«جەرگىلىكتى نىساندار مەن ەلدى مەكەندەرگە باعىتتالعان «تۋعان جەر» باعدارلاماسىنان بولەك, ءبىز حالىقتىڭ ساناسىنا ودان دا ماڭىزدىراق – جالپىۇلتتىق قاسيەتتى ورىندار ۇعىمىن ءسىڭىرۋىمىز كەرەك. ول ءۇشىن «قازاقستانىڭ قاسيەتتى رۋحاني قۇندىلىقتارى» جوباسى كەرەك», دەگەن بولاتىن ەلباسى ءوزىنىڭ «ەگەمەن قازاقستاندا» جارىق كورگەن «بولاشاققا باعدار: رۋحاني جاڭعىرۋ» اتتى ماقالاسىندا. وسى جوبانى جۇزەگە اسىرۋ ماقساتىندا, وبلىس اكىمدىگى مەن وبلىستىق سوت جانە «نۇر وتان» پارتياسى وبلىستىق فيليالىنىڭ ۇيىمداستىرۋىمەن بۇدان ەكى جىل بۇرىن وبلىستىق سوت وتكىزگەن «بيلەرگە تاعزىم» ۆەلوشەرۋى ءداستۇرلى تۇردە جالعاسىن تاۋىپ, ورداباسى الاڭىنان باستالدى. بۇعان وبلىستىق, اۋداندىق سوتتاردىڭ سۋديالارى مەن وبلىس اكىمدىگىنىڭ, «نۇر وتان» پارتياسى وبلىستىق فيليالىنىڭ باسشىلارى جانە جەرگىلىكتى ءماسليحات دەپۋتاتتارى مەن جاستار, بارلىعى 120-دان استام ادام قاتىستى.
وڭتۇستىك قازاقستان وبلىستىق سوتىنىڭ توراعاسى نۇرسەرىك ءشارىپوۆ: «بيىلعى شەرۋ مەملەكەت باسشىسىنىڭ ماقالاسىنداعى رۋحاني جاڭعىرۋدى ىسكە اسىرۋدىڭ ناقتى ءبىر كورىنىسى ءارى «ماڭگىلىك ەل» يدەياسى اياسىندا ۇلى دالانىڭ تاريحىن, سونىڭ ىشىندە 1726 جىلى قازاق بالاسىنىڭ باسىن بىرىكتىرگەن ورداباسى تاۋىنداعى تاريحي جيىندى ناسيحاتتايتىن ماڭىزدى ءىس-شارا ەكەنى انىق», دەدى.
تۇسكە تاياۋ ۆەلوسيپەدشىلەر رەسپۋبليكالىق «ۇلتتىق تاريحي-مادەني قورىعىنداعى» مارەگە جەتىپ, ولاردى ورداباسى اۋدانىنىڭ باسشىلىعى مەن اۋىل تۇرعىندارى سالتاناتتى جاعدايدا قارسى الدى.
ودان ءارى ورداباسى تاۋىنداعى «بىرلىك» مونۋمەنتىندە جيىن ءوتىپ, ە.سادىر, ا. مامىتبەكوۆ, ن.ءشارىپوۆ, ءو. مەلدەحانوۆ ماڭىزدى جوبانىڭ ۇلى دالانىڭ تاريحىن, سونىڭ ىشىندە بۇدان 291 جىل بۇرىن وتكەن ورداباسى تاۋىنداعى تاريحي جيىندى ناسيحاتتاۋداعى ماڭىزدىلىعىنا جانە جاستاردى وتانسۇيگىشتىككە تاربيەلەۋدەگى مانىنە ايرىقشا توقتالىپ ءوتتى. شارا سوڭىندا اۋىلدىڭ يمامى ايدوس ابىلايحان ۇلى بابالار رۋحىنا ارناپ قۇران باعىشتادى.
قابىل دۇيسەنبي
شىمكەنت
