ايەلدەر ىستەرى جانە وتباسىلىق-دەموگرافيالىق ساياسات جونiندەگi ۇلتتىق كوميسسيانىڭ, جالپى, ەلىمىزدەگى ايەلدەر قاۋىمىنىڭ اتىنان ارداگەرگە العىس ايتىپ, ىزگى تىلەكتەرىن جەتكىزگەن ول ارنايى الىپ كەلگەن سىيلىقتارىن تارتۋ ەتتى.
ارداقتى ارداگەر بۇگىندە 95 جاستا. جالعىز قىزىنان ەكى نەمەرە, ەكى شوبەرە كورىپ وتىر.
شيرۆانوۆا راۋزا احمەتوۆنا 1922 جىلى 25 تامىزدا سەمەي قالاسىندا تۋعان. 1939 جىلى ورتا مەكتەپتىڭ 7 سىنىبىن ءبىتىرىپ, سەمەي قارجى-ەكونوميكالىق تەحنيكۋمىنا وقۋعا تۇسەدى. وتباسىلىق جاعدايىنا بايلانىستى 2-كۋرستا وقۋىن تاستاۋعا ءماجبۇر بولعان. كەيىن زەرتحاناشى-تەحنولوگتار كۋرسىن ءبىتىرىپ شىعىپ, 1941 جىلدىڭ ءساۋىر ايىندا سولتۇستىك قازاقستان وبلىسىنا جىبەرىلەدى. پەتروپاۆل قالاسىندا 1942 جىلعى اقپانعا دەيىن زەرتحاناشى قىزمەتىن اتقارىپ, سەمەيگە ورالادى.
1942 جىلعى مامىردا سوۆەت ارمياسىنىڭ قاتارىنا شاقىرىلادى. 1942 جىلدىڭ مامىر ايىنان 1944 جىلدىڭ قىركۇيەگىنە دەيىن 136-جەكە بايلانىس روتاسىندا تەلەگراف مامانى بولىپ بورىشىن وتەگەن. كەيىن چيتا قالاسىنداعى بايكال سىرتى اسكەري وكرۋگىنىڭ شتابىنا اۋىستىرىلادى. ول جەردە 1945 جىلدىڭ قاراشاسىنا دەيىن تەلەگراف مامانى بولىپ قىزمەت اتقارعان. مورزە تەلەگراف اپپاراتتارىنىڭ مامانى 1945 جىلى 2 جەلتوقساندا سەرجانت دارەجەسىندە ەلگە قايتارىلدى.
1946 جىلى سەمەي قالاسىندا مەملەكەتتىك ەڭبەك جيناق كاسسالارى جانە مەملەكەتتىك نەسيە باسقارماسىنا جۇمىسقا ورنالاسادى. ول جەردەن الماتىداعى باس بۋحگالتەرلەر كۋرسىنا جولداما الادى. كۋرستى تامامداعان سوڭ, 1946 جىلى سەمەي وبلىسى نوۆوپوكروۆكا اۋدانىنداعى №7105 جيناق كاسساسىنا باس بۋحگالتەر بولىپ بارادى. ول جەردە 1954 جىلدىڭ قىركۇيەگىنە دەيىن قىزمەت اتقارعان.
1948 جىلى تۇرمىس قۇرعان. كۇيەۋى – شيرۆانوۆ رۋستەم ابدۋلوۆيچ ۋكراينا فرونتىندا مينومەتشىلەر توبىنىڭ كومانديرى بولعان.
كۇيەۋىنىڭ جۇمىسپەن ءجيى اۋىستىرىلۋىنا وراي راۋزا شيرۆانوۆا ءار جىلدارى قازاقستاننىڭ بىرنەشە وڭىرىندە قىزمەت ەتكەن. سەمەي وبلىسى كوكپەكتى اۋدانى (1955-1957 جج.), الماتى قالاسى (1955-1961 جج.), تسەلينوگراد وبلىسى ەسىل اۋدانى (1963-1968 جج.).
1970-1980 جىلدارى ول تسەلينوگراد قالاسىندا «قايرات» ەرىكتى سپورت قوعامىنىڭ باس بۋحگالتەرى قىزمەتىن اتقارعان. جالپى ەڭبەك ءوتىلى 36 جىل 8 اي.
ۇلى وتان سوعىسىنىڭ 2 دارەجەلى وردەنىمەن, «جاپونيانى جەڭگەنى ءۇشىن», «ەڭبەك ەرى» مەدالدارىمەن ماراپاتتالعان. سونداي-اق 7 مەرەيتويلىق مەدالدىڭ يەسى. ي.ۆ. ءستاليننىڭ العىس حاتىن, قر پرەزيدەنتى ن.نازارباەۆتىڭ قۇرمەت گراموتاسىن جانە قالالىق ارداگەرلەر كەڭەسىنىڭ قۇرمەت گراموتاسىن العان.
ايدار ورىسباەۆ,
فوتو: ورىنباي بالمۇرات,
«ەگەمەن قازاقستان».
