اسكەري تەحنيكا شەرۋگە دايىن

كەشە قورعانىس مينيسترلىگىنىڭ ۇيىمداستىرۋىمەن استانانىڭ ىرگەسىندەگى لوكوموتيۆ دەپوسىنىڭ جانىندا تاۋەلسىزدىكتىڭ 20 جىلدىعى جانە كونستيتۋتسيا كۇنىنە ارنالعان اسكەري شەرۋ دايىندىعىنىڭ تانىستىرىلىمى ءوتتى. استانا توڭىرەگىندەگى بۇل ايماقتا سالتاناتتى اسكەري مارشتاردىڭ, اسكەري تەحنيكانىڭ داۋىسى ەستىلىپ, كومانديرلىك پارمەندەردىڭ بەرىلىپ جاتقانىنا ءبىر ايعا جۋىق ۋاقىت ءوتتى. وزدەرىڭىز بىلەتىندەي, سوڭعى ەكى جىلداعى كونستيتۋتسيا كۇنىن ەلوردامىز ەرەكشە دايىندىقپەن اتاپ ءوتۋدى داستۇرگە اينالدىرىپ كەلەدى. بۇل جىلى دا سولاي بولماق. سەبەبى, بيىلعى جىل – تاۋەلسىزدىكتىڭ 20 جىلدىعى. كونستيتۋتسيا كۇنى بارشا قازاق­ستان­دىقتار وتان قورعاۋشىلارىمىزدىڭ ساپ تۇزەپ, اسكەري شەرۋمەن حالىق الدىندا ءجۇرىپ وتكەنىن عانا تاماشالاپ قويماي, ەل اسكەرىنىڭ تەحنيكالىق قۋاتىنا دا كۋا بولماق. ەستەرىڭىزگە سالا كەتەيىك, وتكەن جىلى مەحانيكالاندىرىلعان لەكتىڭ پا­رادتىق ەسەپتوبىن 150-دەن اسا جاۋىن­گەرلىك تەحنيكا قۇراعان بولاتىن. ال بيىل­عى جىلى ولاردىڭ سانى ارتىپ, ەلى­مىزدىڭ باس الاڭىنان 250-دەن استام ءاس­كەري تەحنيكا ءجۇرىپ وتەتىن بولادى. ەلوردا كوشەلەرى بۇل اۋىر تەحنيكالاردان ەشبىر زارداپ شەكپەيدى. ويتكەنى, بۇل جولى دا تانكتەر, بمپ-لار مەن متلب-لار شىنجىر تاباندارىنا رەزەڭكە «ءتاپىش­كە­لەر» كيگەن ەكەن. 30 تامىز كۇنى استانا جۇرت­شىلىعى تاۋەلسىزدىك سارايى­نىڭ ال­دىنان مەحانيكالاندىرىلعان لەكتەن اۋە شابۋىلىنا قارسى قورعانىس ءاس­كەر­لەرىنىڭ «سترەلا-10», «س-300», «س-200», «س-125», سونداي-اق «س-75» سىندى زاماناۋي قارۋ­لارىن دا كورەتىن بولادى. ودان وزگە, ءاس­كەري پارادقا «نايزا», «اكاتسيا», «مستا», «تيۋلپان», «سمەرچ», «راپيرا», «شتۋرم», «گراد», «ۋراگان» سياق­تى ورۋديالار مەن كەشەندەر, د-30 گاۋبي­تساسى قاتىسادى. بۇل توپتى «لاند روۆەر», «حاممەر» سىندى اۆتوتەحنيكالار تولىق­تىرماق. مەحانيكالاندىرىلعان لەكتىڭ بيىل­عى جىلعى تاعى ءبىر جاڭالىعى تانكتەرگە قولداۋ كورسەتەتىن جاۋىنگەرلىك ماشينالار, اۋىر وق اتاتىن جۇيەلەر جانە جەتىلدىرىلگەن بتر-82 اسكەري تەحنيكاسى بولماق. بۇل رەتتە قورعانىس ءمينيسترىنىڭ قارۋ-جاراق جونىندەگى ورىنباسارى, گەنەرال مايور امان­جول وسپانوۆ: «اسكەري شەرۋگە جال­پى 139 اۋىر تەحنيكا جۇمىلدىرىلىپ وتىر. ودان وزگە 20-عا جۋىق تەحنيكا رەزەرۆتە ساقتاۋلى. دەسەك تە, وسى كۇنگە دەيىنگى دايىندىعىمىزدا ولاردىڭ ەشبىرى سىر بەرمەي, ءوز قىزمەتتەرىن ويداعىداي ات­قارۋدا», – دەپ اسكەري اۋىر تەحنيكالاردىڭ دايىندىعىنا وڭ باعاسىن بەردى. ەسەپتوپتار, اسكەري تەحنيكانىڭ بەلگىلەنگەن ۋاقىتتارى, ەكيپاجدار ءار قيمىل­دارىن ساۋاتتى ورىندادى. ولاردىڭ ارا-قاشىقتىعىنداعى ءاربىر ولشەمدەرى ەسەپ­تەۋ­لى ەكەندىگى انىق بايقالىپ تۇردى. بۇل شەرۋدە ەلىمىزدىڭ اسكەري قىزمەتشىلەرى ءوز­دەرى­نىڭ ساپتىق دايىندىعىن تولىقتاي ءوز دەڭ­گەيىن­دە ورىندايتىنىنا, ءاربىر قيمى­لى­­نىڭ ورىندى قوزعالاتىنىنا سەنىم مول. سە­بەبى, جاۋىنگەرلىك دايىندىقتار قازىردىڭ وزىندە ءوز ناتيجەسىن بەرىپ وتىر. ولاردى كورگەن باسشىلىق دايىندىق وتە جاقسى دەگەن توقتامعا كەلدى. جۇلدىز ءبايدىلدا.