كىتاپتىڭ العاشقى بەتىن اشقان ادام ونى سوڭىنا دەيىن ىقىلاسپەن وقىپ شىقپاۋى مۇمكىن ەمەس. مۇندا قازاقستان پرەزيدەنتىنىڭ شەت ەلدەرگە ساپارلارىنا كەڭىنەن شولۋ جاسالىپ, ەلىمىزبەن ىنتىماقتاستىعى نىعايىپ كەلە جاتقان جەتەكشى مەملەكەتتەردىڭ عىلىمى مەن مادەنيەتى, تاريحى مەن ادەت-عۇرپى, حالقىنىڭ ءومىر سالتى, ءتىپتى قاجەتىنە قاراي جەكەلەگەن ساۋلەت نىساندارىنا دەيىن قامتىلعان. نەگىزىنەن, سىرتقى ساياساتتى سارالاعان كىتاپتان كوشباسشىنىڭ ءبۇتىن بولمىسىن دا, ءتۇرلى ەلدەردىڭ بۇگىنگى تىرشىلىگىنىڭ تۇتاس پانوراماسىن دا اڭداۋعا بولادى.
دۇنيەجۇزىلىك ساياساتقا اسەر ەتىپ وتىرعان حالىقارالىق بەدەلدى ۇيىم جەتەكشىلەرىمەن قازاقستان پرەزيدەنتىنىڭ كەلىسسوزدەرى ەلىمىزگە زور پايداسىن تيگىزىپ جاتقانى جيناقتا جۇيەلى كورىنىس تاپقان. بۇۇ, ەۋروپالىق كەڭەس, ەۋروپالىق كوميسسيا, دۇنيەجۇزىلىك ساۋدا ۇيىمى, يسلام ىنتىماقتاستىعى ۇيىمى, ەۋروپا قايتا قۇرۋ جانە دامۋ بانكى, ماگاتە, يۋنەسكو ءتارىزدى ۇيىم باسشىلارىنىڭ نۇرسۇلتان نازارباەۆپەن كەزدەسۋلەرىنىڭ ماڭىزى مەن ءمانى اشىپ كورسەتىلگەن.
ەل ەكونوميكاسىنىڭ نەگىزگى تىرەگى بيزنەس سەكتورى ەكەنىن ءبىر ءسات تە ەستەن شىعارمايتىن ەلباسى ءوزى بارعان جەردىڭ بيزنەس-كاپيتاندارىمەن ۇنەمى جۇزدەسىپ جۇرەدى. ءبىزدىڭ ەلدە تاسىن ورگە دومالاتقىسى كەلەتىن ىسكەر جاندارعا قازاقستانداعى شەت ەل ينۆەستورلارىنا جاسالعان قولايلى جاعدايمەن مەملەكەت باسشىسىنىڭ ءوزى تانىستىرىپ جۇرگەنى كىتاپتا بۇكپەسىز باياندالعان. وڭتۇستىك كورەيا, تۇركيا, اقش, قاتار, اۆستريا, پولشا, يران ەلدەرىندەگى كەزدەسۋلەر قازاقستان ەكونوميكاسىنا قوماقتى ينۆەستيتسيا قۇيۋعا سەپتىگىن تيگىزگەنى دايەكتى تۇردە دالەلدەنگەن.
سونىمەن بىرگە, ساپارلار اياسىندا ەلباسىنىڭ قايسىبىر ەلدەردى استاناداعى ەكسپو-2017 كورمەسىنە تارتۋعا تىكەلەي ىقپال ەتكەنى جانە سول جونىندەگى ناقتى كەلىسىمدەرگە قول قويىلعانى ايتىلادى. اۆتورلار توپتامادا مۇنداي مەملەكەتتەرگە ايرىقشا توقتالعان.
بۇدان بولەك, وسى كىتاپتان نۇرسۇلتان نازارباەۆتىڭ الەمدىك دەڭگەيدەگى باستامالارىنىڭ ناتيجەسىندە ۇيىمداستىرىلعان ارناۋلى فورۋمدار مەن شارالار تۋرالى تولىققاندى ماعلۇمات الۋعا بولادى. انتيادرولىق قوزعالىستىڭ بەلسەندى ءارى بەدەلدى جاقتاۋشىسىنا اينالعان ءبىزدىڭ پرەزيدەنتتىڭ ۇستانىمدارى جاھاندىق قوعامداستىقتى مويىنداتقانى ەلىمىز بەن ەلباسىمىز ءۇشىن ماقتانىش سەزىمىن وياتادى.
