ەكسپو-2017 حالىقارالىق مامانداندىرىلعان كورمەسىن وتكىزۋ كەزىندەگى مادەني باعدارلامانى مادەنيەت جانە سپورت مينيسترلىگى, «استانا ەكسپو-2017» ۇلتتىق كومپانياسى جانە استانا قالاسىنىڭ اكىمدىگى بىرلەسىپ ازىرلەدى. بۇل كۇندەرى ويىن-ساۋىق باعدارلامالارى مەن كونتسەرتتەردىڭ 70 پايىزى قالانىڭ ءتۇرلى اۋداندارىنداعى اشىق الاڭداردا, ساياباقتاردا, سونداي-اق, قالا ماڭىنداعى 9 تۇرعىن الابىندا (پريگورودنىي, ينتەرناتسيونالنىي, ميچۋرين, كۇيگەنجار, ءوندىرىس, جەلەزنودوروجنىي, ۇركەر, كوكتال جانە پرومىشلەننىي) وتەدى. استانا قالاسىنىڭ اكىمدىگى الەكساندر ماسلياكوۆتىڭ قاتىسۋىمەن كۆن-نىڭ حالىقارالىق جازعى كۋبوگىن, «بارىس ارەنا» ستاديونىندا وليمپيادا چەمپيونى ەۆگەني پليۋششەنكو مەن مانەرلەپ سىرعاناۋدىڭ باسقا دا جۇلدىزدارىنىڭ كەشىن, قازاقستاندىق جانە شەتەلدىك ەسترادا جۇلدىزدارىنىڭ قاتىسۋىمەن مۋزىكا ونەرىنە قوسقان ۇلەسى ءۇشىن ناگرادالار تابىستاۋمەن «Astana Dausy» حالىقارالىق مۋزىكا فەستيۆالىن ۇيىمداستىرۋعا مۇرىندىق بولادى. ەلوردامىزدا اتالعان ءىس-شارالاردى وتكىزۋدىڭ ءوزى ۇلكەن جەتىستىك, بۇل تۋريستەردى تارتۋعا بارىنشا سەپتىگىن تيگىزەدى دەپ كۇتىلۋدە.
مادەني-بۇقارالىق شارالار جاز بويى – ماۋسىمنان قىركۇيەك ايىنا دەيىن وتكىزىلەدى. بۇل كەزەڭدە قالا اكىمدىگى 647 شارا ۇيىمداستىرادى. جوسپارلانعان شارالار ءتۇرلى فورماتتا وتكىزىلەدى: حالىقتىق سەرۋەن, مادەني-بۇقارالىق, وتباسىلىق دەمالىس, فەستيۆالدار, كورمەلەر, تەاترلاندىرىلعان جانە تسيرك قويىلىمدارى وتەدى. سونىمەن بىرگە, ەكسپو كورمەسىنىڭ رەسمي اشىلۋ جانە جابىلۋ سالتاناتىن قالانىڭ ءۇش اۋدانىندا تىكەلەي ەفيردەن تاماشالاۋعا بولادى – ۇلكەن LED ەكراندار «بايتەرەك» مونۋمەنتىنىڭ الدىنداعى الاڭدا, قالالىق الاڭدا جانە ستۋدەنتتىك ساياباقتا ورناتىلادى.
جازدىڭ ءۇش ايىندا استانالىق, ستۋدەنتتىك, جەرۇيىق, پرەزيدەنتتىك جانە اراي ساياباقتارىندا «ساياباقتىڭ جەتى كەرەمەتى» اتتى شارالار وتكىزىلەدى. قازاق ەرتەگىلەرىنىڭ, «سۋىق جۇرەك» ءمۋلتفيلمىنىڭ كەيىپكەرلەرىنىڭ, ورمەكشى ادامنىڭ جانە ديسنەيلىك كەيىپكەرلەر مەن روبوتتاردىڭ قاتىسۋىمەن 7 تاقىرىپتىق باعدارلاما كوپشىلىك نازارىنا ۇسىنىلادى. شوۋ جۇمىس جانە دەمالىس كۇندەرى – كۇنىنە 2 رەت وتەدى. جالپى العاندا, ساياباقتاردا بالالار مەن ەرەسەكتەرگە ارنالعان مىڭنان اسا ويىن-ساۋىق شاراسى ۇيىمداستىرىلادى.
