پلاسيدو دومينگونىڭ «وپەراليا» كونكۋرسىنا قاتىسۋ ساڭلاقتار ءۇشىن ونەردىڭ ەڭ بيىك ولشەمى بولىپ تابىلادى. بۇل – ەجەلدەن تاستاي قالىپتاسقان قاعيدا. سول سەبەپتى دە بالاۋسا قانات بالعىن ۇندەر ساحنا بيىگىن باعىندىرۋ جولىندا اۋەلى وسى بايگەنىڭ مارەسىن سىزۋ مارتەبەسىنە يە بولۋدى ارماندايدى. ايتايىق دەگەنىمىز, بيىل بۇل سايىس 25-ءشى رەت الامان بايگەنىڭ الاۋىن تۇتاتقالى وتىر. «پاي-پاي, جيىرما بەس» دەپ اساۋ شاقتى اسەم جىرعا ارقاۋ ەتكەن قازاق ءۇشىن ارينە, ساندا تۇرعان ەشتەڭە بولماۋى مۇمكىن, الايدا, بايقاۋدىڭ مەرەكەلىك جىلىنا وراي ونىڭ ەلوردادا وتەتىنى ەل ومىرىندەگى ايتۋلى وقيعا بولىپ سانالادى. بۇعان الەمنىڭ 17 ەلىنەن 40 دارىندى ۆوكال شەبەرى قاتىسپاق. ايتا كەتەتىن جايت, «وپەراليا» بۇكىلالەمدىك بايقاۋى «Rolex» كومپانياسى دەمەۋشىلىگىمەن ۇيىمداستىرىلماق. قازاقستاندىق جانكۇيەرلەر ءۇشىن مۇنىڭ تاعى ءبىر ەرەكشە نازار اۋدارتار تۇسى, بايقاۋدا «استانا وپەرا» تەاترىنىڭ ءسوليسى, كوپتەگەن حالىقارالىق بايقاۋلاردىڭ لاۋرەاتى ماريا مۋدرياكپەن قوسقاندا ءتورت بىردەي قازاقستاندىق ونەر كورسەتەدى.
ايگىلى وپەرا ءانشىسى جانە ديريجەر پلاسيدو دومينگونىڭ يدەياسىمەن قۇرىلعان الەمدەگى ەڭ بەدەلدى وپەرا بايقاۋى – «وپەراليا» جوباسى قازاقستان رەسپۋبليكاسىنىڭ مادەنيەت جانە سپورت مينيسترلىگىنىڭ قولداۋىمەن ەكسپو-2017 باعدارلاماسى اياسىندا وتكىزىلگەلى وتىر. قۇرمەتتى قوناق رەتىندە شاقىرىلعان ساڭلاقتار ساپىندا وتاندىق مايتالمان شەبەرلەردەن كسرو حالىق ءارتىسى بيبىگۇل تولەگەنوۆا بار.
اشىق جانە ادىلەتتى وتۋىنە باسا ءمان بەرىلگەن بايگەنىڭ تاعى ءبىر ارتىقشىلىعى, بارىنەن بۇرىن كورەرمەن تالابىنىڭ ءبىرىنشى ورىنعا قويىلعاندىعى. جانكۇيەرلەر ءۇشىن بارلىق كەزەڭگە ەسىك اشىق. شيرەك جانە جارتىلاي فينال كەزەڭدەرى 24, 25 جانە 26 شىلدەدە تىڭدالىم تۇرىندە وتەدى دەپ كۇتىلۋدە. قاتىسۋشىلار الەمدىك وپەرا كلاسسيكاسىنان وزدەرى تاڭداپ العان اريالاردى «وپەراليا» كونتسەرتمەيستەرلەرى سۇيەمەلدەۋىمەن ورىندايدى. 29 شىلدەدە وتەتىن فينالدا ون ۇمىتكەر ماەسترو دومينگونىڭ ءوزى جەتەكشىلىك ەتەتىن «استانا وپەرا» سيمفونيالىق وركەسترى سۇيەمەلدەۋىمەن باق سىنايدى.
