«كوكبوزات» كومەك كورسەتە باستادى

استانا قالاسىنداعى «كوكبوزات» قوعامدىق بىرلەستىگى «ىشكى ساياسات باسقارماسى» مم-مەن بىرلەسە وتىرىپ بۇلدىرگىش سەكتالاردىڭ اسەرىنە ۇشىراعاندارعا قىزمەت كورسەتۋ ورتالىعىن اشتى. وسىعان بايلانىستى كەشە «دەسترۋكتيۆتى ءدىني اعىمدار: وزەكتى ماسەلەلەر» تاقىرىبىمەن كونفەرەنتسيا ۇيىمداستىرىلدى. كونفەرەنتسياعا قاتىسقان ءدىن­تانۋشىلار, زاڭگەرلەر جانە پسيحولوگتار ەلىمىزدەگى ءدىني اعىم­دار­دىڭ بۇگىنگى كۇي-جايى تۋرالى ءارتۇرلى تاقىرىپتا باياندامالار جاسادى. تاۋەلسىزدىك الىپ, ءدىني سەنىمگە ەركىندىك بەرىلگەلى بەرى, قازاقستاندا 1989-2004 جىلدار ارالىعىندا 160 ءدىني بىرلەستىكتەر بولسا, 2004-2009 جىلدار ىشىندە ولاردىڭ سانى 254-كە دەيىن جەتكەن. سونىمەن بىرگە 2009 جىلدان باستاپ بۇل كورسەتكىشتىڭ بەلگىلى ءبىر دارەجەدە قىسقارعا­نىن دا ايتادى ءدىنتانۋشىلار. وسىعان قاراماستان ءبۇلدىر­گىش ءدىني اعىمدار ىقپالىنان زار­داپ شەككەندەرگە قىزمەت كور­سەتۋ ور­تالىقتارىنىڭ كوپتىك ەتپەيتىنىن وسى بىرلەستىكتىڭ ارنايى پسيحو­لو­گى, قازاقستان پسيحولوگتارى اسسو­تسياتسياسىنىڭ مۇشەسى ليمانا قۇت­تى­بەكقىزىنىڭ سوزىنەن باي­قاۋ­عا بو­لا­دى. «بۇگىندە قازاقستاندا ءداس­تۇرلى ەمەس ءدىني اعىمداردان زارداپ شەككەندەرگە قىزمەت كورسەتەتىن 17 ورتالىق  قىزمەت اتقارادى. «كوك­بوزات» قب مەملەكەتتىك جانە شە­تەلدىك تاجىريبەلەرگە سۇيەنە وتى­­رىپ دەسترۋكتيۆتى ءدىني اعىم­دار­دىڭ اسەرىنە ۇشىراعاندارعا پسي­حولو­گيالىق جانە زاڭدىق كومەك كور­سەتۋدە. دەگەنمەن, ءبىزدىڭ ءمۇم­كىن­دىگىمىزدىڭ جەتكىلىكسىز ەكەنىن دە ايتا كەتكەن ءجون. مەديتسينالىق تۇرعى­دان العاندا, زارداپ شەككەندەرگە التى ايدان ءتورت جىلعا دەيىن كومەك كەرەك. بىراق, ەلىمىزدە ولاردى ار­نايى, ۇزاق ۋاقىت ەمدەيتىن كلينيكالار جوق. سوعان بايلانىستى ءبىز وقىتۋ كۋرستارىن دا اشىپ وتىر­مىز», – دەيدى ول. ءتۇرلى ءدىني اعىمداردىڭ ەلگە اعىلۋىنا بايلانىستى دەسترۋكتيۆتى سەكتالاردىڭ اسەرىنە ۇشى­راۋشىلار دا كوبەيىپ كەتتى. بىرەۋى مال-مۇلكىنەن ايىرىلسا, كەي­بى­رەۋلەرىنىڭ شاڭىراعى شاي­قال­دى. ءتىپتى, قىرشىن جانىن قيعان­دار سانى دا ارتا تۇسكەنى بار­شاعا ايان. ونىڭ ەڭ باستى سەبەبى, حالىقتىڭ ءدىني ساۋاتتىلىعىنىڭ تومەندىگى, رۋحاني تايازدىق جانە قازاق ۇل­تى­نا ءتان ەلىكتەگىش قاسيەتىنەن دەپ اتاپ كورسەتتى كونفەرەنتسيادا ءسوز العان ماماندار. سول سەبەپتى ءدىن­تانۋ­شىلار ءبىزدىڭ مۇسىلماندىق ءدىنىمىزدىڭ دۇرىس قالىپتاسۋى ءۇشىن ءتار­بيەنى تۇزەپ, ءدىني ساۋات اشۋدى بالاباقشا قابىرعا­سىن­داعى جەتكىنشەكتەردەن باستاۋى­مىز كەرەك دەپ ەسەپتەيدى. سوندا عانا كىتاپ, كينو, ينتەرنەت جانە باسقا دا جولدارمان حالىقتى اداس­تىرا­تىن بۇرمالانعان ءدىني اعىم­دار­دان ساقتانا الاتىنىمىز انىق. مايگۇل سۇلتانقىزى, ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ 4-كۋرس ستۋدەنتى.