جانبولات ۇسەنوۆ,
حالىقارالىق قاتىناستار جونىندەگى ەۋرازيالىق كەڭەستىڭ ديرەكتورى
سيرياداعى قاقتىعىستى توقتاتۋعا نيەتتى تاراپتار استاناعا وسىمەن ءتورتىنشى رەت جينالىپ وتىر. ەلورداداعى كەلىسسوزدەردىڭ ماڭىزدىلىعى بۇكىل الەمنىڭ نازارىندا. التى جىلعا سوزىلىپ, تاياۋ شىعىستاعى ەڭ ءىرى شيەلەنىسكە اينالعان سيرياداعى قانتوگىس ءوز شەشىمىن تابۋى مۇمكىن دەگەن دە بولجامدار ايتىلۋدا.
ارينە, بۇل وڭاي ماسەلە ەمەس. قازاقستاندا جينالعان وكىلەتتى توپتار سوعىستى ءبىر كۇندە توقتاتادى دەپ ايتۋعا بولمايدى. الايدا, استانا پروتسەسىنىڭ ماڭىزى زور. ەلوردامىزدا سيريا ۇكىمەتى مەن قارۋلى وپپوزيتسياسىنىڭ وكىلدەرى تۇڭعىش رەت ءبىر ۇستەل باسىنا وتىردى. ءبىر-ءبىرىنە وق اتىپ كەلگەن ولاردىڭ ءبىر-ءبىرىمەن ءسويلەسۋىنىڭ ءوزى ۇلكەن جەتىستىك. سيريادا اتىستى توقتاتۋدىڭ ۋاقىتشا تەتىگى دە استانادا تالقىلانعانى بەلگىلى.
قازاقستانداعى كەلىسسوزدەرگە تاياۋ شىعىستا مۇددەلەرى بار تۇركيا, رەسەي مەن يران تۇراقتى تۇردە قاتىسىپ وتىر. پارسى شىعاناعىنداعى ەلدەردىڭ وكىلى رەتىندە يوردانيا قاتىستى, امەريكا قۇراما شتاتتارى دا وسى جولى ءوز وكىلىن جىبەرىپ, استانا پروتسەسىنىڭ دەڭگەيىن جوعارىلاتىپ وتىر. كەلىسسوزدەردىڭ وسى كەزەڭى ءبىتكەننەن كەيىن اقش پرەزيدەنتى دونالد ترامپ رەسەي پرەزيدەنتى ۆلاديمير پۋتينمەن سيرياداعى جاعدايدى تەلەفون ارقىلى تالقىعا سالۋدى جوسپارلاپ وتىر.
قازاقستان استانا پروتسەسى مەن بۇعان دەيىنگى يراننىڭ يادرولىق باعدارلاماسىنا قاتىستى كەلىسسوزدەردىڭ ارقاسىندا جانە بىرىككەن ۇلتتار ۇيىمى قاۋىپسىزدىك كەڭەسىنىڭ جۇمىسىنا قاتىسۋىنىڭ ارقاسىندا ءوزىنىڭ حالىقارالىق بروكەر رەتىندەگى ءرولىن نىعايتۋدا. ياعني, ەلىمىز ءىرى مەملەكەتتەردىڭ ساياساتىنا ەرمەي, ءوزىنىڭ حالىقارالىق كۇن ءتارتىبىن ۇسىنىپ, الەمگە وزىندىك ءىس-قيمىلى بار وكىلەتتى ەل رەتىندە تانىتىپ وتىر. بۇل قازاقستاننىڭ تاۋەلسىزدىگى مەن قاۋىپسىزدىگىنىڭ نىعايۋىنا تىكەلەي وڭ اسەر ەتەدى.
