بەكزات ونەر جۇلدىزى

تاۋەلسىزدىگىمىزدىڭ 20 جىلدىق تورقالى تويىمەن تۇسپا-تۇس كەلگەن كۇنى كەشەگى استانا كۇنى مە­رەكەسىنىڭ ىستىق-سۋىعى ءالى باس­ى­­لا قويعان جوق. مەرەكە اياسىندا وتكەن اۋقىمدى ءىس-شارالاردىڭ ىشىندە قازاقستان جانە تاتارستان رەسپۋبليكالارىنىڭ حالىق ءارتىسى نۇرجامال ۇسەنباەۆانىڭ كون­تسەر­تىنىڭ اسەرى ەرەكشە بولعانى ايان. مەرەكەلىك شارالار شىمىلدى­عىن اشقان نۇرجامال ۇسەن­با­ەۆانىڭ شىعارماشىلىق كەشى استانا كۇنىنە ارنالعان مادەني شارالاردىڭ ىشىندەگى شوقتىعى بيىك ءارى تارتىمدىلىعىمەن ەستە قالدى. قازاق ۇلتتىق وپەرا ونەرىنىڭ ارقاۋى – ەجەلدەن كەلە جاتقان ۇلتتىق فولكلورىمىز بەن تاريح تۇزگەن حالىقتىق مۇرا بولىپ تا­بىلادى. وسى بەكزات ونەردى با­عىن­دىرعان تالانت يەلەرىنىڭ ىشىندە وپەرانىڭ الەمدىك دەڭگەيدەگى جۇلدىزى, قازاقتىڭ كۇمىس كومەي ونەرلى قىزدارىنىڭ ءبىرى, تاۋەلسىز «پلاتينالى تارلان» سىيلى­عى­نىڭ لاۋرەاتى, بارسەلو­نا­داعى فرانسيسكو ۆينياس اتىنداعى حا­لىقارالىق بايقاۋدىڭ لاۋرەاتى نۇرجامال ۇسەنباەۆانىڭ الار ورنى ەرەكشە. استانا كۇنى مەرەكەسىنە ارنالعان شىعارماشىلىق كەشىنىڭ باعدارلاماسىن وپەرا جۇلدىزىنىڭ ءوزى بەلگىلەدى. اي­تۋلى كونتسەرتكە ول ءوزىنىڭ شىعار­ماشىلىق دوستارى گەرمانيالىق ديريجەر ءارى كومپوزيتور پەرا-دومينيكا پوننەليانى, چەحيالىق باريتون فيليپپ بوندجاكانى, ماسكەۋلىك تەنور رومان مۋراۆيتسكيدى جانە الماتىلىق تەنور مەدەت چوتاباەۆتى ارنايى شاقىر­تىپتى. اباي اتىنداعى مەملەكەتتىك اكادەميالىق وپەرا جانە بالەت تەاترىنىڭ جەتەكشى ءانشىسى رەتىندە نۇرجامال ۇسەنباەۆا وسى شى­عارماشىلىق كەشتە ءوزىنىڭ بويىنا بىتكەن تابيعي تالانتىن, جوعارى ورىنداۋشىلىق شەبەرلىگىن بار­لىق قىرىنان تانىتتى. ول اريا, دۋەت جانە تريو سياقتى كلاس­سي­كالىق  كونتسەرت نومىرلەرىمەن قا­تار جەكە ورىنداۋىندا قازاقتىڭ حالىق اندەرىن دە قۇيقىلجىتا شىرقادى. استانا مەملەكەتتىك فيلارمونياسىنىڭ سيمفونيالىق وركەسترىنىڭ سۇيەمەلدەۋىمەن وپەرا جۇلدىزى ورىنداعان بۇگىنگى زامان اندەرى دە, وپەرەتتالار مەن ميۋزيكلدەردەن الىنعان كوڭىلدى اريالار دا شىعارماشىلىق كەش­تىڭ بارىنشا كوڭىلدى دە تارتىمدى