قازاقستان مۇشە بولىپ قابىلدانعان حالىقارالىق بەدەلدى ۇيىمداردىڭ ءبىرى – شانحاي ىنتىماقتاستىق ۇيىمى. ول العاشقىدا «شانحاي بەستىگى» دەگەن اتاۋمەن قۇرىلعان بولاتىن. بۇگىندە التى مەملەكەتتىڭ (قازاقستان, قىرعىزستان, قىتاي, وزبەكستان, رەسەي جانە تاجىكستان) باسىن بىرىكتىرىپ وتىرعان بۇل ۇيىم قالىپتاسقان, سالماقتى, الەمدىك قوعامداستىقپەن, «ازۋىن ايعا بىلەگەن» حالىقارالىق ۇيىمدارمەن ىنتىماقتاسا جۇمىس ىستەۋدە مول تاجىريبە جيناقتاعان ىرگەلى بىرلەستىككە اينالدى.
شىۇ-نىڭ قالىپتاسۋ تاريحىنا ۇڭىلەر بولساق, مەملەكەت باسشىسى نۇرسۇلتان نازارباەۆتىڭ ۇيىمدى قۇرۋ بارىسىنداعى بەلسەندى ءرولى, حالىقارالىق بەدەلى انىق كورىنەدى. بۇدان ءبىز اتالعان بىرلەستىكتىڭ ەلىمىز ءۇشىن اسا ماڭىزدى ەكەنىن ۇعىنا تۇسەمىز.
شىۇ-نىڭ استانا ءسامميتى پرەزيدەنت نۇرسۇلتان نازارباەۆتىڭ توراعالىعىمەن وتپەك. اۋقىمدى شاراعا مەملەكەتتەر باسشىلارى, حالىقارالىق ۇيىمداردىڭ جەتەكشىلەرى, الەمدىك دەڭگەيدەگى ساراپشىلار, باق وكىلدەرى قاتىسادى. شەتەلدىك مەيمانداردىڭ اراسىندا بۇۇ-نىڭ باس حاتشىسى انتونيۋ گۋتەررەشتىڭ دە بولاتىنىن ايتا كەتەيىك. بۇل ءوز كەزەگىندە شىۇ-نىڭ وزگە حالىقارالىق ۇيىمدارمەن ىنتىماقتاستىعىن وڭتايلى جۇرگىزىپ وتىرعانىن بىلدىرسە كەرەك.
جالپى, قازاقستان تاراپى سامميتكە دايىندالۋ ءىسىن تىڭعىلىقتى جۇرگىزۋدە. وسى ورايدا ەلباسى نۇرسۇلتان نازارباەۆتىڭ بيىلعى ءساۋىر ايىنىڭ سوڭىندا شىۇ-عا مۇشە مەملەكەتتەردىڭ سىرتقى ىستەر مينيسترلەرىمەن وتكىزگەن كەزدەسۋىن اتاپ وتۋگە بولادى.
وسى باسقوسۋدا ەلباسى: «شانحاي ىنتىماقتاستىق ۇيىمىنا توراعالىق ەتۋشى ەل رەتىندە ءبىز بيىلعى ماۋسىم ايىندا وتەتىن سامميتكە زور ءمان بەرىپ وتىرمىز. ۇيىمعا ءبىزدىڭ توراعالىعىمىز وڭىردەگى جانە الەمدەگى قيىن ۇدەرىستەر كەزەڭىمەن تۇسپا-تۇس كەلدى», – دەگەن بولاتىن.
پرەزيدەنت نۇرسۇلتان نازارباەۆ سول كەزدەسۋدە شانحاي ىنتىماقتاستىق ۇيىمىنىڭ كۇنتارتىبىنە شىعارىلاتىن ماسەلەلەر جونىندە ايتا كەلىپ, «شانحاي ىنتىماقتاستىق ۇيىمى اياسىنداعى ەكونوميكالىق جانە مادەني-گۋمانيتارلىق ىنتىماقتاستىقتىڭ ماڭىزى زور. الداعى ءسامميتتىڭ كۇنتارتىبىندەگى وزەكتى ماسەلەلەردىڭ ءبىرى رەتىندە ءۇندىستان مەن پاكىستاندى شانحاي ىنتىماقتاستىق ۇيىمىنىڭ تولىققاندى مۇشەلىگىنە قابىلداۋ ءۇردىسىن اياقتاۋ تۋرالى شەشىم جونىندە دە ايتىپ وتكەن ءجون. سونداي-اق, كەلەشەكتەگى جوسپارلارىمىزدى ايقىندايتىن استانا دەكلاراتسياسىن قابىلداۋدى كوزدەپ وتىرمىز», – دەگەن بولاتىن.
قورىتا ايتقاندا, شىۇ-نىڭ استانا ءسامميتى بولاتىن كۇن جاقىنداپ كەلەدى. ءدال وسى جيىن بارىسىندا ءبىز كۇتكەندەي ۇيىمنىڭ قۇرامى, گەوگرافيالىق اۋقىمى بۇرىن-سوڭدى بولماعان كولەمگە كەڭەيىپ جاتسا, ودان ەلىمىزدىڭ مارتەبەسى وسە تۇسەرى ءسوزسىز.
جولدىباي بازار,
«ەگەمەن قازاقستان»
