زاڭ جوباسىندا زەينەتكەر جاسىنداعى ازاماتتاردىڭ لايىقتى ءومىر ءسۇرۋ دەڭگەيىن قامتاماسىز ەتۋ ماقساتىندا الەۋمەتتىك جانە زەينەتاقى زاڭناماسىن جەتىلدىرۋ, سونداي-اق بالالى وتباسىلاردى جانە ازاماتتاردىڭ وسال ساناتتارىن قولداۋ جونىندەگى شارالاردى كۇشەيتۋ قاجەتتىگى ايتىلادى.
«زاڭ جوباسىندا زەينەتاقى زاڭناماسىنا بىرقاتار وزگەرىستەر ەنگىزۋ كوزدەلگەن. بىرىنشىدەن, ەلباسىنىڭ بيىلعى جولداۋىندا بەرگەن تاپسىرماسىنا سايكەس, 2017-2018 جىلدارى بيۋدجەتتەن تولەنەتىن زەينەتاقىلار مولشەرى ءۇش كەزەڭدىك نەگىزدە ارتتىرىلاتىن بولادى. ءبىرىنشى كەزەڭدە, ياعني 2017 جىلعى 1 قاڭتاردان باستاپ ىنتىماقتى زەينەتاقىلار مولشەرى 9 پايىزعا, بازالىق زەينەتاقى – 7 پايىزعا ارتتى. ال, ەكىنشى كەزەڭدە, 2017 جىلدىڭ 1 شىلدەسىنەن باستاپ: ىنتىماقتى زەينەتاقى مولشەرى 11 پايىزعا; بازالىق زەينەتاقى مولشەرى 13 پايىزعا كوبەيتىلگەلى وتىر. ناتيجەسىندە, 1 شىلدەدەن باستاپ زەينەتاقى مولشەرلەرىن 2016 جىلعى زەينەتاقى مولشەرىمەن سالىستىرعاندا 20 پايىزعا دەيىن ارتتىرۋ قامتاماسىز ەتىلەدى. سوندا ەڭ تومەنگى زەينەتاقى مولشەرى 45 711 تەڭگەگە دەيىن, ال ورتاشا زەينەتاقى 66 676 دەيىن ارتتىرىلاتىن بولادى. بۇل ارتتىرۋ ەلدەگى 2 ميلليوننان استام زەينەتكەردى تۇگەل قامتيدى», – دەدى ت.دۇيسەنوۆا.
ءمينيستردىڭ تۇسىندىرۋىنشە, زەينەتاقىنى ارتتىرۋدىڭ ءۇشىنشى كەزەڭى 2018 جىلدىڭ 1 شىلدەسىنەن باستاپ جۇرگىزىلەدى دەپ كۇتىلۋدە. ول بازالىق زەينەتاقىنى تاعايىنداۋ ادىستەمەسىنىڭ وزگەرۋىمەن بايلانىستى بولماق.
«بۇگىنگى تاڭدا بازالىق زەينەتاقى زەينەتكەرلىك جاسقا جەتكەن ادامدارعا بىردەي مولشەردە تاعايىندالادى. ەندىگى جەردە جاڭا ادىستەمەگە سايكەس, ول زەينەتاقى جۇيەسىنە قاتىسۋ وتىلىنە بايلانىستى ناقتىلانادى. بۇل رەتتە 1998 جىلعا دەيىنگى ەڭبەك ءوتىلى جانە 1998 جىلدان كەيىنگى جيناقتاۋشى زەينەتاقى جۇيەسىنە اۋدارىلعان زەينەتاقى جيناقتارىنىڭ مەرزىمى ەسكەرىلەتىندىگىن اتاپ وتكىم كەلەدى», – دەدى ول ءوز بايانداماسىندا.
