اتالعان شارا كەزىندە قىتايداعى قانداستارىمىزدىڭ «ۋيچات» الەۋمەتتىك جەلىسى ءسۇيىنشىلى حابارعا تولدى. 42 شاقىرىمدىق ۇزاق مارافوندا قاسىمحان اتتى قازاقتىڭ جەلاياعى قولا جۇلدەگە قول جەتكىزىپتى!
«Kazakh» ۋيچات تەكشەسى جازعان مالىمەتكە سۇيەنسەك, بۇل –ۇزاققا جۇگىرۋ سپورت ءتۇرى بويىنشا (قىتاي, ۇيعىر, قازاعى... بار) بۇكىل شىڭجاڭ سپورتشىلارى قول جەتكەزگەن ەڭ جوعارى ناتيجە بولىپ تىركەلگەن ەكەن. ءسويتىپ, قىتايداعى قازاق جىگىتى شىڭجاڭ مارافونشىلارىنىڭ كوشىن باستادى.
شىڭجاڭداعى شونجى اۋدانىنىڭ تۋماسى, 28 جاستاعى قاسىمحان 42 شاقىرىمدىق قاشىقتىقتى 2 ساعات 20 مينۋد, 22 سەكۋندتا جۇگىرىپ وتكەن.
«قاسىمحان بۇعان دەيىن, 2015 جىلى قىتايدىڭ چۇڭ ءچيىڭ قالاسىندا وتكەن مارافوندا ۇزدىك ناتيجەگە قول جەتكىزسە, 2016 جىلى حيۋاندا وتكەن حالىقارالىق مارافوندا كەنيالىق جۇيرىكتى باسىپ وزىپ, ءبىرىنشى بولىپ مارە سىزىعىن ءوزى كەسكەن ەكەن», دەپ جازدى «Kazakh» ۋيچات تەكشەسى.
قانداسىمىز قاسىمحاننىڭ بۇل جەتىستىگىنە قۋانا قۇتتى بولسىن ايتا وتىرىپ, ونىڭ بۇدان دا بيىك بەلەستەردى باعىندىرا بەرۋىن تىلەيمىز!
ۇلاربەك نۇرعالىم ۇلى
«ەگەمەن قازاقستان»
