ەسىرتكى قۇرالدارىن ءوندىرۋدىڭ شيكىزات بازاسى بولىپ تابىلاتىن جابايى سورانىڭ وبلىس اۋماعىندا 130 مىڭنان استام گەكتار جەردى الىپ جاتۋى زاڭسىز ەسىرتكى اينالىمىنا قارسى كۇرەس جاعدايىن كۇردەلەندىرە تۇسۋدە. بۇل ماسەلە تۋرالى وبلىستىق ىشكى ىستەر دەپارتامەنتى باستىعىنىڭ ءبىرىنشى ورىنباسارى بەرىك قۇتباەۆ مالىمدەدى. «ماقساتتى اتقارىلعان جۇمىس ناتيجەسىندە ەسىرتكى بيزنەسىنە قارسى كۇرەستە وڭ ناتيجەلەرگە قول جەتكىزىلدى» دەسە دە, بەرىك مەدەربەك ۇلى وبلىس اۋماعىندا وتكەن جىلى ەسىرتكىگە قاتىستى 622 قىلمىستىق قۇقىق بۇزۋشىلىق انىقتالعانىن دا اتاپ ءوتتى. ونىڭ ىشىندە 328 قىلمىس پەن 294 قىلمىستىق تەرىس قىلىق انىقتالسا, ەسىرتكى زاتتارىن ساتۋدىڭ 138 دەرەگى بويىنشا ءىس قوزعالعان. بۇل كورسەتكىش قىلمىس اشىلىپ, ناقتى جۇمىس اتقارىلعانىن كورسەتسە دە, ەسىرتكى بينەسى نارىعىن قالىپتاستىرعىسى كەلەتىندەردىڭ ارەكەتسىز وتىرماعانىن دا ايعاقتايدى.
وتكەن جىلدىڭ كورسەتكىشى جاقسى. دەگەنمەن, بيىلعى جىلدىڭ احۋالى قانداي؟ بۇل تۇرعىدا وبلىس اكىمى كارىم كوكىرەكباەۆ دەپارتامەنت تاراپىنان 2017 جىلعا ارنالعان ەشقانداي جوسپار كورىپ تۇرماعانىن ايتتى. سونداي-اق, جامبىل وبلىسى كورشى قىرعىز رەسپۋبليكاسىمەن 716 شاقىرىمدا شەكتەسەدى. ناشاقورلىق پەن ەسىرتكى بيزنەسىن بولدىرماۋدا شەكاراشىلار ارقىلى ەشقانداي قۇزىرلى مەكەمەنىڭ مەموراندۋمعا قول قويماعانىن دا سىنعا الدى.
سونىمەن قاتار, كارىم كوكىرەكباەۆ ناشاقورلىقتان جاسىرىن ەمدەلۋشىلەر بار ەكەنىن, ولاردىڭ كىم ەكەنىن جاريالاۋ كەرەكتىگىن ايتتى. ونىڭ ايتۋىنشا, سوندا عانا ەسىرتكى بيزنەسىنە قارسى كۇرەس قالىپقا كەلەدى. شىنىندا, مۇنداي كەلەڭسىز جايمەن اينالىسۋ كوبىنەسە ءجاسوسپىرىم شاقتان باستالادى. وبلىستا 459 مەكتەپ بار بولسا, وندا 39 مىڭ مۇعالىم قىزمەت ەتەدى. بۇل تۇرعىدا مۇعالىمدەرمەن قاتار, مەكتەپتەگى مەدبيكەلەر مەن ينسپەكتورلار دا جۇمىسىن كۇشەيتۋلەرى قاجەت ەكەندىگى ءسوز بولدى.
حاميت ەسامان,
«ەگەمەن قازاقستان»
جامبىل وبلىسى
سۋرەتتى سالعان ايداربەك عازيز ۇلى,
«ەگەمەن قازاقستان»
