ەلباسى ماقالاسىندا «ماقساتىمىز ايقىن, باعىتىمىز بەلگىلى, ول − الەمدەگى ەڭ دامىعان 30 ەلدىڭ قاتارىنا قوسىلۋ», دەيدى. لايىم, وسى باعىتىمىزدان اۋىتقىمايىق. الەمدىك الدىڭعى قاتارلى قاۋىمداستىق جەتكەن بيىك مەجەلەردەن كورىنۋ ءۇشىن تەك باي مەملەكەت بولۋ نەمەسە جەر قويناۋىنداعى تابيعات انانىڭ سىيى – بايلىقتاردى قازىپ الىپ ساتىپ بايۋ ارقىلى قاتاردان كورىنۋ ازدىق ەتەدى. بۇل ءبىر ساتتىك, بۇگىنگى كۇنمەن ءومىر ءسۇرۋ, ۇرپاقتىڭ كەلەشەگىنە نازار اۋدارماۋ. ۇرپاق الدىنداعى پارىز, تالاي سىن ساعاتتار كۇتىپ تۇرعان ەلىمىزدىڭ بولاشاعى ءۇشىن قوعامدى, ونىڭ ءاربىر ازاماتىنىڭ ساناسىنا سىلكىنىس جاساۋ بولاشاققا سالىناتىن ۇلكەن كاپيتال بولماق. ول ماقساتقا جەتۋ جولىنداعى باستى قوزعاۋشى كۇش – سانانىڭ سەرگەكتىگى كەرەك. ۇيىقتاپ جاتقان سانانى وياتۋ قاجەت. وسى جولدا ەلباسى سانانىڭ جاسايتىن ءىس-ارەكەتتەن, الداعى بولاتىن تۇبەگەيلى وزگەرىستەردەن ىلعي وزىپ ءجۇرۋى نازاردا بولۋى تيىستىگىن باسا ايتادى. ماقالادا كوتەرىلگەن ماڭىزدى ماسەلەلەر ءار كەز ەلباسىنىڭ تۇراقتى نازارىندا بولىپ كەلسە دە, رۋحاني الەمدى جاڭعىرتۋعا ارنالعان ماڭىزدى قۇجات. بۇعان دەيىن ساياسي جانە ەكونوميكالىق جاڭعىرۋلاردىڭ تاساسىندا بولىپ كەلگەن ادام مەن قوعامنىڭ رۋحاني الەمىنىڭ حال-جايى مەن بولاشاعى ماقالادا كەڭىنەن ءسوز بولادى. بۇل قازاق قوعامىنىڭ بارلىق سالاسىندا توقتاۋسىز ءجۇرىپ جاتقان جاندانىستاردى تولىقتىرىپ قانا قويماي, ولاردىڭ تەرەڭ وزەگى مەن التىن ارقاۋىنا اينالدى.
ءيا, كەزىندە رۋحاني ءومىرىمىزدىڭ دەڭگەيىن كوتەرۋگە ارنالعان جاقسى جوبالار جاسالىندى. مادەنيەتتى قولداۋ جىلى بولىپ بەلگىلەنگەن 2000 جىلى وتپەلى كەزەڭنىڭ داۋىلىنا شىداس بەرگەن, بىراق دەڭگەيى بوساپ كەتكەن ۇلتتىق مادەنيەت سالاسىنداعى نىسانداردى قالپىنا كەلتىرۋگە, ۇلتتىڭ ونەرى مەن مادەنيەتىنىڭ رۋحاني كەلبەتىنىڭ اشىلا تۇسۋىنە ءساتتى قادامدار جاسالدى. ال 2004 جىلى باستاۋ العان «مادەني مۇرا» باعدارلاماسى اياسىندا قازاقستان اۋماعىنداعى تاريحي-مادەني ەسكەرتكىشتەر مەن نىساندار جاڭعىرىپ, جاڭا زاماناۋي مادەني نىساندار دۇنيەگە كەلدى. ەرەكشە ءبىر بەلەس بولعان 2013 جىلى «حالىق − تاريح تولقىنىندا» باعدارلاماسى ارقاسىندا الىس-جاقىن شەت ەلدەر مۇراعاتتارى مەن مۇراجايلارىندا ساقتالعان قازاق حالقىنىڭ تاريحىنا تىكەلەي قاتىسى بار قۇجاتتاردى جيناپ, زەرتتەۋگە قول جەتكىزدىك. قانشاما باعا جەتپەس قۇندىلىقتارىمىز قولىمىزعا ءتيىپ, عىلىمي اينالىمعا ەندى. بۇل بۇعان دەيىن زەرتتەۋشى عالىمدار نازارىنان تاسادا قالعان سان-الۋان قۇندىلىقتارمەن قاۋىشۋىمىزعا مۇمكىندىك بەردى. ەلباسىنىڭ وسىنداي الدىن الا دايىندىقتاردان كەيىن «ەندى وسىنىڭ بارىنەن دە اۋقىمدى جانە ىرگەلى جۇمىستاردى باستاعالى وتىرمىز. مەن ەلىمىز مىقتى, ءارى جاۋاپكەرشىلىگى جوعارى ءبىرتۇتاس ۇلت بولۋ ءۇشىن بولاشاققا قالاي قادام باساتىنىمىز جانە بۇقارالىق سانانى قالاي وزگەرتەتىنىمىز تۋرالى كوزقاراستارىمدى ورتاعا سالۋدى ءجون كوردىم», دەگەن سوزىنەن بۇل ماقالانىڭ سالماعىن جانە سول تاۋەلسىزدىكپەن باستالعان ۇدەرىستىڭ توقتاۋسىز, تۇراقتى دامۋ ۇستىندە بولعاندىعىن كورەمىز.
