اقتوبەگە ارنايى كەلگەن قازاق ونكولوگيا جانە راديالوگيا عىلىمي زەرتتەۋ ينستيتۋتى ماممالوگيا ورتالىعىنىڭ باسشىسى, مەديتسينا عىلىمىنىڭ دوكتورى شىنار تاپاەۆا مۇنداي ناۋقاسقا شالدىققاندار سىرت ەلدەردە ەمدەلۋدى قولايلى كورەتىنىن ايتىپ بەردى. ونىڭ تۇجىرىمداۋىنشا ەلىمىزدەگى وسى تەكتەس وتالار تەگىن ءارى ساپالى جاسالادى.
«ەگەر اۋرۋ العاشقى ساتىسىندا انىقتالسا ەش قانداي قيىندىق تا قورقىنىش تا جوق. بۇل كەزدە قاتەرلى ىسىكتەن قۇلانتازا ايىعىپ كەتۋگە بولادى», دەيدى ول.
سونداي-اق, ەلىمىزدىڭ باس ماممولوگىنىڭ ايتۋىنشا مۇنداي اۋرۋدىڭ الدىن الۋدىڭ باستى ءبىر جولى – كوپ بالا تۋ, بالانى ەمىزۋ, تۇسىك جاساتۋدان اۋلاق بولۋ. ءوزىنىڭ بۇل وي-پىكىرىنە دالەل رەتىندە ش.تاپاەۆا بالا بوسانۋ كورسەتكىشى از سولتۇستىك وڭىرىندە قاتەرلى ءسۇت بەزى ىسىگىنە شالدىققاندار سانى كوپ بولسا, كەرىسىنشە بالا تۋ دەرەگى كوپ ەلىمىزدىڭ وڭتۇستىگىندە از ەكەنىن العا تارتتى.
وڭىرگە ساپارى بارىسىندا جوعارى بىلىكتى مامان بىرنەشە ايەلگە بۇگىنگى زامانعى تەحنولوگيا ارقىلى وتا جاسادى. ونىڭ شەبەرلىگى مەن تاجىريبەسىن اقتوبەلىك ونكوحيرۋرگتار دا كوڭىلدەرىنە ءتۇيدى.
تەمىر قۇسايىن,
«ەگەمەن قازاقستان»