وتۋىنە يگى اسەر ەتتى. گەرمانيادان وسى شىعارما­شىلىق كەش ءۇشىن ارنايى كەلگەن پەر-دومينيك پوننەلدىڭ ديري­جەر­لىعىمەن نۇرجامال ۇسەن­باەۆا روسسيني, گۋنو, پونسە, دەليبو, چايكوۆسكي, لەونكاۆاللو  جانە باسقا ەۋروپالىق كومپوزي­تورلاردىڭ ءدۇلدۇل شىعارما­لارىن شىرقادى. اتاقتى ديري­جەردىڭ سۇيەمەلدەۋىمەن وپەرا ءانشىسى نۇرجامال ۇسەنباەۆا بۇل بەكزات ونەردى ورىنداۋشىلىق شە­بەرلىكتىڭ شىڭىنا شىعارىپ, ساحنا سانىنە اينالدىردى. سونىمەن بىرگە, ول ساحنادا ءوزىن ەركىن ۇستاۋ ونەگەسىن كورسەتە وتىرىپ, ريچارد روجەرستىڭ «دو-رە-مي» ميۋزيكلىنەن الىنعان ۇزىندىلەر كەزىندە بالالار حورىنىڭ قاتىسۋىمەن ساح­نانى كىشىگىرىم سپەكتاكلگە اي­نالدىردى. شىعارماشىلىق كەشتىڭ ەكىنشى بولىگىندە وركەسترگە ابزال مۇ­حيتدينوۆ ديريجەرلىك ەتتى. وسى ديريجەردىڭ سۇيەمەلدەۋىمەن نۇر­جامال ۇسەنباەۆا ورىنداعان لاتيف ءحاميديدىڭ «قازاق ءۆالسى» زال تولى تىڭدارماندارىنىڭ قۇ­لاق قۇرىشىن قاندىرىپ, كونتسەرت زالىنىڭ شىرقاۋ بيىگىندە ۇزاق ۋاقىت شارىقتاپ تۇرىپ الدى. ەلوردا مەرەكەسىنە ارناعان ءوزىنىڭ شىعارماشىلىق كەشىندە وپەرا جۇلدىزى نۇرجامال ۇسەن­باەۆا كالماننىڭ «سيلۆا» وپە­راتتاسىنان, فەدەريكو لوۋدىڭ ميۋزيكلىنەن اريالار ورىنداپ ەندريۋ للويدا ۋەببەرانىڭ «پريز­راك وپەراسىنان» ۇزىندىلەر ورىندادى. وسى الەمدىك شىعار­مالاردى تىڭدارماندار نازارىنا ۇسىنعان كەزدە وپەرا جۇلدىزىن پريما-بالەرينو گۋلفايرۋز قۇر­مانعوجاەۆا باستاعان بالەت توبى مىڭ بۇرالعان بي ىرعاعىمەن قولداپ وتىردى. بىرنەشە ساعاتقا سوزىلعان شىعارماشىلىق كەش نۇرجامال ۇسەنباەۆانىڭ تارلان تالانتىن بارلىق قىرىنان تانى­تۋمەن بىرگە, زال تولى جۇرتتى شىنايى ونەرگە بارىنشا تام­ساندىرۋمەن ءوتتى. كەش سوڭىندا نۇرجامال ۇسەن­­باەۆا وسى كونتسەرتكە قاتىس­قان بارلىق ونەر شەبەرلەرىن ساح­ناعا شىعارىپ, ۆەرديدىڭ «تراۆي­اتا­سىنان» ءۇزىندى ورىندادى. جەز تاڭداي ءانشىنىڭ كۇمىس كومەيىنەن توگىلگەن اشىق تا اۋەزدى اۋەن ءبىر­دە-ءبىر تىڭدارمانىن بەيجاي قال­دىرمادى. مىنە, استانا كۇنى مەرەكەسىنە ارنالعان بەكزات ونەر جۇل­دىزىنىڭ شىعارماشىلىق كەشى وسىنداي اسەرمەن ەستە قالدى. جىلقىباي جاعىپار ۇلى.