«استانا ارەنا» ستاديونىندا الدىمەن «وقجەتپەس» كومانداسى «قايراتتى» قابىلدادى. بۇل كەزدەسۋدە الاڭ يەلەرىنەن سەرگەي سترۋكوۆ 29 جانە 68-مينۋتتاردا مەرگەندىگىمەن تانىلىپ, ەسەپتى 2:0-گە جەتكىزدى. «قايرات» وتكەن ويىندا اتىراۋداعى جەڭىلىسىن قاپەردە ۇستاپ, وسىدان كەيىن شيراق قيمىلداي باستادى. الدىمەن 74-مينۋتتا اندرەي ارشاۆين ەسەپ ايىرماسىن قىسقارتسا, اراعا ءبىر مينۋت سالىپ, برازيليالىق ويىنشى يساەل باربوزا تارازى باسىن تەڭەستىردى. ال ويىنعا ەكىنشى تايمنان قوسىلعان باۋىرجان تۇرىسبەك 79-مينۋتتا جەڭىستى گولدىڭ اۆتورى اتاندى. «قايرات» وسىلايشا ەكى دوپ ايىرماسىمەن ۇتىلىپ جاتىپ, 3:2 ەسەبىمەن جەڭىسكە جەتتى.
ءدال وسى ستاديوندا جەرگىلىكتى «استانا» كومانداسى پاۆلوداردىڭ «ەرتىسىمەن» كۇش سىناستى. ويىنداعى العاشقى گولدى 13-مينۋتتا ەلوردالىقتار ساپىنان رومان مۇرتازاەۆ سالدى. ماتچتىڭ 79-مينۋتىندا ديدار جالمۇقان سوڭعى نۇكتەنى قويدى. وسىلايشا ەلوردالىقتار 2:0 ەسەبىمەن باسىم ءتۇستى. تۋرنيرلىك كەستەدە «استانا» نەگىزگى قارسىلاستارىنان ءبىر ويىن از وتكىزسە دە 27 ۇپايمەن كوش باستاپ كەلەدى.
سونىمەن قاتار, شىمكەنتتىڭ «ورداباسى» كلۋبى سىرت الاڭدا «اتىراۋمەن» كەزدەسىپ, 2:2 ەسەبىمەن تەڭ ءتۇستى. بۇل ماتچتا ەسەپتى شىمكەنتتىك ۇجىمنىڭ شابۋىلشىسى تاڭات نوسەرباەۆ اشقانمەن, الاڭ يەلەرىنەن ەلدار ابدراحمانوۆ پەن فارحات سالوموۆ ءبىر-ءبىر گولدىڭ اۆتورى اتاندى. دەگەنمەن, نەگىزگى ۋاقىتتىڭ اياقتالۋىنا بەس مينۋت قالعاندا ازات نۇرعاليەۆ پەنالتيدى ءساتتى ورىنداپ, ەسەپتى 2.2-گە جەتكىزدى.
قاراعاندىدا جەرگىلىكتى «شاحتەر» ۇجىمى ورالدىڭ «اقجايىعىن» قابىلداپ, 1:0 ەسەبىمەن باسىم ءتۇستى. جەڭىستى گولدىڭ اۆتورى – ايدوس تاتتىباەۆ. وسى جەڭىسىنىڭ ارقاسىندا «شاحتەر» تۋرنيرلىك كەستەدە 11-ورىنعا كوتەرىلدى. ايتا كەتەرلىگى, بۇل كۇنى قاراعاندىلىق كلۋب ۇزاق جىلدار بويى كوماندانى ورگە سۇيرەگەن اندرەي فينونچەنكومەن قوشتاسۋ ءراسىمىن وتكىزگەن بولاتىن.
ال «تاراز» «قىزىلوردانىڭ» «قايسارىن» قابىلداپ, 2:1 ەسەبىمەن جەڭىسكە جەتتى. بۇل ويىندا «قايسار» ساپىنان ماقسات بايجانوۆ ەسەپ اشسا, الاڭ يەلەرىنەن مۇحاممەد دياررا مەن ابزال تاۋباي قوناقتاردى قاپى قالدىرىپ كەتتى. وسى جەڭىسىنەن كەيىن تارازدىقتار 10-ورىنعا كوتەرىلدى.
ال «اقتوبە» ءوز الاڭىندا قوستانايدىڭ «توبىلىمەن» كۇش سىناسىپ, 1:3 ەسەبىمەن ەسە جىبەردى. بۇل كەزدەسۋدە «توبىل» ساپىنان الەكسەي ششەتكين, سەرگەي مالىي جانە راۋل جاليلوۆ ءبىر-ءبىر گولدىڭ اۆتورى اتانسا, اقتوبەلىكتەردەن جالعىز گولدى يۋري مامۋتە سالدى. وسىلايشا, «اقتوبە» كەستەنىڭ سوڭعى ورنىنا سىرعىدى.
ايتا كەتەيىك, قازاقستان پرەمەر-ليگاسىنىڭ كەلەسى تۋرى 20 مامىردا وتەدى. بۇل تۋردا مىنا كوماندالار كۇش سىناسادى:
«اقجايىق» – «استانا»,
«ەرتىس» – «اتىراۋ»,
«ورداباسى» – «اقتوبە»,
«توبىل» – «وقجەتپەس»,
«قايسار» – «شاحتەر»,
«قايرات» – «تاراز».
