جيىندى اشقان پارتيا توراعاسى ازات پەرۋاشەۆ بۇل ماسەلەنىڭ وزەكتىلىگىنە توقتالا كەلە, ونى جان-جاقتى زەردەلەپ, سارالاۋدىڭ ءمان-ماڭىزى ايرىقشا ەكەنىن, دەمەك ونى تەرەڭ ءتۇسىنىپ, ەلدىك ىستە ۇيىمشىلدىق تانىتۋ قاجەتتىگىن ايتتى.
بۇدان كەيىن ول ءسوز تىزگىنىن بەلگىلى جۋرناليست, پارتيا توراعاسىنىڭ ورىنباسارى قازىبەك يساعا بەردى. ول ەلباسىنىڭ «بولاشاققا باعدار: رۋحاني جاڭعىرۋ» دەگەن ماقالاسىنان تۋىندايتىن كوپتەگەن رۋحاني, ساياسي ماسەلەلەر قازىر قازاقستاننىڭ بارلىق جەرىندە ىسكە اسىپ, قولعا الىنىپ جاتقانىن جەتكىزدى. «لاتىن قارپىنە ءوتۋدىڭ ماڭىزى تۋرالى 2012 جىلى جاريالانعان «قازاقستان-2050» ستراتەگياسىندا بار. وعان دەيىن 2006 جىلى قازاقستان حالقى اسسامبلەياسىنىڭ سەسسياسىندا ايتىلعان. 2007 جىلى «اق جول» پارتياسىنىڭ ساياسي تۇجىرىمداماسىندا دا وسى ماسەلە كوتەرىلدى. ال بۇل ماسەلەگە ستارت بەرىپ, ىسكە قوسىپ وتىرعان وتىرعان ەلباسىنىڭ 12 ساۋىردەگى ماقالاسى. سوندىقتان, بۇعان زيالى قاۋىم تۇگەل اتسالىسۋى كەرەك دەپ ويلايمىن. جالپى, بۇل ماسەلەنى ساياسيلاندىرماي, رۋحاني جاڭارۋ رەتىندە قابىلداۋىمىز كەرەك», – دەدى پارتيا توراعاسىنىڭ ورىنباسارى.
سونداي-اق, ول 1924 جىلى ورىنبوردا وتكەن قازاق-قىرعىز ءبىلىمپازدارىنىڭ قۇرىلتايىندا ءنازىر تورەقۇلوۆ لاتىن الىپبيىنە كوشۋ تۋرالى ماڭىزدى بايانداما جاساعانى تاريحتان ءمالىم ەكەنىن جەتكىزدى. «سول كەزدە ۇلت زيالىلارى قاجەت كەزىندە حالقىنا بولىسىپ, باس بىرىكتىرە الدى. قازىر دە بۇل ماسەلەدە ەرىك-جىگەر كورسەتىپ, ۇيىمشىلدىق تانىتا ءبىلۋىمىز كەرەك», – دەدى بۇل رەتتە قازىبەك يسا. ونىڭ ايتۋىنشا, لاتىن قارپىنە كوشۋ بارىسىندا كەزدەسەتىن قيىندىقتاردى بەلگىلى دەڭگەيدە ەڭسەرۋگە بولادى. «ماسەلەن, قازىر قوعامدا مەملەكەتىمىز لاتىن قارپىنە كوشەتىن بولسا, كوركەم ادەبيەتتەر, قۇندى كىتاپتار اۋدارىلماي قالادى دەگەن پىكىر بار. سوندىقتان, حالىققا ەڭ قاجەتتى دەگەن تۋىندىلاردى عانا اۋدارۋ كەرەك. بۇل ءبىر جاعىنان قۇندى شىعارمالاردى ىرىكتەپ الۋعا سەپتىگىن تيگىزەدى», – دەدى ول.
جازۋشى الدان سمايىل ءوز ويىن بىلايشا تۇيىندەدى: «جالپى, بۇل وتە كۇردەلى ماسەلە. ول وسىمەن ءتورتىنشى رەت كوتەرىلىپ وتىر. دەمەك, بۇل – بۇگىنگى كۇنگە دەيىن تالاي عالىم جينالىپ, ۇسىنىس-پىكىرلەرىن ايتىپ, ماسەلەنى جان-جاقتى تالقىلادى, ياعني, بىزدە بۇرىننان قالىپتاسقان تاجىريبە بار دەگەن ءسوز. ءتىپتى وسى جولدان وتكەن مەملەكەتتەرگە عىلىمي ەكسپەديتسيالار دا جىبەرىلگەن بولاتىن. سول تاجىريبەلەر مەن پىكىرلەر جيناقتالىپ, عىلىمي جانە مەملەكەتتىك ساراپتامادان وتكەن جەتى جوبا تۇرىندە جارىق كوردى. سولاردىڭ ىشىندەگى كەمىندە ءۇش جوبادا قازىرگى تاڭدا ايتىلىپ جۇرگەن ماسەلەلەر قامتىلعان. دەمەك, جۇمىستىڭ كوبى كەزىندە جاسالىپ قويعاندىقتان, سولاردى قايتا قاراستىرىپ, ءارى قاراي جاڭعىرتۋ قاجەت».
«اق جول» پارتياسى ورتالىق كەڭەسىنىڭ حاتشىسى ءسابيت بايدالى لاتىن الىپبيىنە كوشۋ ۇلت ساناسىن جاڭعىرتۋدىڭ ەڭ باستى العىشارتتارىنىڭ ءبىرى ەكەنىن تىلگە تيەك ەتتى. سونداي-اق, ول «اق جول» پارتياسىنىڭ قولدانىستاعى ساياسي باعدارلاماسىندا «قازاق ءتىلىن لاتىن الىپبيىنە اۋىستىرۋعا جاردەمدەسۋىمىز قاجەت», – دەگەن جولدار بار ەكەنىنە توقتالا كەلە, پارتيانىڭ 2015-2020 جىلدارعا ارنالعان الاش قايراتكەرلەرىنىڭ يدەيالىق كوزقاراستارىن زەردەلەۋ جانە تاراتۋ جونىندەگى باعدارلاماسىندا دا بۇل ماسەلە ناقتىلانا تۇسكەنىن ايتتى.
جيىندا لاتىن الىپبيىنە قاتىستى ايتىلعان وي-پىكىرلەر مەن ۇسىنىستار ارنايى قۇرىلعان كوميسسياعا ۇسىنىلماق.
ءلايلا ەدىلقىزى,
«ەگەمەن قازاقستان»
