مەملەكەت باسشىسى وسى باعىتتاعى تيىمدىلىگى جوعارى, پەرسپەكتيۆالى تەتىكتەردى اتاپ كورسەتكەن. سونىڭ ىشىندە ۇلتتىق ينۆەستيتسيالىق جانە ەكسپورتتىق ستراتەگيالاردى ازىرلەۋ مەن قابىلداۋ, «Kazakh Invest» جانە «Kazakh Export» ينۆەستيتسيالار مەن ەكسپورت جونىندەگى ۇلتتىق كومپانيالاردى قۇرۋ, سونداي-اق, سىرتقى ساۋدا ماسەلەلەرى بويىنشا ۇكىمەت قۇرىلىمىندا وكىلەتتىكتەردى قايتا ءبولۋ, دەپ حابارلايدى ۇكىمەت باسشىسىنىڭ رەسمي سايتى.
قايرات ءابدىراحمانوۆتىڭ ايتۋىنشا, قازاقستاندا ينۆەستورلارمەن بارلىق دەڭگەيدە ءوزارا ءىس-قيمىل ورناتاتىن ءتيىمدى ينستيتۋتتار قۇرىلعان.
«مەملەكەت باسشىسىنىڭ توراعالىعىمەن جۇيەلى تۇردە شەتەل ينۆەستورلارى كەڭەسىنىڭ وتىرىسى وتكىزىلىپ تۇرادى, كەزەكتى وتىرىس استانادا ەكسپو-2017 وتكىزۋ بارىسىندا وتەدى. قر پرەمەر-ءمينيسترى باسشىلىق ەتەتىن ينۆەستيتسيالىق احۋالدى جاقسارتۋ كەڭەسى مەن «ينۆەستيتسيالىق شتاب» دەپ اتالاتىن ينۆەستورلاردى تارتۋ ماسەلەلەرى جونىندەگى ۇكىمەتتىك كەڭەس جۇمىس ىستەيدى. سونىمەن قاتار ينۆەستيتسيالىق ومبۋدسمەن ينستيتۋتى قىزمەت كورسەتەدى», - دەدى ق. ءابدىراحمانوۆ.
مينيستر مەملەكەتتىك ورگانداردىڭ بىرلەسىپ اتقارعان جۇمىستارىنىڭ ناتيجەسىندە قازاقستانعا 2005-2016 جىلدار ارالىعىندا 242 ملرد دوللار تىكەلەي شەتەل ينۆەستيتسيالارى تارتىلعانىن, سونىڭ ىشىندە وتكەن جىلى 20,6 ملرد دوللار تارتىلعانىن مالىمدەدى.
2016 جىلى شەتەلدە ساۋدا-ەكونوميكالىق جانە ينۆەستيتسيالىق تاقىرىپتا 300-دەن استام شارا وتكىزىلدى, شەتەلدىك دەلەگاتسيالاردىڭ قازاقستانعا جانە ەكونوميكالىق قازاقستاندىق دەلەگاتسيالاردىڭ ءتۇرلى شارالارعا قاتىسۋعا, سونداي-اق الەۋەتتى سەرىكتەستەرمەن ارنايى كەزدەسۋلەر مەن كەلىسسوزدەر وتكىزۋ ءۇشىن شەت ەلدەرگە 600-دەن استام جۇمىس ساپارى ۇيىمداستىرىلعان.
