اتالىمدارى بويىنشا 2016 جىلعى بايقاۋ جۇلدەگەرلەرى ءاليا ءالجانوۆا مەن مۇحتار مۇقاشەۆ ءوز زەرتتەۋلەرىنە بايقاۋدىڭ تيگىزگەن اسەرى مەن ءبىر جىل ىشىندە جەتكەن جەتىستىكتەرى تۋرالى ايتىپ بەردى.
«ەگەمەن-اقپارات»