قالىپتاسقان ءداستۇر بويىنشا قاتىسۋشى جاستاردىڭ ونەرى شەتەلدىك جەتەكشى تەاترلاردىڭ وكىلدەرى ەنگەن قازىلار القاسى شەشىمىمەن باعالانادى. ولاردىڭ قاتارىندا كارلو فەليچە تەاترىنىڭ كوركەمدىك جەتەكشىسى (گەنۋيا, يتاليا), «استانا وپەرا» تەاترىنىڭ شاقىرىلعان ديريجەرى دجۋزەپپە اكۋاۆيۆا, مەتروپوليتەن-وپەرانىڭ كوركەمدىك اكىمشىسى دجوناتان فرەند (نيۋ-يورك, اقش), ۆەنا مەملەكەتتىك وپەراسىنىڭ ديرەكتورى دومينيك مەيەر (اۆستريا), كوۆەنت-گاردەن كورولدىك وپەرا تەاترىنىڭ كاستينگ-ديرەكتورى پيتەر ماريو كاتونا (لوندون, ۇلىبريتانيا), پاريج ۇلتتىق وپەراسىنىڭ كاستينگ-ديرەكتورى يلياس تسەمپەتونيديس (فرانتسيا), كورولدىك تەاتردىڭ كوركەمدىك جەتەكشىسى جوان ماتابوش, رەجيسسەر مارتا دومينگو (مادريد, يسپانيا), چيكاگو ليريكالىق وپەراسىنىڭ باس ديرەكتورى ەنتوني فرەيد (اقش), باس ديرەكتور-سوفيا پاتشايىمنىڭ ونەر سارايىنىڭ كوركەمدىك جەتەكشىسى داۆيد ليۆەرمور (ۆالەنسيا, يسپانيا), باۆاريا مەملەكەتتىك وپەراسىنىڭ (ميۋنحەن, گەرمانيا), گلايندبورندىق وپەرا فەستيۆالىنىڭ ( ۇلىبريتانيا), ليلل وپەرالىق تەاترىنىڭ (فرانتسيا), نورۆەگيا ۇلتتىق وپەراسى مەن بالەتىنىڭ كاستينگ جونىندەگى كەڭەسشىسى پول Moە, چيليدە جانە باسقا ەلدەردە ءتۇرلى مادەني ۇيىمداردىڭ كوركەمدىك كەڭەسشىسى, «لاتىن امەريكا وپەراسى» ۇيىمىنىڭ ۆيتسە-پرەزيدەنتى اندرەس رودريگەس, بونن تەاترىنىڭ كوركەمدىك باسقارما ديرەكتورى كارولين ۆيلپيۋتتس (گەرمانيا) بار.
«استانا وپەرا» تەاترىنىڭ جەتەكشى ءسوليسى, حالىقارالىق بايقاۋلاردىڭ لاۋرەاتى, تاماشا تالانت يەسى ماريا مۋدرياكپەن (سوپرانو) بىرگە «وپەراليا-2017» بايقاۋىندا وتانداستارىمىز ءدامىر سادۋاقاسوۆ (تەنور), ستانيسلاۆ لي, راسۇل جارماعامبەتوۆ (باريتون) ءوز ونەرلەرىن ورتاعا سالماق. كورەيا, قىتاي, جاپونيا, ۇلىبريتانيا, برازيليا, وڭتۇستىك افريكا, اقش, يتاليا, المانيا, بولگاريا, چەحيا, رۋمىنيا, پولشا, مولدوۆا, ۋكراينا, رەسەي انشىلەرى اراسىندا وتەتىن سايىس وسى جىلعى الەمدەگى ەڭ ءىرى مادەني وقيعالاردىڭ ءبىرى بولماق.
«وپەراليا» بايقاۋىنىڭ شارتى بويىنشا وعان نەگىزىنەن كەز كەلگەن داۋىس ءتۇرىن يەلەنگەن (باستان باستاپ سوپرانوعا دەيىنگى) 18 بەن 32 جاس ارالىعىنداعى انشىلەر قاتىسا الادى. جالپى, جۇلدە قورى 180 000 اقش دوللارىن قۇرايدى. ەرلەر مەن ايەلدەر داۋسى اراسىنداعى 1, 2 جانە 3 دارەجەلى جۇلدەلەردەن تىس, مۇندا ر.ۆاگنەردىڭ جانە ر.شتراۋستىڭ وپەرالارىنان ۇزدىك ورىنداعانى ءۇشىن ب.نيلسون اتىنداعى سىيلىق جانە سارسۋەلانانى (وپەرەتتاعا جاقىن يسپاندىق مۋزىكالىق-ساحنالىق جانر) ورىنداۋ شەبەرلىگىنە بەلگىلەنگەن پەپيتا ەمبيل دە دومينگو جانە ۇلكەن پلاسيدو دومينگو سىيلىعى, كورەرمەن كوزايىمى جۇلدەسى − «Rolex» كومپانياسىنىڭ قول ساعاتتارى جانە ت.ب. جۇلدەلەر بار.
ال «Rolex» كومپانياسى ءوز كەزەگىندە دۇنيەجۇزىلىك «وپەراليا» بايقاۋىن وسىمەن 16 جىل قاتارىنان ۇسىنۋ ارقىلى وپەرا ونەرىنە وزدەرىنىڭ ارقاشان ادال بولىپ قالا بەرەتىندىكتەرىن دالەلدەۋدە. ايتا كەتۋ كەرەك, پلاسيدو دومينگو 1982 جىلدان باستاپ «Rolex» كومپانياسىنىڭ وكىلى بولىپ تابىلادى جانە كومپانيا كاسىبي تۇرعىدا كەمەلدەنۋگە ۇمتىلعان جاس دارىنداردى قولداۋ مەن قامقورلىق كورسەتۋ اياسىن مۇنان دا بارىنشا كەڭەيتە تۇسۋگە مۇددەلى.
قاراشاش توقسانباي,
«ەگەمەن قازاقستان»
