«Eskimez Film Production Company» كومپانياسىنىڭ ديرەكتورى كامىل كوچتىڭ فيلموگرافياسىندا «اسفالت گۇلدەرى», «تەمىر ەتىك, تەمىر تاياق», ء«بىزدىڭ اۋىلدىڭ ايەلدەرى» كوركەم فيلمدەرى مەن «تۇرىك ءفيلمىنىڭ عاسىرى», «سوڭعى كەزەڭدەگى تۇرىك ءفيلمى» دەرەكتى فيلمدەرى بار.
«قازاقفيلم» كينوستۋدياسىمەن, جالپى, قازاق كينەماتوگرافياسىمەن تانىسۋ ماقساتىندا كەلگەن قوناقتاردى «قازاقفيلم» كينوستۋدياسىنىڭ پرەزيدەنتى باقىت قايىربەكوۆ قابىلدادى.
كەزدەسۋ بارىسىندا كامىل كوچ تۇركى حالىقتارى فيلمدەرىن ءتۇسىرۋ مەن قارجىلاندىرۋعا باعىتتالعان قور قۇرۋ تۋرالى ۇسىنىس تاستاپ, قوجا احمەت ياساۋي جايىندا فيلم تۇسىرۋگە قىزىعۋشىلىق تانىتاتىنىن جانە بۇل جوبانى «قازاقفيلممەن» بىرلەسىپ ىسكە اسىرعىسى كەلەتىندىگىن ايتتى.
باقىت قايىربەكوۆ ۇلتتىق كينوستۋديا شەتەلدىك ستۋديالارمەن بىرلەسكەن جوبالاردى ىسكە اسىرىپ جۇرگەندىگىن ايتا كەلە: «كەلەشەكتە تۇسىرىلەتىن مۇنداي فيلمدەر ورتاق تاريحىمىزدان حابار بەرەدى. كينوستۋديانىڭ مەنشىگىندە سماعۇل ەلۋباي جازعان «ياساۋي» اتتى دايىن ستسەناري دە بار. بىرلەسىپ جۇمىس جاسايتىن جاعدايدا سىزدەردى اۆتورمەن تانىستىرامىز. سونداي-اق, ءبىزدىڭ فيلمدەر تۇركيانىڭ كينوفەستيۆالدارىنا, اتاپ ايتقاندا, قوناعىمىز كامىل كوچ مىرزا باسقاراتىن «بوسفور» فەستيۆالىنە جىلدا قاتىسىپ, جۇلدەمەن ورالاتىنىن ايتقىم كەلەدى», دەدى.
ايناش ەسالي,
«ەگەمەن قازاقستان»
الماتى