سۋلى-جاسىل جەلەك بۋلۆارى اشىق اسپان اياسىنداعى كورمە پاۆيلونىنا اينالادى. مۇندا ءىىى Astana Art Fest حالىقارالىق فەستيۆالى ۇيىمداستىرىلادى. بۇل ەلوردا تۇرعىندارى مەن قوناقتارىنىڭ سۇيىكتى شارالارىنىڭ ءبىرى.
وتكىزىلە باستاعاننان بەرگى ەكى جىلدا وعان الەمنىڭ 10 مەملەكەتىنەن 78 سۋرەتشى قاتىسقان, ال كەلۋشىلەر سانى جارتى ميلليوننان استى. بيىل شاراعا الەمنىڭ 9 ەلىنەن سۋرەتشىلەر, ديزاينەرلەر, ساۋلەتشىلەر, مۋزىكانتتار مەن رەجيسسەرلەر اتسالىسادى. دايىن جۇمىستار جەلەكجولعا 1 ماۋسىمنان باستاپ قويىلادى, ال فەستيۆال ماۋسىمنىڭ 10-ى كۇنى اشىلادى.
ەلوردادا ەكسپو-2017 حالىقارالىق كورمەسى سياقتى ءىرى شارا اياسىندا ۇلتتىق ەرەكشەلىكتى پاش ەتەتىن شارالار دا كوپتەپ ۇيىمداستىرىلادى. ولاردىڭ ءبىرى – ءداستۇرلى قازاق مۋزىكاسىنىڭ «استاناعا تارتۋ» كونتسەرتى. كورەرمەندەر «جەتىسۋ», «ارقا», «سىر» جانە «باتىس» اتتى ءداستۇرلى ءان ايتۋدىڭ ءتورت مەكتەبى وكىلدەرىنىڭ ورىنداۋىندا قازاق حالقىنىڭ باي فولكلورىمەن تانىسادى. بۇدان باسقا, حالىق اسپاپتارى وركەسترلەرىنىڭ «سەرپەر» فەستيۆالى, ۇرمەلى اسپاپتار وركەسترلەرىنىڭ «استانا سامالى» فەستيۆالى وتەدى. تەاتر اپتالىعىن ۇيىمداستىرۋ ءداستۇرى بۇدان 5 جىل بۇرىن قالىپتاسقان. جىل سايىن «ساحنادان سالەم» فەستيۆالىندە قازاقستان مەن شەت مەملەكەتتەردىڭ ۇزدىك تەاتر ۇجىمدارى باس قوسادى.
سونىمەن بىرگە, قالا كۇنى اياسىندا استانادا قازاقستاندىق ەسترادانىڭ تانىمال ورىنداۋشىلارىنىڭ كونتسەرتتەرى وتەدى. بيىل قالانىڭ كونتسەرت زالدارىندا «مۋزارت», «دەرۆيشي» توپتارىنىڭ كونتسەرتتەرى, سەكەن تۇرىسبەكتىڭ جانە التىنبەك قورازباەۆتىڭ شىعارماشىلىق كەشتەرى ۇيىمداستىرىلادى. بارلىق كونتسەرتتەرگە بيلەتتەر قالانىڭ كاسسالارىندا جانە www.koncertyastany.kz سايتىندا ساتىلادى.
