– نۇرلىبەك مەيىرحان ۇلى, اقتوبە ايماعىندا بۇقارالىق سپورتتىڭ جاي-كۇيى قانداي دەڭگەيدە؟
– وبلىستا دەنەشىنىقتىرۋمەن جانە سپورتپەن تۇراقتى شۇعىلدانۋشىلار سانى جىلدان-جىلعا ءوسىپ كەلەدى. وڭىردە تۇراتىن حالىقتىڭ سانىنا شاققاندا وتكەن جىلى بۇل دەرەك 27 پايىزدى قۇرادى. سالىستىرمالى تۇردە العاندا, مۇنىڭ ءوزى وڭ كورسەتكىش دەۋگە بولادى. سۇيەگى قاتىپ كەتكەن ەرەسەكتەردەن گورى بالالار مەن جاسوسپىرىمدەردىڭ سپورتپەن اينالىسۋىنىڭ ماڭىزى ەرەكشەلەۋ. قازىرگى كۇنى سپورتتى سەرىك ەتكەن ەركىن ەلدىڭ ەرتەڭگى وكىلدەرىنىڭ سانى 17 مىڭعا جەتىپ وتىر. ونىڭ 6 مىڭعا جۋىعى اۋىلدىق جەردە. الداعى ماقساتىمىز – جوعارىدا كورسەتىلگەن كورسەتكىشتى 30 پايىزعا جەتكىزىپ, حالىقتىڭ بۇقارالىق سپورتقا كەڭىنەن تارتىلۋىنا جاعداي تۋعىزۋ.
– وبلىس ورتالىعىنداعى قازىرگى سپورتتىق نىساندار حالىقارالىق دەڭگەيدەگى ءىرى جارىستار وتكىزۋگە سايكەس كەلمەيدى دەگەن وي-پىكىرلەر دە ايتىلىپ قالىپ ءجۇر. بۇعان نە دەيسىز؟
– ءبىر ەسەپتەن مۇنى مۇلدەم جوققا شىعارۋعا بولا قويماس. دەگەنمەن, كەيىنگى كەزدە حالىقارالىق ستاندارتتار مەن ەرەجەلەرگە ساي كەلەتىن امبەباپ سپورتتىق قۇرىلىمدار بوي كوتەرىپ ۇلگەرگەنى دە شىندىق. مۇنىڭ ءبىرى – اقتوبە قالاسىنداعى 400 ورىندىق حوككەي ءمودۋلى. قازىر تاماشا قۇرىلىس كەشەنى اياقتالىپ كەلەدى. اتالعان سپورتتىق نىسان شايبالى حوككەي, شورت-ترەك, مانەرلەپ سىرعاناۋ سەكىلدى قىسقى سپورت تۇرلەرىن دامىتۋعا مول سەپتىگىن تيگىزبەك. سونداي-اق, جەكپە-جەك, كۇرەس سارايى دا بيىل پايدالانۋعا بەرىلەدى دەپ كۇتىلۋدە. تاعى ءبىر جاعىمدى جاڭالىق, تاياۋدا وبلىس ورتالىعىندا مەملەكەت-جەكەمەنشىك ارىپتەستىگى اياسىندا 2700 ورىندىق كوپبەيىندى مۇز سپورت سارايىنىڭ العاشقى قازىعى قاعىلماق. جوعارىدا بەرگەن ساۋالىڭىزعا قايتارعان جاۋابىمدا ايتىپ كەتكەنىمدەي, بۇل نىساندار پايدالانۋعا بەرىلگەن كەزدە 2020 جىلعا دەيىن تۇرعىنداردىڭ 30 پايىزىنىڭ سپورتپەن تۇراقتى تۇردە شۇعىلدانۋىنا مۇمكىندىك تۋماق. سونىمەن بىرگە, حالىقارالىق دەڭگەيدەگى ءىرى جارىستاردىڭ وتكىزىلۋىنە دە قولايلى جاعدايلار جاسالماق.