ماقالادا ەلباسى شيرەك عاسىرلىق دامۋىمىزدىڭ ناتيجەسىندە جەتكەن بەلەستەرىمىزدى قورىتا وتىرىپ, ءارى قاراي دامۋدىڭ, رۋحاني دۇنيەدەن باستاۋىنان بۇل ماسەلەگە تۇبەگەيلى كوزقاراسپەن كەلگەندىكتى كورەمىز. بولاشاققا دەپ قۇرىلاتىن ۇلتتىق باعىت-باعدارىمىزدى جان-جاقتى, تەرەڭنەن قاراستىرادى. ارنايى توقتالىپ كەتكەن سانانى جاڭعىرتۋدىڭ باعىتتارى ءبىزدىڭ بۇعان دەيىنگى كوزقاراستارىمىزعا, جۇمىس ستيلىمىزگە, ورىنداۋ تەتىكتەرىنە ەلەۋلى تۇزەتۋلەر مەن قوسىمشالار ەنگىزەدى دەپ بىلەمىن. سەبەبى, باسەكەگە قابىلەتتىلىك, پراگماتيزم, ۇلتتىق بىرەگەيلىكتى ساقتاۋ, ءبىلىمنىڭ سالتانات قۇرۋى, قازاقستاننىڭ رەۆوليۋتسيالىق ەمەس, ەۆوليۋتسيالىق دامۋى, سانانىڭ اشىقتىعى سەكىلدى باعىتتاردان ەلى مەن جەرىنىڭ كوركەيۋىنە بەلسەندى اتسالىساتىن ازاماتتار ءۇشىن مول مۇمكىندىكتەر بار. ءبارىمىزدى اۋقىمدى جۇمىستار كۇتىپ تۇر. تەك كوزىن تاۋىپ تىڭعىلىقتى دا تياناقتىلىقپەن قويىلعان مىندەتتەردى جۇزەگە اسىرۋ قاجەت. ول ءۇشىن مەملەكەتتىك دەڭگەيدە جۇيەلى دە ساۋاتتى ويلاستىرىلعان جۇمىس جوسپارى, سول جوسپاردى جۇزەگە اسىرۋداعى باقىلاپ وتىراتىن ارنايى مەكەمەنىڭ تۇراقتى جۇمىس ىستەۋى قاجەت دەپ بىلەمىز.
ۇلتتىق رۋحاني قۇندىلىقتى جاسايتىن جازۋشىلار, كلاسسيكالىق مۋزىكا مايتالماندارى, سۋرەتشىلەر جانە كينو سالاسىنىڭ قايراتكەرلەرى, جالپى ونەر سالاسىنىڭ شەبەرلەرى ءۇشىن ماقالادا نازار اۋداراتىن تۇستارىن باسا كورسەتەمىز. ء«بىز ءححى عاسىردىڭ جاھاندىق كارتاسىندا ەشكىمگە ۇقسامايتىن, دەربەس ورنى بار ۇلت بولامىز دەسەك, «جاھانداعى زاماناۋي قازاقستاندىق مادەنيەت» جوباسىن ىسكە اسىرۋعا ءتيىسپىز. الەم ءبىزدى قارا التىنمەن نەمەسە سىرتقى ساياساتتاعى ءىرى باستامالارىمىزبەن عانا ەمەس, مادەني جەتىستىكتەرىمىزبەن دە تانۋى كەرەك», دەگەن ەلباسىنىڭ ويى مەن بەلگىلەنگەن تاپسىرمالارىنىڭ ۇلتتىق مادەنيەتتى دامىتۋداعى ورنى, ونى ۇلتتىق برەند رەتىندە الەمگە ناسيحاتتاۋ ىسىنە جاڭا سەرپىن الارى انىق.
