كاسىپقوي PR-شىلاردىڭ ەسىندە بولسا, بۇل فورۋم تۇڭعىش رەت 2004 جىلى ۇيىمداستىرىلعاندا, بار بولعانى 70 شاقتى ادام جينالعان ەدى. بۇگىندە PR-فورۋم ەلىمىزدەگى پيارشىلاردىڭ ەڭ كاسىپقوي كوممۋنيكاتسيالىق الاڭى بولىپ تابىلادى.
ەندىگى تاڭدا ءداستۇرلى فورۋمعا قاتىسۋعا مۇددەلىلىك تانىتاتىن PR-مەنەدجەرلەر, ءوز ءىسىن العا جىلعىسى كەلەتىن كومپانيالار از ەمەس. ال فورۋمنىڭ ايتۋلى قوناعى, ICCO پرەزيدەنتى ماكسيم بەحار PR, ياعني كوممۋنيكاتسيانىڭ الەمدەگى ەڭ عاجايىپ, قۇبىلىپ تۇراتىن بيزنەس ەكەندىگىن ايتادى.
بيىلعى فورۋمعا 250-گە جۋىق PR-سالاسىنىڭ وتاندىق جانە شەتەلدىك جەتەكشى ماماندارى, مەملەكەتتىك جانە بيزنەس-قۇرىلىمداردىڭ توپ-مەنەدجەرلەرى, ماركەتولوگتار, جۋرناليستەر قاتىسۋدا. جانە كوپشىلىك ادەتتەگى جيىندارداي فورۋمدى جارتىسىنان تاستاپ كەتكەن جوق.
كۇننىڭ العاشقى جارتىسىندا بىلتىرعى فورۋم مەن بيىلعى فورۋم ارالىعىنداعى ورايى كەلمەگەن PR-جوبالار, ماسس-مەديادا وقشاۋ قىلىقتارىمەن كورىنگەن تۇلعالار, حالىق تاراپىنان تۇسىنىستىك تاپپاعان مەملەكەتتىك باستامالار تۋرالى ءسوز بولدى. مامانداردىڭ ايتۋىنشا, ساتسىزدىككە ۇشىراعان ءىرى جوبالاردىڭ استارىندا كوپ جاعدايدا دۇرىس جانە ءتيىمدى كوممۋنيكاتسيا قۇرا بىلمەۋ جاتىر. جانە بۇل جاعدايلاردىڭ ەكونوميكاعا دا, ساياساتقا دا قاتىسى بار. ايتپەسە سوزىنەن جاڭىلىپى جۇرگەن مينيسترلەر, وعاش سويلەپ قوياتىن شەنەۋنىكتەر شىن مانىندە سونشالىقتى اقىماق ەمەس.
قازاقستان ءباسپاسوز كلىبىنىڭ ديرەكتورىنىڭ ورىنباسارى ساكەن بالباەۆ پەن informburo.kz باس رەداكتورى ميحايل دوروفەەۆ مودەراتورلىق ەتكەن PR-فورۋمنىڭ العاشقى جارتىسىندا 2016 جىلى ساتسىزدىككە ۇشىراعان PR-جوبالاردىڭ رەيتينگى جاسالدى. نەگىزگى پلەنارلىق وتىرىستا ۆ2س باسقارۋشى سەرىكتەسى الەكساندر دانيلوۆ توپ باستاعان توپ-10 كورسەتكىشىن جاساپ, اقپارات ايدىنى مەن الەۋمەتتىك جەلىلەردە جۇرتقا كەلەمەج بولعان كەلەڭسىز وقيعالار رەيتينگى ءسوز بولدى. جانە مۇنداي جاعدايلاردىڭ نەگە ورىن الىپ جاتقانى قىزۋ تالقىلانىپ, سپيكەرلەر تاراپىنان وعان ءادىل باعا بەرىلدى.
سپيكەرلەر دوسىم ساتپاەۆ, اسەل قاراۋىلوۆ, راحىم وشاقباەۆتار, ايدوس سارىم, الىشەر ەلىكباەۆ قازىرگى ماسس-مەدياداعى ەڭ كوكەيكەستى ماسەلەلەرگە قاتىستى كوزقاراستارىمەن ءبولىستى.
ەكىنشى پلەنارلىق وتىرىس PR سالاسىنداعى حالىقارالىق جانە جەرگىلىكتى ترەندتەرگە ارنالدى. ەلگە ينۆەستيتسيا تارتۋ, جارناما مەن PR-دىڭ اراجىگى, ەكونوميكانىڭ بارلىق سالاسىنداعى كومپانيالاردىڭ قىزمەتى مەن بەدەلىنە قاتىستى ماركەتينگتىك زەرتتەۋلەر فوۋرمعا قاتىسۋشىلاردىڭ نازارىنا ۇسىنىلدى.
ايناش ەسالي,
«ەگەمەن قازاقستان».
الماتى