– بۇگىنگى كۇنگە دەيىن وبلىس ورتالىعىنداعى ەكى ستاديوننىڭ دا فۋتبولدان كەزدەسۋ وتكىزۋگە سايكەس بولماي كەلگەنىن نەمەن تۇسىندىرەسىز؟ سونىڭ سالدارىنان «اقتوبە» فۋتبول كلۋبى ءوز الاڭىنا قارسىلاستارىن شاقىرا الماي كەلدى ەمەس پە؟ بۇل ستاديونداردىڭ كەم-كەتىگى قاشان تۇگەندەلمەك؟
– ءيا, وبلىس ورتالىعىندا ەكى ويىننىڭ وتپەي قالعانى راس. مۇندا رەسپۋبليكالىق فۋتبول فەدەراتسياسى ماماندارى قوسىمشا ستاديوننىڭ جاسىل الاڭى كاسىبي كلۋبتار وينايتىن ستاندارتتارعا سايكەس كەلمەيدى دەپ شەشىم شىعارعان بولاتىن. دەگەنمەن, بۇل ماسەلە «اقتوبەنىڭ» تۋرنيردەگى ويىن كەستەسىن جۇرگىزۋىنە كەدەرگى كەلتىرگەن جوق. ويتكەنى, فەدەراتسيا كەلىسىمىنە سايكەس ءساۋىردىڭ اياعىندا وينالاتىن ەكى ويىن جاز ايىنداعى ماۋسىمدىق ويىندارعا كوشىرىلدى.
ەندى ورتالىق ستاديوننىڭ جاي-كۇيىنە كەلسەك, «اقتوبەنىڭ» مامىر ايىندا ءوز الاڭىندا ويناۋىنا تولىق مۇمكىندىگى بار. مۇندا دا فەدەراتسيا ماماندارى ءتيىستى تەكسەرۋلەر جۇرگىزدى. ولار ونىڭ قورىتىندىسىنا سايكەس, وڭىردە ۇزاققا سوزىلعان قىستان كەيىنگى الاڭنىڭ جاي-كۇيى قازىرگى جاعدايدا تەحنيكالىق تالاپتارعا سايكەس كەلمەيدى دەپ تاپتى. ياعني, مۇنى رەتتەۋ ءۇشىن قوسىمشا ۋاقىت قاجەت بولدى. دەگەنمەن, قازىر بۇل جاعداي تولىعىمەن قالپىنا كەلتىرىلدى.
– بۇگىنگە دەيىن ەلىمىزدىڭ كوپتەگەن وڭىرلەرىنەن وليمپيادا جەڭىمپازدارى مەن جۇلدەگەرلەرى شىعىپ ۇلگەردى. ال ازىرگە اقتوبەدەن وليمپيادادا ەل تۋىن جەلبىرەتەتىن سپورتشىلاردىڭ شىعاتىن ءتۇرى كورىنبەيدى. جەرگىلىكتى سپورت ۆەدومستۆوسىنىڭ باسشىسى رەتىندە بۇل ماسەلە ءسىزدى ويلاندىرا ما؟
– وليمپيادا رەزەرۆتەرىن دايىنداۋدىڭ ءبىر كوزى – سپورتتاعى دارىندى بالالارعا ارنالعان مەكتەپ-ينتەرناتتار. بۇرىن وڭىردە مۇنداي ارناۋلى مەكتەپ قۇرىلماعان ەدى. بۇل كوكەيكەستى ماسەلە تەك وتكەن جىلى عانا ءوز شەشىمىن تاۋىپ, جاڭا نىسان ءبىزدىڭ باسقارمانىڭ قۇزىرىنا بەرىلدى. قازىرگى كەزدە وعان كوللەدج مارتەبەسىن بەرۋ جولدارى قاراستىرىلۋدا. سپورتتاعى دارىندى بالالارعا ارنالعان وقۋ ورنى بازاسىن ودان ءارى جاقسارتۋ ءۇشىن قازىر مۇندا سپورتتىق كەشەن جانە جەڭىل اتلەتيكاعا ارنالعان جۇگىرۋ جولدارى سالىنۋدا. ونىڭ تاربيەلەنۋشىلەرىنىڭ اراسىنان وليمپيادا ساڭلاقتارى شىعادى دەگەن ۇلكەن ءۇمىتىمىز بار. مۇنىڭ بەر جاعىندا الداعى توكيو وليمپياداسىندا كوك بايراعىمىزدى كوككە جەلبىرەتەدى دەپ ۇكىلەپ جۇرگەن سپورتشىلارىمىز دا جوق ەمەس.