ماقالاداعى ناقتى تاپسىرمانىڭ ءبىرى – ۇلتتىق ونەر مەن مادەنيەت سالاسىنداعى ۇزدىكتەردى الەمگە تانىتۋ. ول ءۇشىن, الدىمەن ءتول تۋىندىلاردى قازاق تىلىنەن جەتەكشى الەم تىلدەرىنە ساپالى اۋدارۋ كەرەك. وتە جاقسى باستاما. م.اۋەزوۆ اتىنداعى ادەبيەت جانە ونەر ينستيتۋتىندا وسىدان ەكى جىل بۇرىن گرۋزين ەلىنەن كەلگەن ارىپتەسىمىزدىڭ ەلىندەگى اۋدارما ورتالىعىنىڭ جەتىستىكتەرى مەن ءىس-تاجىريبەسىنىڭ تيىمدىلىگىن ءبىلىپ, بىزگە دە ارنايى اۋدارما ورتالىعى قاجەتتىگىن ايتىپ جۇرەتىنبىز. بۇل باستامالاردى جۇزەگە اسىرۋ ءۇشىن ارنايى جۇمىس توپتارى قۇرىلىپ, جۇمىستار باستالىپ كەتتى دەپ ەستىدىك. ءتورت نەگىزگى سالا بويىنشا, ياعني ادەبيەت, كلاسسيكالىق مۋزىكا, سۋرەت جانە كينو تۋىندىلارى ىشىنەن ۇزدىكتەرىن تاڭداپ, شەت تىلدەرىنە اۋدارىلاتىن بولادى دەپ كۇتىلۋدە. تەك, بۇل ناۋقاندىق جۇمىس بولىپ قالماي, تۇراقتى جۇمىس كوميسسياسىنىڭ ۇزاق جىلدارعا باراتىن جۇيەلى تۇردە ىسكەرلىكپەن تۇزىلگەن جۇمىسى بولۋى كەرەك.
شەت تىلىنە اۋدارىلاتىن كوركەم تۋىندىلار ەلىمىزدىڭ دامۋ كەزەڭدەرىن, ۇلتتىق بولمىسىمىزدى اشاتىن سۇيەكتى تۋىندىلار بولۋى زاڭدىلىق. شيرەك عاسىر – تاۋەلسىزدىك كەزەڭى دۇنيەگە الىپ كەلگەن شىعارمالار ىشىنەن ۇزدىكتەرى تاڭدالىنۋى كەرەك. ال قاي اۆتور, قانداي شىعارمالار دەگەن ماسەلەدە ءبىرىنشى كەزەكتە شىنايى كوركەمدىك دەڭگەيى مەن ساپاسىنا ءمان بەرىلەدى. بۇعان دەيىنگى قازاق دراماتۋرگياسىنىڭ شەت تىلىنە اۋدارىلۋ ساپاسى مەن تاجىريبەسىنە نازار سالساق, بىزدە اۋدارما جاساۋ تاجىريبەسى «قالىپتاسپاعان, جوق» دەگەن پىكىر قالىپتاستىراتىن وتە وزەكتى ماسەلەگە كەزىگەمىز. ول ءتىپتى ورىس تىلىنە اۋدارۋدا دا دراماتۋرگيا ءتىلىن, ساحناعا قاجەتتى ءتىلدىڭ تامىرىن ءدوپ باسىپ تابا الماي جاتۋىمىز. وزگە تىلدەن قازاقشاعا جاقسى اۋدارامىز. ونى كەزىندە م.اۋەزوۆتىڭ, تاعى باسقا قالامگەرلەرىمىزدىڭ شەكسپير, وستروۆسكي, چەحوۆ سەكىلدى الەم, ورىس دراماتۋرگتەرىنىڭ پەسالارىن قازاقشا سويلەتۋىنىڭ تاماشا ۇلگىلەرىنەن بىلەمىز. ال وزىمىزدىكىن شەت تىلىنە اۋدارۋدا كۇنى بۇگىنگە دەيىن ورنى تولماس ولقىلىق, «اتتەگەن-ايلار» بولاتىن. كاسىبي اۋدارماشى ماماندارىمىز بار, بىراق جانر ەرەكشەلىگىن شەبەرلىكپەن