قازاق ۇلتتىق اگرارلىق ۋنيۆەرسيتەتىندە 2004 جىلدان بەرى «ولجاس سۇلەيمەنوۆ اتىنداعى الەۋمەتتىك-گۋمانيتارلىق ءبىلىم بەرۋ جانە تاربيە ينستيتۋتى» جۇمىس ىستەپ كەلەدى. وسىندا وقيتىن ستۋدەنتتەرمەن ءجيى كەزدەسىپ, ءارتۇرلى شارالارعا قاتىسىپ تۇراتىن ولجاس ومار ۇلىنىڭ ادەبيەت پەن مادەنيەت, رۋحانيات پەن بەيبىتشىلىك ماسەلەسى, ەلىمىزدىڭ ەكولوگيالىق پروبلەمالارى جانە جوعارى وقۋ ورىندارىنىڭ حالىقارالىق ءبىلىم كەڭىستىگىنە كىرۋى توڭىرەگىندەگى پايىمداۋلارى بىلايعى جۇرت ءۇشىن قول جەتە بەرمەيتىن دۇنيە ەكەنى انىق. ۋنيۆەرسيتەت رەكتورى, ۇعا ۆيتسە-پرەزيدەنتى, اكادەميك تىلەكتەس ەسپولوۆ كەزدەسۋدە: «جاستاردىڭ زامانعا ساي, الەمدىك دەڭگەيدەگى ءبىلىم مەن عىلىمدى يگەرۋىنە, رۋحاني بيىككە كوتەرىلۋىنە بارىنشا جاعداي جاساپ وتىرمىز. سوندىقتان, ۋنيۆەرسيتەت جاستارىن ولجاس اقىننىڭ رۋحىندا, ونىڭ زور تۇلعاسى مەن ازاماتتىق, ادامي قاسيەتتەرى ۇلگىسىندە تاربيەلەۋدى تاڭدادىق. بۇل باعىتتاعى جۇيەلى جۇمىستارىمىز ءوز جەمىسىن بەرىپ كەلەدى», دەدى.
«ولجاس جانە جاستار» تاقىرىبىندا وتكەن پوەزيا فەستيۆالىندە اقىننىڭ ولەڭدەرى وقىلىپ, شىعارماشىلىعى نەگىزىندە كورىنىستەر قويىلدى. ستۋدەنتتەر ءوز كەزەگىندە اقىنعا سۇراق قويىپ, سۇحبات قۇرۋعا دا مۇمكىندىك الدى.
پوەزيا كەشىنەن 8 جاسار قىزدى پەدوفيلدەن قۇتقارىپ العان وقۋشى تيمۋربەك ءجامالاددينوۆتى كەزدەستىردىك. سويتسەك, ءبىلىم جانە عىلىم مينيسترلىگى ارنايى تاعايىنداعان جوو گرانتىنا وسى قازۇاۋ-دى تاڭداپتى. «ولجاس جانە جاستار» فەستيۆالىنە اقىنمەن بىرگە قوناق رەتىندە قاتىسقان 11-سىنىپ وقۋشىسى اقىننىڭ ءوز قولىنان سىيلىق الدى.
سونداي-اق, 19-21 مامىر ارالىعىندا ۋنيۆەرسيتەتتىڭ ۇلكەن سپورت كەشەنىندە ارداگەرلەر اراسىندا ۆولەيبولدان ءداستۇرلى «ولجاس سۇلەيمەنوۆ جۇلدەسى» ءتۋرنيرى وتەدى. اقىننىڭ ءوزى دە وينايتىن بۇل جارىسقا وزبەكستان, قىرعىزستان ەلدەرىنىڭ كوماندالارىمەن قاتار, تاراز, تالدىقورعان, شىمكەنت, قىزىلوردا قالالارى, ەۋرازيا تەحنولوگيالىق ۋنيۆەرسيتەتى مەن قازاق ۇلتتىق اگرارلىق ۋنيۆەرسيتەتىنىڭ كوماندالارى قاتىسادى.
الماس ءنۇسىپ,
«ەگەمەن قازاقستان»
الماتى
