20 مامىر كۇنى كەشتە اقتاۋ قالاسىندا تەڭىز جاعالاۋىندا دودانىڭ سالتاناتتى اشىلۋى ءوتتى.
-الەم كۋبوگى كەزەڭى بىرنەشە ەلدىڭ باسىن بىرىكتىرەدى. ولاردىڭ مادەنيەتىن, سپورتىن, تانىمى مەن رۋحاني مۇراسىن ءبىر-بىرىمەن ۇشتاستىرادى. الدا قيىندىققا تولى, تاباندىلىق پەن كۇش-جىگەردى قاجەت ەتەتىن مىڭداعان شاقىرىم جاتىر. سىزدەر سپورتشى رەتىندە ناعىز كاسىبيلىكتەرىڭىزدى, مىقتىلىقتارىڭىزدى دالەلدەپ, كورەرمەندەرگە ۇمىتىلماس اسەر سىيلايسىزدار. الداعى ۋاقىتتا جارىستىڭ قاتىسۋشىلار سانى ارتىپ, ءداسۇرلى تۇردە وتكىزىلەتىنىنە سەنىمدىمىز, دەدى قۇتتىقتاۋ سوزىندە ماڭعىستاۋ وبلىسىنىڭ اكىمى ە.توعجانوۆ.
«راللي قازاقستان-2017» التى كەزەڭنەن تۇرادى. بارلىعى 2494 شاقىرىمدىق جولدىڭ 1846 شاقىرىمى جەدەل ءجۇرۋ ايماقتارى بولىپ تابىلادى. ەكيپاجدار T1- ساپاسى جاقسارتىلعان سەريالى اۆتوموبيلدەر, T2 – سەريالىق ۇلگىدەن وزگە جەڭىل اۆتوموبيلدەر جانە T3- جەڭىلدەتىلگەن اۆتوموبيلدەر جانە ۇلتتىق كلاسس باعىتتار بويىنشا جۇرەدى. دوداعا قاتىسۋشىلار اراسىندا كاتار ەلىنەن كەلگەن Nasser Al-Attiya مەن Mohammed Abu Issa, ساۋد ارابيالىق Yazeed AI-Rajhi, پولشادان كەلگەن Aron Domzala, چەحيالىق سپورتشى Miroslav Zapletal سىندى الەمگە تانىمال سپورتشىلار بار.
-قازاقستان رەسپۋبليكاسى اۆتوموتوسپورت فەدەراتسياسى راللي رەيدتەن الەم كۋبوگى كەزەڭىن العاش رەت وتكىزىپ وتىر. بۇل – جىل سايىن ءار مەملەكەتتە وتكىزىلەتىن كوپكەزەڭدى جارىس. وسى جىلى ايتۋلى شارانى ءبىزدىڭ ەلىمىزدە وتكىزۋ مۇمكىندىگى تۋدى. دۇنيەجۇزىلىك دودانىڭ تاريحىنا ەنۋ - ۇيىمداستىرۋشىلار ءۇشىن عانا ەمەس, ەلىمىز ءۇشىن دە ۇلكەن مارتەبە, دەدى قر اۆتوموتوسپورت فەدەراتسياسىنىڭ پرەزيدەنتى م.ابىقاەۆ.
سايىستى وتكىزۋگە ماڭعىستاۋ جەرىنىڭ تاڭدالۋى تەگىن ەمەس. ارحەولوگيالىق قورىقتارى, مەملەكەتتىك دەڭگەيدە قورعاۋعا الىنعان 11 مىڭ تاريحي ەسكەرتكىشتەرى بار ەجەلگى وركەنيتەتتىڭ مەكەنى بولعان ماڭعىستاۋ بەكەت اتا, شاقپاق اتا, ماسات اتا سەكىلدى كيەلى ورىندارىمەن دە ەرەكشەلەنەدى. راللي-رەيد ەجەلدە « ۇلى جىبەك جولى» كەرۋەن جولى جۇرگەن, تەڭىز دەڭگەيىنەن 132 مەتر تومەندە ورنالاسقان, الەمدە تەرەڭدىگى جونىنەن 4-ءشى ورىن الاتىن قاراقيا ويپاتى ارقىلى وتەدى. كەدەرگىگە تولى ويپات جولى جارىس ءۇشىن وتە قولايلى. الەمدىك موتو-دودانىڭ ءوتۋى - كيەلى ءوڭىردىڭ سۇلۋ تابيعاتىن, تاريحي ورىندارى مەن مادەنيەتىن وزگە ەلدەرگە تانىتۋعا جاسالعان مۇمكىندىك.
گۇلايىم شىنتەمىرقىزى,
«ەگەمەن قازاقستان».
اقتاۋ.
سۋرەت «لادا» سايتىنان الىندى