اشاتىنداي جوعارى دەڭگەيدە ەمەس. پوەزيانىڭ, پروزانىڭ وزىنە ءتان كوركەم ءتىلى, ىرعاعى بولاتىنى سەكىلدى, كۇردەلى جانر دراماتۋرگيانى ورىسشا, اعىلشىنشا جاتىق, زاماناۋي ۇلگىدە اۋدارىپتى دەگەن جاڭالىقتى ارمانداۋمەن كەلەمىز. سالانىڭ ساپالى اۋدارماشىلارىن دايىنداۋ ارقىلى, كوركەمدىك دەڭگەيى جوعارى قازاق اۆتورلارىنىڭ شىعارمالارى شەت ەل وقىرماندارى مەن كورەرمەندەرىنە جەتە الادى. اۋدارىلعان شىعارمالار ءوزىنىڭ تۇپنۇسقاداعى ادەبي كوركەمدىك قۇندىلىعى مەن قۇنارلى تىلدىك ەرەكشەلىگىن, ۇلتتىق بولمىس-ءبىتىمىن جوعالتپاۋى كەرەك. جۇمىس توبى مەن ساراپشىلار ىرىكتەپ العان ۇزدىك شىعارمالار وسى جىلدىڭ ەكىنشى جارتىسىندا بۇكىلحالىقتىق تالقىلاۋعا ۇسىنىلادى دەپ كۇتىلۋدە. قازاق وقىرماندارى الەمدىك مادەنيەتتىڭ مۇحيتىنا قوسىلۋعا لايىق دەگەن قازاق اۆتورلارىنىڭ شىعارمالارىنا داۋىس بەرۋ ارقىلى ىرىكتەپ, ونى ءارى قاراي ۇلتتىڭ بولمىسىن اشاتىن كوركەم تۋىندى ەتىپ قالىپتاستىرۋدا وزدەرىنىڭ بەلسەندىلىگىن تانىتادى دەپ بىلەمىن.
ەلباسى ماقالاسىندا ەلىمىزدىڭ جاڭا تەحنولوگيالارعا, جاڭا الەمدىك ساياسي-ەكونوميكالىق احۋالعا نەگىزدەلگەن مۇلدەم جاڭا تاريحي كەزەڭگە اياق باسقانىن ايتا كەلە, ءبىرتۇتاس ۇلت بولۋ ءۇشىن قانداي قاسيەتتەرگە يە بولىپ, قانداي مىندەتتەردى ەڭسەرۋ قاجەتتىگى جونىندە كەڭىنەن وي تولعاعان. زامان تالابىنا ساي كەشەگى مەن بۇگىنگىنى ورنىمەن بايلانىستىرىپ, ۇلتتىڭ رۋحاني كودىنا ارقا سۇيەۋ كەرەكتىگى كورسەتىلەدى. بەلگىلى جازۋشى, قوعام قايراتكەرى الدان سمايىل اعامىزدىڭ جاقىندا «ەگەمەن قازاقستان» گازەتىندە جاريالانعان «ۇلتتىق ءداستۇر − تاريح جازعان اتا زاڭ» اتتى ماقالاسىندا «ۇلتتىق كود دەگەنىمىز نە؟» دەگەن سۇراق قويا وتىرىپ, «ول – ەڭ الدىمەن, انا ءتىلى, سودان كەيىن ونەر مەن مادەنيەت, سالت-ءداستۇر, اتا-بابا ۇستانعان ءدىن. بۇلار جيناقتالا كەلىپ ۇلتتىق مىنەز بەن ۇلتتىق قاسيەتتى قالىپتاستىرادى», دەيدى. رۋحاني قۇندىلىقتاردى قالىپتاستىرۋدا بارشامىز ءۇشىن قاستەرلى سالت-ءداستۇرىمىز, ءتىلىمىز, مادەنيەتىمىز, ءدىنىمىزدى قۇرمەتتەپ, زامانعا ساي دامىتۋ ارقىلى قازاقتىڭ قازاق ەكەندىگىن الەمگە تانىتۋعا بولاتىنىن ەلباسى ماقالاسى ورنىمەن, تياناقتى ەتىپ كورسەتىپ بەرگەن.
