توعىزقۇمالاق تۋرنيرىنە الماتى قالاسىنىڭ جۋرناليستەرىنەن بولەك, استانا, قىزىلوردا وبلىسى, وڭتۇستىك قازاقستان وبلىسى, الماتى وبلىسىنىڭ وكىلدەرى قاتىستى. جالپى سانى 10 جۇپ – 20 جۋرناليست باق سىنادى. ويىنعا توعىزقۇمالاقتان ۇلتتىق قۇرامانىڭ باس باپكەرى اينۇر جاقاپباەۆا مەن ءبىرىنشى دارەجەلى تورەشى ازامات قالدىباەۆ تورەلىك ەتتى.
نۇرتورە ءجۇسىپ,
«ايقىن» گازەتىنىڭ باس رەداكتورى:
–بۇگىنگى وتكىزىلىپ جاتقان تۋرنير ەلباسىنىڭ «بولاشاققا باعدار: رۋحاني جاڭعىرۋ» ماقالاسىمەن ورايلاس كەلەدى عوي دەپ ويلايمىن. ويتكەنى ۇلتىمىزدىڭ بارلىق اسىل قاسيەتىن كەيىنگى جاس ۇرپاق بويىنا ءسىڭىرۋى قاجەت. توعىزقۇمالاقتى اقپارات مايدانىنىڭ الدىڭعى شەبىندە جۇرگەن جۋرناليستەر ويناسا, «اقىلىنا-اقىل, ناقىلىنا ناقىل قوسىلماي ما؟» دەگەن وي بار. سوندىقتان وسى ءتۋرنيردى وتكىزۋگە نيەت ەتىپ, العاش رەت باستاپ وتىرمىز. ءتۋرنيردىڭ ءساتتى ءوتۋى ارىپتەستەرىمىزدىڭ بەلسەنە قاتىسۋىنا بايلانىستى. جۋرناليستەر ولجالى بولىپ, وزا شاۋىپ جاتسا – بارىمىزگە دە قۋانىش. جارىستىڭ ءساتتى وتۋىنە حالىقارالىق توعىزقۇمالاق فەدەراتسياسىنىڭ پرەزيدەنتى ءاليحان بايمەنوۆا مىرزا تىلەكتەستىگىن ءبىلدىرىپ وتىر. توعىزقۇمالاق الەم حالقى وينايتىنداي ەتىپ, كومپيۋتەرلىك جۇيەگە ەنگىزىلدى. بۇل قازاقتىڭ ۇلتتىق ويىنىنىڭ مەرەيلى بيىككە كوتەرىلگەنى. مۇنى ءبارىمىز دە قۋانا قولداۋىمىز قاجەت. سونداي-اق, «قازاقتىڭ ۇلتتىق سپورت تۇرلەرى قاۋىمداستىعى» پرەزيدەنتى بەكبولات تىلەۋحان مىرزا دا ۇلتتىق ويىن تۇرلەرىن دامىتۋعا بەلسەنە اتسالىسىپ جۇرگەنىن ءبارىڭىز دە جاقسى بىلەسىزدەر. بۇل جولى دا قاۋىمداستىق جۋرناليستەر اراسىندا ءوتىپ جاتقان سايىسقا دەمەۋشىلىك جاساپ وتىر. سوندىقتان جۇلدە قورى قوماقتى. الماتى قالاسىنىڭ اكىمدىگى دە جارىسىمىزعا قولداۋ ءبىلدىردى. تەك اقىلمەن, ويمەن, قيسىنمەن, توعىزقۇمالاقتىڭ تارتىستى وتۋىنە اتسالىسۋىمىز قاجەت.
ۇزدىك شىققاندار مەن ويىن بارىسىندا جاقسى ناتيجە كورسەتكەندەرگە دەمەۋشىلەر تاراپىنان باعالى سىيلىقتار تابىس ەتىلدى. اتاپ ايتقاندا, «ايقىننىڭ» ىنتالاندىرۋ سىيلىعىنا گۇلميرا ايماعانبەت («استانا اقشامى» گازەتى), ومىربەك سانسىزباەۆ (massaget.kz) جانە اسحات شوتاەۆ (وقو, بلوگەر) يە بولدى. «قامشى» اقپاراتتىق پورتالىنىڭ ءتىلشىسى الينا بولاتبەك «ۇزدىك ويىنشى» اتانسا, قازاست ءباسپاسوز حاتشىسى بانۋ نۇسىپوۆاعا دەمەۋشىلەردىڭ ارنايى سىيلىعى تابىس ەتىلدى. جۇلدەلى ءۇشىنشى ورىندى «ۇركەر» جۋرنالىنىڭ ءتىلشىسى نۇرلان قۇمار, ەكىنشى ورىندى بلوگەر باقىتجان قادىلبەك يەلەندى. «وڭتۇستىك قازاقستان» گازەتىنىڭ ءتىلشىسى عابيت ساپاربەكوۆ جۇزدەن جۇيرىك شىعىپ, باس بايگەنى جەڭىپ الدى. جەڭىس تۇعىرىنان كورىنگەن جۇلدەگەرلەرگە اقشالاي سىيلىق, باس جۇلدە يەگەرىنە تۇركيانىڭ انتالياسىنا ەكى ادامعا ۇشاق بيلەتى تابىستالدى.
«ايقىن» گازەتى مۇشەل جاسىنا وراي «13 جىلدىققا – 13 شارا» اتتى باستاما كوتەرگەن بولاتىن. وسىعان دەيىن ءتۇرلى تۋرنيرلەر, كەزدەسۋلەر وتكىزىلدى. الدا ءالى التى شارا بار. ءار جارىستان كەيىن قاتىسۋشىلار «ايقىن ەندى قانداي تۋرنير ۇيىمداستىرار ەكەن؟» دەگەن ويمەن تارقاسادى. قازاقتىڭ ەسكى سالتى – مۇشەل تويىن وتىز كۇن ويىن, قىرىق كۇن تويىن تويلاپ وتكەرەتىن گازەت ۇجىمىنىڭ ايتۋىنشا, باسەكەگە تولى بايگەلەر ەندى باستالادى.