كىتاپقا كوز جۇگىرتۋ بارىسىندا الەمنىڭ ءار قۇرلىعىنا جاساعان ساپارىندا ەلباسىنىڭ تەك مەملەكەتتەر باسشىلىعىمەن عانا جۇزدەسۋمەن شەكتەلمەي, شەت ەلدە ءبىلىم الىپ جاتقان قازاقستان جاستارىمەن دە تىلدەسۋگە ۋاقىت تاباتىنىن اڭعاراسىز. جاستارمەن وسىنداي جىلى جۇزدەسۋلەر فرانتسيا, پولشا, اقش, اۆستريا جانە ت.ب. ەلدەرگە ساپارلار اياسىندا ءساتتى كورىنىس تاپقان.
اۆتورلار قانشالىقتى قاۋىرت-قاربالاس كەزدەردە دە ەلباسىنىڭ سونشالىقتى جايدارى, سەرگەك كورىنەتىنىن, ءوزىنىڭ تارتىمدى تۇلعالىق بولمىسىنان ەش جازبايتىنىنا ءتانتى ەكەندەرىن جاسىرمايدى. ماسەلەن, بۇعان دالەل رەتىندە مىنا ءبىر ەپيزودتى ايتا كەتۋگە بولار ەدى: پرەزيدەنتتىڭ پاريجگە كەزەكتى ساپارلارىنىڭ بىرىندە, ەليسەي ءزاۋلىم سارايىندا فرانتسۋز وركەسترى قازاقتىڭ تانىمال اۋەندەرىن ورىنداپ تۇرادى. سول مەزەتتە ەلباسىمىز «كوزىمنىڭ قاراسى» انىنە قوسىلا شىرقاي جونەلەدى.
بەينەتاسپا بولماي قالعانىن بايقاعان اۆتوردىڭ ءبىرى سول اسەرلى دە تاريحي, باعالى بەيرەسمي ءساتتى ءوزىنىڭ قالتا تەلەفونىنا ءتۇسىرىپ الادى. سونىڭ ارقاسىندا كورەرمەننىڭ بۇل فراگمەنتتى كەيىننەن جارىققا شىققان دەرەكتى فيلمنەن تاماشالاۋىنا مۇمكىندىك تۋعانىنا ەرىكسىز ريزا بولاسىز.
«ۇلكەن ساياسات سىرتىندا» («زا كۋليسامي بولشوي پوليتيكي») اتتى كىتاپ – وسىنداي ساۋلەلى ساتتەردى, شۋاقتى شاقتاردى دا مولىنان قامتىعان شۇرايلى ستسەناريلەر جيناعى. جالپى, ءبىز اڭگىمەلەپ وتىرعان جاڭا كىتاپ – بەلگىلى ءبىر شەكتەۋلى ورتاعا عانا ەمەس, بىلمەككە, كورمەككە قۇشتار كوپشىلىككە, كوزى قاراقتى كەز كەلگەن وقىرمانعا قىزىقتىلىعىمەن ەرەكشە.
وسى ورايدا, اۆتورلار تۋرالى دا بىرەر اۋىز ءسوز ايتا كەتكەن ءجون بولار. ەرلان قاليجان ۇلىنىڭ جاستايىنان جۋرناليستيكادا جۇلدىزى جانعان دارىن يەسى ەكەنى جۇرتشىلىققا ءمالىم. ول ەلباسى جۇمىسىنىڭ قىر-سىرىن جەتىك بىلەتىن, اسىرەسە, ونىڭ سىرتقى ساياساتتاعى قىزمەتىن تەرەڭ ۇعىنعان ساناۋلى تەلەجۋرناليستىڭ ءبىرى. ال ۆلاديمير كۋرياتوۆ رەسمي اقپارات بەرۋ تۇرعىسىنان قامشى سالدىرمايتىن قازىرگى قارىمدى رەپورتەردىڭ ءبىرى.
تۇيىندەي كەلگەندە, قوس اۆتوردىڭ قالامىنان شىققان بۇل تۋىندى – حالىقارالىق قاتىناستار ماماندىعىنا ماشىقتانىپ جاتقان جاستارىمىزعا الەمدىك دەڭگەيدەگى ءىس-شارالاردىڭ ماڭىزدىلىعى مەن ەلدەر اراسىنداعى كەلىسىمدەرگە قول جەتكىزۋدىڭ قىر-سىرىن ۇعىنۋ ءۇشىن باسشىلىققا الۋعا تۇرارلىق پايدالى دۇنيە دەپ بىلەمىز.
ايتپاقشى, كىتاپتىڭ تاعى ءبىر باستى ەرەكشەلىگى – ونى اۆتورلاردىڭ وزدەرى ۇزىنقۇلاقتان ەستىپ, دايىن دەرەكتەردى پايدالانباي, تىكەلەي پرەزيدەنتتىڭ جانىندا ءجۇرىپ جازعانى, وقىرمانعا ۇسىنىلعان اقپاراتتاردىڭ نەگىزىنەن تىكەلەي وقيعا ورنىنان الىنىپ, بوياماسىز بەرىلگەنى دەپ بىلەمىز.
دوسۇلان ايتباەۆ