ۇلتتىق قۇندىلىقتارىمىزدى ساقتاۋ ارقىلى انا تىلىمىزگە قۇرمەت, ۇلتتىڭ جاڭعىرۋى, جاستارىمىزدى دۇرىس تاربيەلەۋ, ءدىنىمىزدى قادىرلەي ءبىلۋ ءتارىزدى ماسەلەلەرمەن قاتار, قازاق ءتىلىن لاتىن الىپبيىنە كوشىرۋدىڭ وزەكتى تۇستارىنىڭ بارىندە بۇگىنگى كۇننىڭ ماڭىزدى پروبلەمالارىن ءسوز ەتەدى. بۇل ورايدا ماماندار كورشىلەس ەلدەردىڭ تاجىريبەسىن زەرتتەۋدىڭ قاجەتتىلىگىن العا تارتا وتىرىپ جۇمىس ىستەۋ ورنىمەن بولماق. تۇرىك, ازەربايجان, تۇرىكمەن, وزبەك اعايىنداردىڭ سالعان جولىنداعى جەتىستىكتەرى مەن كەمشىن تۇستارىن ەسكەرە وتىرىپ شەشۋ كوپ ءتۇيىندى ماسەلەنى جەڭىلدەتپەك. سونىمەن قاتار, جاڭا الىپبيگە كوشپەس بۇرىن قازاق ءتىلىنىڭ زاڭدىلىقتارىن ەسكەرۋ, ناقتى ىستەردى قولعا الۋ, ءتيىمدى ادىستەمەلەرگە ءمان بەرۋ, تۇركى الەمىمەن تۇتاس بولۋدىڭ العاشقى قادامىن جاساۋ جايىنا نازار اۋداردى.
ءبىرتۇتاس ۇلت بولۋ ماسەلەسى دە ءبىزدى كوپتەن تولعاندىرىپ كەلەدى. ۇلتتىق بىرلىك پەن بىرەگەيلىكتى ساقتاۋدا قازاقتىڭ مۇددەسىن ءبىرىنشى شەپكە شىعارۋدى تۇراقتى نازاردا ۇستاپ, وزگەلەرگە وسى يدەيانى ءتۇسىندىرىپ بەرۋدە كەمشىن تۇستارىمىز بار.
قازاق حالقى نەگىزگى مەملەكەت قۇراتىن حالىق بولا تۇرىپ, الىگە دەيىن ۇلت, دياسپورا, ەتنوس دەگەن الەمدىك قاۋىمداستىق زاڭ جۇزىندە مويىنداعان حالىقارالىق تەرمينولوگيانى ورنىمەن قولدانا الماي كەلەمىز. وسىنداي حالىقارالىق كەڭىستىكتە قالىپتاسقان قۇقىقتىق تەرميندەر, زاڭدار, ءنورماتيۆتى قۇجاتتاردى حالىقتىڭ نازارىن اۋدارا وتىرىپ, ءبىز وزىمىزگە تيەسىلى زاڭدى اتاۋلاردى ساۋاتتى تۇردە دالەلدەي وتىرىپ, وزگەگە جالتاقتاماي ەركىن قولدانىسقا ەنگىزۋىمىز كەرەك. ءبىرتۇتاس ۇلت بولۋ ماسەلەسى رەسپۋبليكادا اركىم ءوز ورنىن, مارتەبەسىن انىقتاعاننان كەيىن تولىققاندى تۇردە جۇزەگە اسپاق.