سانات كوشكىمباەۆ,
قازاقستان ستراتەگيالىق زەرتتەۋلەر ينستيتۋتى ديرەكتورىنىڭ ورىنباسارى
سيريا ماسەلەلەرى بويىنشا استانا پروتسەستەرى جەنەۆا كەلىسسوزدەرى سىندى حالىقارالىق كەزدەسۋلەردى تولىقتىرۋشى دەۋگە بولادى. ءوز الدىنا اۆتونومدى اۋقىمدى شارا سيريا داعدارىسىنا قاتىستى بارلىق مۇددەلى تاراپتاردىڭ باسقا دا كەلىسسوزدەرىمەن ءبىر ارنادا وتۋدە.
ەلورداعا رەسەي, يران, تۇركيا, سيريا وپپوزيتسياسى مەن ۇكىمەتىنىڭ دەلەگاتسيالارى, بۇۇ-نىڭ, العاش رەت اقش-تىڭ وكىلى كەلىپ وتىر. بۇل كەزدەسۋدىڭ وتە بيىك دەڭگەيىن كورسەتەدى.
اۋقىمدى شارانىڭ ءمان-ماڭىزى تۋرالى ايتقاندا, ءبىرىنشى كەزەكتە, 2017 جىلدىڭ قاڭتار ايىندا ەلوردادا وتكەن حالىقارالىق كەزدەسۋدە سيريانىڭ قارۋلانعان وپپوزيتسياسىنىڭ وكىلدەرى مەن سيريا ۇكىمەتىنىڭ وكىلدەرى العاش رەت ءبىر ۇستەل باسىنا وتىرىپ, ءبىر-بىرىمەن ءجۇزبە-ءجۇز سويلەسىپ, ءوزارا مامىلەگە كەلۋگە مۇمكىندىك العانىن ەرەكشە اتاپ ءوتۋ كەرەك. استانا فورماتىنداعى كەلىسسوزدەردىڭ نەگىزى اتىستى توقتاتۋ رەجىمىنە باعىتتالعان, ياعني بۇل ناقتى العا قويىلىپ وتىرعان مىندەت. سونداي-اق, وسى مىندەتتىڭ تەحنيكالىق جاعىنا كەلسەك, اتىستى توقتاتۋ رەجىمىنە مونيتورينگ جاساۋ, گۋمانيتارلىق كومەكتىڭ جەتكىزىلۋى سىندى جۇمىستار بار. بۇل ماسەلەلەر جەنەۆا فورماتىنداعى ساياسي كەلىسسوزدەرگە ىقپالىن تيگىزەدى. استانا پروتسەسىنىڭ تابىستارى جەنەۆا كەلىسسوزدەرىنىڭ تابىستى بولۋىنىڭ العىشارتى دەپ ساناۋ كەرەك.
كەلىسسوزدەر بارىسىندا قازاقستان ءوزىنىڭ باستاپقى بەيتاراپ ۇستانىمىن ساقتاپ قالدى, ءبىزدىڭ بىتىمگەرلىك ميسسيانى كوزدەيتىنىمىز كەزدەسۋشى تاراپتارعا كەلىسسوز الاڭىن ۇسىنۋىمىزدان-اق كورىندى. سول سەبەپتى, ەلورداعا كەلگەن تاراپتاردىڭ بارلىعى ءبىزدىڭ ۇستانىمىمىزعا وڭ كوزقاراسپەن قاراپ وتىر. التى جىلدان بەرى جالعاسىپ جاتقان سيريا داعدارىسىنىڭ ءتۇيىنىن تابۋ وتە قيىن. سوعىس ءورتى بۇل ەلدەگى ءاربىر وتباسىن شارپىدى. استانا كەلىسسوزدەرگە كەلگەن سيريالىق دەلەگاتسيا قۇرامىندا دا جاقىنىنان ايىرىلعان ادامدار بار. وسىعان قاراماستان, ولار ەلورداعا كەلىپ, كەلىسسوز ۇستەلىنىڭ باسىنان تابىلىپ جاتىر. سول ارقىلى مامىلەگە كەلۋگە نيەتتى ەكەندىكتەرىن كورسەتۋدە. دەمەك, استانا پروتسەستەرىنىڭ ءوزىن سيريا ماسەلەلەرىن شەشۋدەگى جەتىستىك دەپ باعالاۋ كەرەك.
