تاۋەلسىزدىك سارايىندا جىل سايىن وتىزدان اسا كورمە ۇيىمداستىرىلادى. كورمە بالالار شىعارماشىلىعىنان ەرەسەكتەردىڭ ونەرىنە دەيىنگى ارالىقتا ءتۇرلى جانردى, ءتۇرلى تاقىرىپتاردى قامتيدى. مۇحتاردىڭ شىعارماشىلىعىنا ارنالعان كورمەنىڭ دە وزىندىك ەرەكشەلىگى بار. ءوز تىلىمەن ايتقاندا, ء«ان-كۇي وزاتتارىنا ىزەت» كورسەتۋ ارقىلى قازاق دالاسىندا ءار كەزەڭدە ءومىر سۇرگەن ونەرپازداردىڭ تۇتاس گالەرەياسىن جاساپ, ونى كورەرمەندەرگە ۇيلەسىمدىلىكپەن ۇسىنا بىلگەن. اقان سەرى, ءبىرجان سال, جاياۋ مۇسا, ۇكىلى ىبىراي, مۇحيت مەرالى ۇلى, كەنەن ازىرباەۆ, مايرا ۋاليقىزى, دينا نۇرپەيىسوۆا قاتارلى جيىرمادان اسا بۇلبۇل مەن ءدۇلدۇلدىڭ پورترەتتەرىن كەنەپكە سالعان سۋرەتشى دالا ونەرپازدارىنىڭ ءىرى, كەسەك تۇلعالارىن بەينەلەگەن. مايلى بوياۋمەن سالىنعان ءار تۇلعانىڭ وزىنە ءتان قايتالانباس مىنەز-قۇلقى «مەنمۇندالايدى», ال ونەرپازدىڭ ارتقى جاعىندا سول كەزدىڭ الەۋمەتتىك ومىرىنەن الىنعان سيۋجەتتەر كوز تارتادى. جالپى, كورمەگە پورترەتتەردەن بولەك ەلىمىزدىڭ لاندشافتتارى بەينەلەنگەن 20 شاقتى سۋرەت قويىلعان.
تاۋەلسىزدىك سارايىنىڭ كورمە ۇيىمداستىرۋ ءبولىمىنىڭ جەتەكشىسى اينۇر ابۋلقايىروۆانىڭ ايتۋىنشا, شىن مانىندەگى شىعارماشىلىق يەلەرىنە, تاۋەلسىزدىك سارايىنداعى ءوزى قىزمەت ەتەتىن ءبولىمنىڭ ەسىگى قاشاندا اشىق. مۇندا تەك قانا وتاندىق شىعارماشىلىق يەلەرى عانا ەمەس, شەت ەلدەردەن دە كەلىپ, كورمە ۇيىمداستىراتىن ونەر ادامدارى بار. ونىڭ بەر جاعىندا ءتۇرلى قايىرىمدىلىق شارالارى دا كوپتەپ ۇيىمداستىرىلادى. بىراق, ءىس-شارانىڭ قاي-قايسىسى بولسىن سارايدىڭ نەگىزگى تۇجىرىمدامالارىنا سايكەس كەلۋى كەرەك. مازمۇنى مەن ماعىناسى تەرەڭ بولماعى شارت. وسى تۇرعىدان العاندا ءبولىم جەتەكشىسىنىڭ پىكىرىنشە, مۇحتار بايبوسىنوۆتىڭ ونەر ادامدارىنا ارناپ سالعان پورترەتتەر سەرياسى كورەرمەننىڭ ساناسىن رۋحاني تۇرعىدان جاڭعىرتىپ ەلىمىزدىڭ ناعىز ايتۋلى ونەر يەلەرىنىڭ بەينەلەرىن جادىندا ساقتاۋعا سەپتىگىن تيگىزبەك.
ايگۇل سەيىلوۆا,
«ەگەمەن قازاقستان»
سۋرەتتەردى تۇسىرگەن
ەرلان وماروۆ,
«ەگەمەن قازاقستان»