زامان ۇسىنعان وزىق وي-يدەيالارمەن, الدىڭعى قاتارداعى تەحنولوگيالارمەن قارۋلانا وتىرىپ, ۇلتتىق تامىردان بويعا بىتكەن وزىندىك كەلبەتىمىزدى ۇستاپ قالۋىمىز قاجەت. ءبارىن تەز قابىلداۋعا قابىلەتتى قازاق ءۇشىن ۇلتتىق بولمىستى ساقتاۋ جولىندا ادام ساناسىن ۋلايتىن, تەرىس كوزقاراستاعى كەيبىر اعىمدار مەن يدەولوگيانىڭ تارالىمىن شەكتەۋ ماسەلەسى وتكىر تۇر. وسىعان وراي تاريحشى عالىمنىڭ قازاق ۇلتىنىڭ حال-جايىن ۆيرۋسقا قارسى قويار قالقانى جوق ينتەرنەتكە قوسىلعان كومپيۋتەرمەن تەڭەگەنى ماعان بەينەلى ءارى ناقتىلى مىسال بولىپ كورىندى. بىراق, بىزدە ءبارى جاقسى, كورشىلەرىمىزگە قاراعاندا بارلىق سالادا اناعۇرلىم الدامىز دەپ توقمەيىلسۋ, قازىرگى, ەرتەڭگى كۇنگى قوعام ومىرىنە تونەتىن قاۋىپتى سەزىنبەۋ, كەلەر ۇرپاق الدىنداعى جاۋاپسىزدىق تا جوق ەمەس. ونى ءبىز قوعامعا قاۋىپ ءتوندىرىپ, ءتىپتى ۋشىعىپ كەتكەن ءدىني اعىمداردىڭ بەلسەندى ارەكەتىنەن, ءارتۇرلى جاستاعى قوعام مۇشەلەرىنىڭ ءوز-وزىنە قول سالۋىنان, وزگە ەلدىڭ ۇستانىمدارىنىڭ قازاقستاندىقتاردىڭ ساناسىندا تۇراقتى پىكىر قالىپتاستىرۋىنان, ت.ب. مىسالداردان كورەمىز. بۇل كەلتىرىلگەن مىسالدار جاھاندانۋ ءداۋىرىنىڭ بارلىق قوعامعا تاڭاتىن كورىنىسى دەسەك تە, ەلباسى ايتقان رۋحاني قۇندىلىقتارىمىزدى جاڭعىرتۋ ارقىلى بولاشاققا باعداردى انىقتاپ, سەنىمدى نىق قادام جاساۋعا بولادى. باستالعان ەكەن ۇلى كوش, جۇرىسىنە ساتتىلىك تىلەپ, جۇزەگە اسۋىنا ءبارىمىز ءبىر كىسىدەي اتسالىسايىق.
ويىمىزدى قورىتا كەلگەندە, ەلباسى كەز كەلگەن جاڭعىرۋدىڭ ەڭ الدىمەن, ۇلتتىق بولمىسقا, ءداستۇردىڭ زامانا سىنىنان سۇرىنبەي وتكەن وزىعىنا نەگىزدەلۋىن قاداپ ايتتى. بۇل وزگەرىستەرگە ۇركە قاراپ, تەك قانا وتكەندى جىرلاي بەرۋدەن, جاڭانىڭ ءبارىن قيسىق دەپ تاۋىپ, كەرتارتپالىقتان ادا بولۋدى تالاپ ەتەدى. الەمنىڭ الدىڭعى قاتارلى دامىعان 30 ەلىنىڭ توبىندا كورىنۋگە باعىت ۇستاعان تاۋەلسىز قازاق ەلىنىڭ الدىنا قويعان ماقساتى ايقىن. ولاي بولسا, كەڭەستىك داۋىردەگى توقىراۋ كەزەڭىنىڭ ۇلگىسىمەن ءسوز قۋىپ, ەسەپ بەرۋگە قۇمار ناۋقانشىلدىقتى ەمەس, ناقتىلى ىستەرمەن, قاجىماس قايرات-كۇش جىگەرمەن باستاعان جۇمىسىمىزدىڭ ناتيجەسى ءۇشىن جۇمىس جاسايىق. بارىنە ۋاقىت – سىنشى, كەلەشەك كورسەتەر دەسەك تە, ۇلتتىڭ رۋحاني جاڭعىرۋى جاڭا سەرپىلىستىڭ, بيىك بەلەستەردى باعىندىرۋدىڭ, اسقارالى شىڭدارعا كوتەرىلۋدىڭ ىرگەتاسى ەلباسى ن.نازارباەۆتىڭ وسى ماقالاسىندا كوتەرگەن ويلارىمەن, قاداپ ايتقان تاپسىرمالارىمەن بەرىك قالانعانى انىق. بۇل – ۇلى دالا توسىندە سان ءتۇرلى قيىندىقتاردى باسىنان وتكىزگەن تاۋەلسىز قازاق ەلى مەن حالقىنىڭ ساناسىن وياتاتىن بولاشاققا باعىتتالعان كوش. بۇگىنگى زامان تالاپ ەتكەن بيىكتەن كورىنە وتىرىپ, بولاشاققا باستايتىن تاريحي قۇجات.
امانكەلدى مۇقان,
ونەرتانۋ كانديداتى, تەاترتانۋشى,
م.اۋەزوۆ اتىنداعى ادەبيەت جانە ونەر ينستيتۋتى تەاتر جانە كينو ءبولىمىنىڭ مەڭگەرۋشىسى