– وبلىستىڭ شالعاي اۋداندارىندا دەنەشىنىقتىرۋ جانە سپورت كەشەندەرىنىڭ بوي كوتەرۋى نەمەسە قۇرىلىسىنىڭ سالىنۋى تۋرالى نە ايتاسىز؟ بۇل جونىندە قانداي جوبالار بار؟
– وڭىردە تاياۋداعى جىلداردا بارلىق اۋدانداردا دەنەشىنىقتىرۋ-ساۋىقتىرۋ كەشەندەرى قۇرىلىستارىن سالىپ, اياقتاۋ بەلگىلەنگەن. بۇل شارۋا كەزەڭ-كەزەڭىمەن ىسكە اسىرىلماق. مۇعالجار جانە تەمىر, بايعانين سەكىلدى شالعايداعى اۋدانداردا بۇل ءىستى «سامۇرىق-قازىنانىڭ» قولداۋىمەن تۇرعىزۋ مۇمكىندىكتەرى قاراستىرىلۋدا. وبلىستا حالىق سانى جىلدان جىلعا ءوسىپ كەلەدى. ءبىز وسى وڭ الەۋمەتتىك-دەموگرافيالىق احۋالدى ەسكەرە وتىرىپ, ارنايى ءىس-شارالار جوسپارىن جاسادىق. سوعان سايكەس كوپ سالالى سپورت عيماراتتارى مەن الاڭدارىنىڭ قۇرىلىمدارى جوبالاندى. بۇل ماسەلە سۇحباتىمىزدىڭ باسىندا ايتىلعانداي, بۇقارالىق سپورتتى دامىتۋعا دا ىڭعايلى بولماق. ويتكەنى, مۇنداي ۇلگىدەگى سپورتتىق نىساندار ءبىرىنشى كەزەكتە كوپشىلىكتىڭ باسكەتبول, ۆولەيبول, شاعىن فۋتبول, حوككەي جانە تەننيس سپورتى تۇرلەرىنەن جەرگىلىكتى دەڭگەيدە جارىستار وتكىزۋىنە ارنالعان.
– اقتوبە ايماعى ءۇشىن باسىم سپورت ءتۇرى قايسىسى ەكەنىن ايتا الاسىز با؟
– بۇل سۇراعىڭىزعا ەكى ءتۇرلى ءتۇيىن مەن كوزقاراس تۇرعىسىنان كەلۋگە بولادى. بىرىنشىدەن, قاي كەزدە دە باسىم باعىت – وليمپيالىق سپورت تۇرلەرىن دامىتۋ بولىپ تانىلاتىندىعى. جاڭا دا ايتىپ كەتتىم عوي, قازىر ءبىز بۇل ماسەلەگە بارىنشا كەڭ جاعداي تۋعىزۋعا باعىت ۇستانىپ وتىرمىز. ال ماسەلەنىڭ ەكىنشى ءبىر قىرىنان كەلگەندە, قازىرگى تاڭدا وڭىردە شاڭعى, گرەك-ريم, ەركىن كۇرەس, كاراتە, ءجۇزۋ, تاەكۆاندو سەكىلدى سپورت تۇرلەرى جاقسى دامىپ كەلەدى. قازىرگى ماقساتىمىز – ەل وڭىرلەرى قاتارىنداعى سپورت سالاسى كوشىنىڭ الدىڭعى لەگىنەن كورىنە ءبىلۋ. بۇعان ءبىزدىڭ كۇش-قۋاتىمىز جەتەدى. ويتكەنى, بۇگىنگى كۇندە اقتوبە سپورتىنىڭ احۋالى ويداعىداي دەپ نىق سەنىممەن ايتۋعا بولادى.
– اڭگىمەڭىزگە راحمەت.
اڭگىمەلەسكەن تەمىر قۇسايىن,
«ەگەمەن قازاقستان»
اقتوبە