ەكسپو-2017 حالىقارالىق كورمەسى اياسىندا وتەتىن مادەني شارالار جوسپارىنا ءتۇرلى جانرلارداعى كونتسەرتتەر ەنگىزىلگەن. 23 جانە 24 ماۋسىمدا «بايتەرەك» مونۋمەنتىنىڭ الدىنداعى الاڭدا «The Spirit of Astana» قازىرگى زامانعى ەتنوستىق مۋزىكا فەستيۆالى وتەدى. ساحنا تورىندە افريكا, اقش, ماكەدونيا, گرۋزيا, ۆەنگريا, رەسەي, قازاقستان, باشقۇرتستان, بۋرياتيا جانە تۋۆا مەملەكەتتەرىنىڭ مۋزىكالىق ۇجىمدارى ءوز ونەرلەرىن ورتاعا سالادى. 15 شىلدەدە يتاليالىق مۋزىكانى سۇيەتىن قاۋىم «زۆەزدى سان-رەمو ۆ استانە» فەستيۆالىن تاماشالايدى. وتباسىلىق دەمالىسقا ارنالعان شارالاردىڭ ءبىرى – «ازيا جاڭعىرىعى» اتتى X حالىقارالىق تسيرك ونەرى فەستيۆالى. سونىمەن قاتار, جاستارعا ارنالعان «Energy Party» ەلەكتروندى مۋزىكا فەستيۆالى جانە «International Street dance Session in Astana» كوشە ءبيى فەستيۆالى وتەدى.
30 ماۋسىمنان 2 قىركۇيەككە دەيىن ءار دەمالىس سايىن «بايتەرەك» مونۋمەنتىنىڭ الدىنداعى الاڭدا, قالالىق الاڭدا جانە ستۋدەنتتىك ساياباقتا اشىق اسپان اياسىندا «ەسىل كەشتەرى» كونتسەرتتەرى ۇيىمداستىرىلادى. بۇدان باسقا, حالىقارالىق كورمە بارىسىندا Astana Game Fest العاشقى گەيمەرلەر فەستيۆالى وتەدى. شارا اياسىندا كومپيۋتەرلىك ويىندار بويىنشا حالىقارالىق جارىستار, روبوتتى تەحنيكادان شەبەرلىك ساباقتارى, جاڭا ويىنداردىڭ پرەزەنتاتسيالارى, دروندار شوۋى وتكىزىلەدى.
ەكسپو حالىقارالىق كورمەسى كەزىندە وتەتىن شارالار باعدارلاماسىنا كوپتەگەن سپورتتىق جارىستار دا ەنگىزىلدى. مامىر ايىنىڭ ورتاسىنان باستاپ جەكسەنبى كۇندەرى استانالىق, جەرۇيىق جانە ستۋدەنتىك ساياباقتاردا Astana Fitness Park شاراسى وتەدى. ونىڭ بارىسىندا كاسىپقوي باپكەرلەردىڭ جەتەكشىلىگىمەن كروسسفيت, يوگا, زۋمبا جانە باسقا سپورت تۇرلەرى بويىنشا جاتتىعۋ جاساۋعا قاتىسۋعا بولادى. 25 ماۋسىمدا استانادا دۋاتلوننان ءۇشىنشى رەت قالالىق تۋرنير وتكىزىلەدى. وعان 18 جاستان اسقان بارلىق ازاماتتار قاتىسا الادى.
جاھاندىق كورمە جالاۋى جەلبىرەگەن كۇندەرى ەلوردادا ءداستۇرلى قالا كۇنى مەرەكەسى سالتاناتتى جاعدايدا اتالىپ وتىلمەك. ياعني تاۋەلسىز قازاقستاننىڭ ەلورداسى – استانانىڭ تويى دا جاھاندىق سيپات الادى. اقيقاتىن ايتقاندا, ەكسپو-2017 كورمەسىنىڭ جالاۋى جەلبىرەيتىن ءۇش ايدا ەلوردامىز الەمدىك باسقوسۋلار مەن ءىرى مادەني كوپشىلىك شارالار وتەتىن ورتالىققا اينالماق.
جىلقىباي جاعىپار ۇلى,
«ەگەمەن قازاقستان»