سونداي-اق, جالپى وتىرىس اياسىندا دەپۋتاتتار «قازاقستان رەسپۋبليكاسىنىڭ كەيبىر زاڭنامالىق اكتىلەرىنە دەنساۋلىق ساقتاۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسىن ەكىنشى وقىلىمدا ماقۇلدادى. قۇجات بويىنشا بايانداما جاساعان ءماجىلىستىڭ الەۋمەتتىك-مادەني دامۋ كوميتەتىنىڭ مۇشەسى, دەپۋتات زاۋرەش امانجولوۆا زاڭ جوباسى مىندەتتى الەۋمەتتىك مەديتسينالىق ساقتاندىرۋ جاعدايلارىندا حالىققا مەديتسينالىق كومەك كورسەتۋدى جەتىلدىرۋ ماقساتىندا ازىرلەنگەندىگىن اتاپ ءوتتى. وندا اۋدارىمدار مەن جارنالاردىڭ مولشەرلەمەلەرى مەن ولاردى ەسەپتەۋ وبەكتىلەرىن وزگەرتۋ; جاڭا تولەۋشىلەر ساناتتارىن جانە جارنالارىن تولەۋدى مەملەكەت جۇزەگە اسىراتىن ادامداردىڭ ساناتتارىن ەنگىزۋ; مىندەتتى الەۋمەتتىك مەديتسينالىق ساقتاندىرۋ جانە تەگىن مەديتسينالىق كومەكتىڭ كەپىلدىك بەرىلگەن كولەمى جۇيەسىندە حالىقتى دارىلىك قامتاماسىز ەتۋ; الەۋمەتتىك مەديتسينالىق ساقتاندىرۋ قورىنىڭ جۇمىسىن ۇيىمداستىرۋ; اسكەري قىزمەتشىلەرگە, قۇقىق قورعاۋ جانە ارناۋلى مەملەكەتتىك ورگانداردىڭ قىزمەتكەرلەرىنە جانە ولاردىڭ وتباسى مۇشەلەرىنە مەديتسينالىق كومەك كورسەتۋ ءتارتىبى سىندا ماسەلەلەر كوزدەلەدى.
وسى كۇنى دەپۋتاتتاردىڭ ماقۇلداۋىنا يە بولعان قۇجاتتىڭ ءبىرى «قازاقستان ۇكىمەتى مەن قىرعىزستان ۇكىمەتى اراسىنداعى ەۋرازيالىق ەكونوميكالىق ينتەگراتسيا جاعدايىندا ەكونوميكالىق ىنتىماقتاستىقتى دامىتۋ تۋرالى كەلىسىمدى راتيفيكاتسيالاۋ تۋرالى» زاڭ جوباسى ەدى. 2014 جىلعى 7 قاراشادا قازاقستان مەن قىرعىزستان اراسىنداعى جوعارعى مەملەكەتارالىق كەڭەس وتىرىسىنىڭ اياسىندا مەملەكەت باسشىلارى بەرگەن تاپسىرماعا سايكەس ازىرلەنگەن قۇجاتتى ۇلتتىق ەكونوميكا ءمينيسترى تيمۋر سۇلەيمەنوۆ تانىستىردى. سوندىقتان دا كەلىسىم نورمالارىنا سايكەس, قازاقستان تاراپى قىرعىزستاننىڭ ەۋرازيالىق ەكونوميكالىق وداققا ينتەگراتسياسى پروتسەسىنە جاردەمدەسۋ ماقساتىندا اتالعان ەلگە 100 ملن اقش دوللارىنا تەڭ كومەك كورسەتەدى. كومەك قىرعىز تاراپىنا ەۋرازيالىق ەكونوميكالىق وداققا قوسىلۋى جونىندەگى «جول كارتالارىندا» كوزدەلگەن شارالاردى ىسكە اسىرۋعا, اتاپ ايتقاندا ەاەو كەدەندىك شەكاراسىنىڭ قىرعىز ۋچاسكەسىندە كەدەندىك ينفراقۇرىلىمدى جاقسارتۋعا, قىرعىزستاننىڭ سانيتارلىق, ۆەتەرينارلىق, فيتوسانيتارلىق جۇيەلەرىن ەاەو تالاپتارىمەن سايكەستەندىرۋگە بەرىلەدى دەپ ناقتىلانعان.
ايتا كەتەيىك, وتىرىس اياسىندا «قازاقستان رەسپۋبليكاسى ۇكىمەتىنىڭ جانە رەسپۋبليكالىق بيۋدجەتتىڭ اتقارىلۋىن باقىلاۋ جونىندەگى ەسەپ كوميتەتىنىڭ 2016 جىلعى رەسپۋبليكالىق بيۋدجەتتىڭ اتقارىلۋى تۋرالى ەسەپتەرى» مەن «مەملەكەتتىك اۋديت جانە قارجىلىق باقىلاۋ تۋرالى قازاقستان رەسپۋبليكاسى زاڭىنا تولىقتىرۋلار ەنگىزۋ جايىندا» جانە «قارۋ ساۋداسى تۋرالى شارتتى راتيفيكاتسيالاۋ تۋرالى» زاڭ جوبالارىنا قورىتىندى ازىرلەۋدى قولعا الدى.
نۇرلىبەك دوسىباي,
«ەگەمەن قازاقستان»
