ينۆەستيتسيالار جانە دامۋ ۆيتسە-ءمينيسترى ر.سكلياردىڭ مالىمەتتەرىنە سۇيەنسەك, ايتۋلى شارانى تاماشالاۋعا ەلىمىزدىڭ وڭىرلەرىنەن 1,8 ملن-نان استام ادام كەلەدى دەپ بولجانعان. ەلورداعا تەمىر جول كولىگىمەن 1,1 ملن-عا جۋىق قازاقستاندىق كەلەدى. شامامەن 161 مىڭ ادام اۋە كولىگىمەن, تۇراقتى اۆتوبۋس رەيستەرىمەن 350 مىڭنان استام قوناق كەلۋى ءتيىس. ال جەكە اۆتوكولىكپەن 200 مىڭعا جۋىق كىسى كەلمەك.
ۆيتسە-ءمينيستردىڭ ايتۋىنشا, الداعى ۋاقىتتا جولاۋشىلاردى قارسى الۋ ءۇشىن جاڭا تەمىر جول ۆوكزالى, اۋەجايدىڭ جاڭا تەرمينالى مەن ەكى اۆتوۆوكزال اشىلادى. كورمە قوناقتارىنىڭ باسىم بولىگى تەمىر جولمەن كەلەدى. سول سەبەپتى ماۋسىم ايىنا دەيىن مارشرۋتتار 44-تەن 58-گە دەيىن ۇلعايادى. ول ءۇشىن قوسىمشا 14 جولاۋشىلار پويىزى ىسكە قوسىلادى. سونىڭ ىشىندە «تۇلپار-تالگو» ۆاگوندارىنان قۇرالعان ءتورت پويىز بار. بۇدان بولەك, قازىرگى پويىزدارعا قوسىمشا 150 ۆاگون تىركەلەدى.
«وسىلايشا, ەكى تەمىر جول ۆوكزالى كۇن سايىن 47 مىڭ جولاۋشىنى قابىلداي الادى», دەپ اتاپ ءوتتى رومان سكليار. سونداي-اق, ەكسپو كورمەسى كەزىندە اۆتوبۋستاردىڭ سانى دا ەكى ەسەگە ارتاتىنىن جەتكىزدى.
«جالپى, استاناعا تاۋلىك سايىن شامامەن 20 مىڭ ادام كەلەدى دەپ كۇتىلۋدە. ەكسپو-2017 كەزىندە جولاۋشىلاردى ۇزدىكسىز تاسىمالداۋ ءۇشىن استانادا ەكى جاڭا اۆتوبەكەت اشىلادى, وندا تاۋلىك سايىن ەلىمىزدىڭ وڭىرلەرىنەن 400-گە دەيىن اۆتوبۋس كەلەدى», دەدى ر.سكليار. الدىن الا ەسەپتەۋ بويىنشا, ەكسپو-2017 كەزىندە وبلىستاردان استاناعا اۆتوبۋستارمەن 472 مىڭنان استام ادام نەمەسە تاۋلىگىنە 5 مىڭنان استام مەيمان كەلۋى مۇمكىن.
ايتقانداي, «ساپارجاي استانا» اۆتوۆوكزالى اعىمداعى رەيستەرگە قىزمەت كورسەتەدى, سوندىقتان ەلوردانىڭ تۇرعىندارى مەن قوناقتارى ءۇشىن داعدىلى باعدارلار وزگەرىسسىز قالماق. ال قوسىمشا اشىلعان رەيستەرگە جاڭا اۆتوبەكەتتەردە قىزمەت كورسەتىلەدى. ماسەلەن, اعىمداعى جىلدىڭ 1 ماۋسىمىنان باستاپ «الاي» اۆتوبەكەتى جۇمىس جاساي باستايدى, وندا سولتۇستىك جانە باتىس وڭىرلەردەن – كوكشەتاۋ, پەتروپاۆل, قوستاناي, پاۆلودار, تالدىقورعان, ورال, اقتوبە, وسكەمەننەن كەلەتىن قوسىمشا اشىلعان رەيستەرگە قىزمەت كورسەتىلەدى.
ەكىنشى اۆتوبەكەت «كەڭ مارت» – وڭتۇستىك جانە ورتالىق وڭىرلەردەن, ياعني الماتى, شىمكەنت, تاراز, قىزىلوردا, قاراعاندىدان كۇنىنە 34 رەيس قابىلدايدى.
قازىرگى تاڭدا اۆتوتاسىمالداردى ۇيىمداستىرۋ جۇمىسىن جەدەل رەتتەۋ ماقساتىندا ينۆەستيتسيالار جانە دامۋ مينيسترلىگىنىڭ كولىك كوميتەتى مەملەكەتتىك نومىرلەرى, يەلەرى, سىيىمدىلىعى جانە شىعارىلعان جىلى كورسەتىلگەن اۆتوبۋستار ءتىزىمىن جاساپ جاتىر ەكەن.
ر.سكليار جالپى استاناداعى ەكسپو-2017 حالىقارالىق كورمەسى كەزىندە كولىك كەپتەلەگى بولماۋى تيىستىگىن, الايدا قانداي دا ءبىر قولايسىز جاعدايلار بولىپ قالىپ جاتسا, استانالىقتار شىدامدىلىق تانىتۋى كەرەكتىگىن ەسكە سالدى. «ەستەرىڭىزدە بولسا, تۇران داڭعىلى بولماعاندا ءبارىمىز اۋەجايعا قابانباي باتىر داڭعىلىمەن بارىپ جۇردىك. قازىر تۇران دا بار, ماڭگىلىك ەلمەن دە اۋەجايعا جەتۋگە بولادى. قابانباي باتىردىڭ قوزعالىسى ءبىراز جەڭىلدەنىپ قالدى. سوندىقتان استانانىڭ كولىك كەشەنىن دامىتۋ شارالارى ويداعىداي اتقارىلىپ جاتىر دەۋگە بولادى. ەكسپو-عا دەيىن قالا كوشەلەرى تاپ-تۇيناقتاي بولۋى قاجەت.
ارينە, قالادا تۇرىپ جاتقان ادامدار ءۇشىن ءبىراز قولايسىزدىقتار بولۋى ابدەن مۇمكىن. دەگەنمەن, ودان دا ءتوزۋ كەرەك. ەندى وعان ۇيگە قوناق كەلگەندەي قاراۋ قاجەت دەپ ويلايمىن. ءۇش بولمەلى ءۇيدىڭ ەكى بولمەسىنە قوناقتار جايعاسقاندا قالاي جۇرەمىز, تۋرا سولاي ۋاقىتشا شىداي تۇرۋعا تۋرا كەلەدى. وعان تۇسىنىستىكپەن قارايىق», دەدى سكليار.
دينارا بىتىكوۆا,
«ەگەمەن قازاقستان»
